Psalmyn 19 - Psalmyn Ghavid 1761 (Metrical)

PSALM XIX. PART I

¹ Ny niaughyn, Hiarn, ta er nyn skyn, T’ad soilshagh magh dty ghloyr; Obbyr dty laueyn heose ’syn aer, Ta prowal jeh dty phooar.

^2-3 Caghlaaghyn kinjagh laa as oie Cur toiggal dooin dy plain; Dy vel y phooar ren ad ’oardrail, Erskyn y roshtyn ain.

⁴ Ta sheean jeu ayns dy chooilley cheer, Yn feiyr oc trooid y theihll; Baght cronnal jeu ta er ny ghoaill Liorish dy chooilley ’eill. Cabbane ayns shen ren oo da’n ghrian,

⁵ Speeint goll myr fer-noa-poost, Magh ass e hiamyr, ny myr foawyr, Ayns siyr dy roie e choorse.

⁶ E bree ta goll veih shiar gys sheear, Myrgeddin jiass as twoaie; Dagh ayrn jeh’n seihl t’ee geddyn magh, Veg cha vel follit vo’ee.

PART II

⁷ Leigh Yee te glen, chyndaa yn cree, Gys craueeaght as foays; Creenaght te coyrt da’n boght annoon, Soilshey ’sy ghorraghys.

⁸ Ynrick ta slattyssyn y Chiarn, Eunyssagh as gerjoil; Ta ’anney, ronsit magh dy geyre, Niartagh yn shilley moal.

⁹ Aggle y Chiarn ta shickyr soit, Er undin nagh jean craa; E leighyn corrym, er nyn dowse Ayns meighyn kiart dy bra.

¹⁰ S’boght soylit huc ta meanyn airh, Ny’n airh hene ta roït voue; Yn vill, ny kerenyn-molley hene, Cha vel cha millish roo.

¹¹ M’Ir-choyrlee cooie treishteilagh ad, As raue'ghyn dooie foardrail; Leagh flaunyssagh ta gour nyn lheid, Ta’n vea oc roo cordail.

PART III

¹² E skyrraghtyn quoi oddys ginsh, E vennick goll jeh’n raad? Veih m’oiljyn follit glen mee, Hiarn, Uss ta’n slane coontey ayd.

¹³ Ny lhig da peccah daaney, Hiarn, M’y reayll fo reill e phooar; Dy voddym’s sauchey fo dty scaa, Scapail yn olkys mooar.

¹⁴ My phadjer eisht, as booise my chree, Vees er ny lowal liort; As mish, fo sauchys dty endeil, Nee coyrt my varrant ort.