Psalmyn 148 - Psalmyn Ghavid 1761 (Metrical)

PSALM CXLVIII.

¹ Reamyn yn yrjey vooar, Moylley-jee nyn ver-croo, Insh-jee magh mooads e ghloyr

² Shiuish ainleyn smoo as sloo: Trog-jee coraa, O Cherubim, As Seraphim Cur moylley da.

³ Uss eayst ta reill ny hoie, As ghrian leeideil y laa; Rollageyn sollys choie, Cur-jee nyn geeshyn da;

⁴ Eeck-jee e chair, O shiuish niaughyn, As vodjallyn Getlagh ’syn aer.

⁵ Lhig daue shoh ennym Yee Y voylley dagh unnane; E ghoo hug daue nyn mree Tra nagh row veg jeu ayn;

⁶ Bee ad er-mayrn, Seyr veih caghlaa Er son dy bra Shassee leigh’n Chiarn.

⁷ Moyll-jee eh whaleyn mooar As eeast ’sy diunid heese; Eïllit lesh scailley creoi, Cur-jee cair dasyn neesht.

⁸ Aile, sniaght’ as rio, Druight, sterm as geay, Cheet tra t’eh gra Cooilleeney ’ghoo.

⁹ Sleityn as croink as coan E voylley ta diu jesh; Cedaryn liauyr nyn gione As biljyn gymmyrk mess.

¹⁰ Beiyn feïe as meen, Snauee er laare, As eeanlee’n aer Jannoo cooilleen.

¹¹ Ree'ghyn as princeyn ard, Marish dagh theay ta foue; Briwnyn y theihll dagh raad, Cur-jee da ’voylley feeu.

¹² Dy wooiys Jee, Lhig aeg as shenn Dooinney as ben Cur chengey’s cree.

¹³ Lhig da’n slane chroo cordail Dy hoiagh seose e ghoo; E ennym smoo gloyroil Ta toilchin moylley voue. King foddey’n theihll Ta bial da, E ghloyr dy bra T’erskyn dagh reill.

¹⁴ E nooghyn hene ta eaït T’eh soiagh seose dy bra, As Isr'el e chloan reiht Ta kinjagh ’gerrey da. Nish ayns arrane Trog-jee coraa Gennal dy bra Dy voylley’n Chiarn.