Ioane 18 - PaicîÉ popa tèpa coda wà Judas ba na rà tâjùru Iésu Mataio 26.47–56; Maréko 14.43–52; Luka 22.47–53 1 Ûna é pwapwicîri diri wà Iésu, â rà tapàgà napwé Cédron, wàilà ma tèpa *câmu kêe.  rà pâ naa na jè ére na câmi goro upwâra, â rà tò naawê. 2  wà Judas, wà pwina ée mwa pwa tûâ tà Iésu, âna é nye tâmogòori bwàti ê pwi ére-bà. Ba rà mu nye ciburà pâra naawê ma wà Iésu. 3  é popa me naawê ê pâ coda na wâru, wàilà bau pàra tèpa wéaari *Wâra pwapwicîri. Ba rà cùrurà wà tèpa caa kà tèpa pwa *ârapwaailò, ma tèpa *Farasaio.  rà popa pâ ê pâ wâra ânye, bau pâ uèù, bau pâ neemuru paa. Wâgo Iésu gée Nazareth 4 Wà Iésu, âna é jèe nye tâmogòori diri ê pâ muru, na o tèepaa mariê.  é pâra cararà, â é ina tàra pâ: «Wàilàapà na guwà mudèe?» 5-6 «Wà Iésu, pwi âboro gée Nazareth.» «*Wâgo kaa.»  rà ti côwâ, ma tûuboo naa napuu. Napwa naa goo wà Judas, âna é bwaa tâa jaarà. 7  é tawèerirà mwara wà Iésu pâ: «Wàilàapà na guwà mudèe?» «Wà Iésu gée Nazareth.» 8  é tòpi tàra pâ: «Go jèe ina tàwà èri pâ wâgo kaa.  wiàna nye wâgo kaa na guwà mudòo, â wâdé na guwà panuâ tàpéeni, ma rà pâra.» 9 É ina pwiri, ba na pâ nau coo ê popai, na ia é jèe tàmara ina pâ: «O càcaa tiàu cè pwi jè âboro gée goo tàpé na gà naarà tôo.» 10  wà Simona Pétéru, âna pwa ê tàuwa kêe, â é càù dò gée na wêe.  é pwa na é tüboo kaa naa gòro pûru Malkus, pwi ênawéna kà pwi *ukai kà tèpa pwa ârapwaailò. [Êco na] é tépàgà co i doronyüruê étò. 11  é ina tà Pétéru wà Iésu pâ: «Gà tùu boo côwâ i tàuwa'gà naa na i wêe! Gona gà niimiri pâ, o tàutôo na go wâdo ê na wârado kâra maagé côo, na é pwabwàti ba kôo wà Caa?» Naa jaa pwi ukai kà tèpa pwa ârapwaailò Mataio 26.57–75; Maréko 14.55–72; Luka 22.54–71 12 Rà tâjùru Iésu wà tèpa coda—wà tèpa coda kà tèpa *Roma, ma wà pwi caa kàra; wàilà ma wà tèpa coda kà tèpa *Juif.  rà piié goro ê pâ utàpwe. 13  rà popaé béaa pâdari Hanne, pwi caa kà wâdà Caïphe. (Wà Caïphe âna é pwi ukai kà tèpa pwa ârapwaailò, na pwi naja-bà. 14  wàé kaa, na ia é ina tà tèpa Juif pâ: «Wâdé na é bà wà pwi caapwi âboro ba kâra ê Ba.») Ru picâwiâê tupédu a câmu kêe 15 Ru picâwiâ Iésu wà Simona Pétéru, ma pwi jè a câmu mwara. Wà pwi ukai kà tèpa pwa ârapwaailò, âna é tâmogòori bwàti wà pwi a câmu bèepwiri. Êkaa na, ûna é tò wà Iésu, â é jèe nye tò mwara wà pwini naanidò gòroigé kà pwi ukai. É pitütôowâriê Pétéru 16 Wà Pétéru âna é jèe tà coo boo gòroigé, goro goropwârawâ.  é còobé côwâ i pwi jèpwi.  é patùra i tô ilàri na é piwéaari goropwârawâ, ba na é nama é tò mwara wà Pétéru. 17  é ina tà Pétéru wà tôoni pâ: «É! Pwiini, gà pwi jè bée Iésu?»  é ina pâ: «Bwa, bwa.» 18 Rà tà tâa wê wà pàra tèpa ênawéna, ma wà tèpa wéaari Wâra pwapwicîri.  rà pwa ê pé na ânye, â rà pwacârau, ba dau maina kaa ê moo.  é tà coo burà pwacârau jaarà wà Pétéru. É pitawiâ Iésu wà Hanne 19 Wà [Iésu, âna é coo ara Hanne] pwi ukai kà tèpa pwa ârapwaailò [béaa.  wà Hanne] âna é pitawiâê naa goo tèpa câmu kêe ma pai pwa pupûra kêe. 20  é ina têe wà Iésu pâ: «Go mu nye tùra na ara diri ê pâ âboro.  go mu ipupûra na ê Wâra pwapwicîri, ma wâna ê pâ *wâra pitapitiri.  nye ticè jè popai cèna go pinaapwàniri. 21  gorodà na gà bwaa pitawiâô? Wâdé na gà tawèeri ê pâ âboro na rà têre ê popai kôo. Ba rà tâmogòori ê pâ muru na go ina.» 22  é tamagérié wà pwi jè a wéaari Wâra pwapwicîri, na é cimwünyabwerié, â é ina têe pâ: «Kaa! Gà wàrapwiri târa pai tòpi'gà tà pwi ukai kà tèpa pwa ârapwaailò?!» 23  é ina tà Hanne wà Iésu pâ: «Wiàna èpà cè pai tòpi kôo, â gà paari tôo cai cè popai èpà na go ina.  wiàna *tàrù, â cina gà nama tamagério?» 24  é panuâê pâ wà Hanne, dari wà Caïphe, gée goo na é pwi ukai kà tèpa pwa ârapwaailò, na pwi pàara-bà.  bwaa nye tàgére pii wà Iésu. É jèu pitütôowâriê Pétéru 25 Na bwaa gére wàrapwiri, â rà tàgére pwacârau wà Simona Pétéru ma wà pàra tàpé.  rà jèu ina têe pâ: «Pwiini, gà pwi jè a câmu kà Iésu mwara?»  é pitütôowâri wà Pétéru, â é ina pâ: «Bwa, [câgo caa tâmogòori pwiibà].» 26  é tâa jaarà mwara wà pwi jè ârapàara tèpa ênawéna kà pwi ukai kà tèpa pwa ârapwaailò. Wà pwi ênawéna-bà, âna pijènereru ma wà i pwi ia é tépàgà i doronyüruê wà Pétéru.  é ina têe pâ: «Pwiini, akaé! Wâgà kaa na go côogà naa jaa wà Iésu, na i ére na câmi goro upwâra.» 27  é pitütôowâri mwara wà Pétéru.  é nye to kaa i ja. Iésu naa jaa Pilato Mataio 27.11–31; Maréko 15.2–20; Luka 23.1–25 28 Bwaa nye dau dàuru kaa, â rà popa Iésu wà tèpa coda, jii wà Caïphe.  rà dàtié pâ naa na pwârawâ kà *Pilato, pwi kupénoo roma.  wà tèpa caa kà tèpa Juif, âna càra caa too naa na i pwârawâ; [wàrapwiri ba câé caa pwi Juif wà Pilato]. Ba péa rà tà piwâtàmurirà, [wiâra ê naèà kâra pwapwicîri kàra] â o càcaa pâri ma rà ija ê utimuru pwicîri na tòotù *Paséka. 29 Êkaa na é còobé cararà wà pwi kupénoo Pilato.  é ina tàra pâ: «Gona dà cè pwina èpà cèna é pwa wà pwi âboro bèeni, na guwà me nau piciapwâ gooé?» 30  rà ina têe pâ: «Wiàna ticè cè pwina é pwa na èpà, â gona gà niimiri kaa pâ bà o popaé medarigà?» 31  é tòpi tàra wà Pilato pâ: «Guwà popaé côwâ, â guwà pitèié wiâra ê naèà kàwà.»  rà ina têe pâ: «Nye ticè tàrù kâbà [wiâra ê naèà kàwà] ma bà pòtàmwara cè pwi jè âboro.» 32 Tèepaa me ê pâ bèepwiri, târa ma coo ê popai na é jèe ina wà Iésu, na é inapàpari ê pai o bà kêe. Càcaa wâni Mwaciri kôo 33 É tò côwâ wà Pilato naa na i wâ.  é todà Iésu, â é tawèerié pâ: «Gona gà pwi ukai kà tèpa Juif?» 34  é tòpi têe pâ: «Gà ina gée googà ê popai bèepwiri, é, pwa cè jè âboro cèna é inaô tâgà?» 35  é ina têe wà Pilato pâ: «Gona go pwi Juif mwara, wâgo? Rà panuâgà tôo wà tèpa jèneregà, ma wà tèpa caa kà tèpa pwa ârapwaailò. Ba dà cèna gà pwa?» 36  é tòpi têe wà Iésu pâ: «Càcaa wâni gòropuu ê Mwaciri kôo. Ba wiàna wâni gòropuu, â pwiri rà gére ipwamuruô wà tèpa ênawéna kôo, ma càcaa panuâô tà tèpa pitûâ kà tèpa Juif. Bwa, càcaa wâni gòropuu ê Mwaciri kôo.» 37  é tawèerié mwara wà Pilato pâ: «Gona gà pwi jè ukai?»  é tòpi têe wà Iésu pâ: «Âjupâra ê pai ina'gà! Ba go Pwi Ukai.  go tèepaa naani gòropuu, ba na go picémara ê *âjupâra.  wà diri tàpé na rà tâa na ê âjupâra, âna rà tàmaari ê pâ popai kôo.» 38  é ina wà Pilato pâ: «Â gona dà ‘âjupâra’?» É còobé côwâ wà Pilato, â é ina tà tèpa Juif pâ: «Câgo caa pâmari cè pwina pâri ma é pwa wârimuru goo, ê pwi âboro bèeni. Nümarà goo Barabbas 39 Nye câmaajé tâjè, na go panuâ côwâ tàwà ê pwi jè a pwa wârimuru, na tòotù Paséka.  wànau, nümawà na go panuâ côwâ Iésu, ‘pwi ukai kà tèpa Juif’?» 40  rà nye cau ina too kaa pâ: «Bwa! Càcaa wàé! Gà panuâ Barabbas!» (Napwa wà pwini Barabbas, âna pwi a mura.) |
© 2012, Wycliffe Bible Translators, Inc. All rights reserved.
Wycliffe Bible Translators, Inc.