โยนา 2 - Prai Bibleโยนา ครอ วอน เอาซาง 1 ญาม โยนา อุ ตัก มพุล คา นัน นำ ก็ ลือ เอาซาง งกีจ็อง คือเน 2 “โอ เอาซาง เอิญ ลือ มัห ซีเละ ญาม เอิญ บัก และ เปิล ตัก นอก จ็อง นัน เอิญ ก็ ครอ วอน มัห เอิญ งกรอ และ มัห มัห ก็ ซวัล เอิญ ลด ญาม เอิญ บัก และ เปิล แลว นัน เอิญ ครอ เคิบ มัห จวย ออ มัห ก็ ปัง เอิญ ซีเละ 3 มัห กวาง แอ็ม เอิญ ตัก นอก ทะเล จุ ทะเล ก็ ดุ โท็ล นโดน โท็ล นแด็ห เลอะ ทวม แกวด แอ็ม นัง เอิญ มด ไอ มี แร็ง เอิญ เตาะ นอก คอง มัห เน อี พัน เอิด เอิญ เล็บ ล็วญ เริล อุ ตัก ปืน ทะเล นเซ็บ 4 เอิญ กึด เค็ย มัห พระ แอ็ม เอิญ แลว เอิญ กึด เค็ย ไอ มี เม็จ มัด มัห วัล เตาะ เอิญ ก็ ไอ มี กุญ เม็จ วิฮาน มัห วัล เตาะ เอิญ กึด จังเน 5 นอก ก็ ทวม มัด ทวม มุห เอิญ มด นอก ก็ มบัล โจก เอิด เอิญ เริล นเซ็บ อุ ทิง นอก เน นเซ็บ วัล จือ เตาะ ซีไญ แญ็น ซีไญ วะ เลอะ มพัล มัด มพัล มุห เอิญ มด 6 เอิญ จม นอก เริล นเซ็บ เน เล็ห เซ็บ ตัก ปาเกียง ตัก เจ็ง ญวัง ทิง นอก ลัห เซ็บ วัล มอก คลิห อุ ตัก งกุก จุ มอก มัห เติล งอก งกุก แก็นๆ จำ นเดย จำ กวา โอ เอาซาง งกีจ็อง เฮย ญาม นัน มัห ก็ ควะ นจืน ที นจืน ลา จวย เอิญ ระ ปน แอ็ม เจ็น งกุก นัน ซีเละ 7 ญาม เอิญ แมด นัง นซัก บัก และ เปิล ตัก นอก นัน เอิญ ก็ ลุห นโทล อัง มัห เอิญ ครอ มัห จวย ออ แญง เอิญ ก็ โตะ เคิ๊ด วิฮาน คอง มัห ฮัก เอิญ ครอ จังนัก มัห ก็ เม็จ แญง เอิญ มด ญาม นัน นอ” โยนา ลือ เอาซาง จังนะ 8 นำ ก็ ไล เอาซาง ฮุนเน วัล “ซำรับ ครำ ตี ทือ ฮูบ ทือ พะ ปอม เน็ด นัน มัห รัก อัห ดก ปานเดย ก็ ตึก อัห ก็ เค็ห เคา พระ แอ็ม มัห วัล 9 แต ซำรับ เอิญ เน เอิญ ต็อง อวด ลือ มัห ฮัก เอิญ ต็อง ลอง เพลง ลือ มัห เอิญ ต็อง คอบคุน มัห ฮัก เอิญ ต็อง มเบิล ซะ ทวาย อน ตัก มัห นังเลาะ ดาย ซำรับ เลือง มัห จวย เอิญ เน เอิญ ก็ บน ระ นัง ออ ตัก มัห เอิญ บน จังนัก เอิญ ก็ แอง จังนัน ดาย จู ล็อง ตี ปน ตุก ปน ญาก อัห ก็ ปน ญอน มัห ฮัก” โยนา อัง 10 เจ็นนะ เอาซาง ก็ แอง ระ คา นัน ซอล แอ็ม โยนา ตัก ซีร็อห นดิ เปล นอก นัน |
Global Partners
Global Partners