ฮีบรู 9 - Prai Bibleซะไม พาเต็น ตัก โลก เน 1 ตี เอาซาง ซันญา เคิบ อิซราเอล แอ ตัก อิง นัน ก็ มี กด มี ระเบียบ ตี อัห ต็อง ทือ อุ นัน ญาม อัห ลือ เอาซาง ญาม อัห ครอ วอน เอาซาง นัน อัห ก็ มี กด มี ระเบียบ มด เจ็นนัน ก็ มี มี ตี นะ ตี อัห โตะ ลือ เอาซาง ครอ วอน เอาซาง นัน ตี นะ ก็ เป็น พาเต็น 2 ตัก พาเต็น นัน ก็ มี ฮ็อง อุ เปียะ ฮ็อง ฮ็อง แรก นัน มี ตะเกียง มี โตะ มี คนมปัง ตี อัห ทวาย อน ตัก เอาซาง อัห ต็อก ระ ตัก โตะ นัน ฮ็อง นะ อัห เค็ย ฮ็อง ซักซิด 3 ทาเน ก็ มี พามาน คัน ฮ็อง มี ฮ็อง วัล ฮ็อง นะ อัห เค็ย ฮ็อง ซักซิด ทีซุด 4 ตัก ฮ็อง ซักซิด ทีซุด นัน ก็ มี ตี เคิม ซะ ซียุม ตี เคิม ซะ ซียุม นัน ก็ เป็น ทองคำ เจ็นนัน ก็ มี ฮีบ ซันญา คอง เอาซาง ลัห นเดะ ฮีบ นัน อัห เอิด ทองคำ กลับ ซิห มด ควังใน ฮีบ นัน ก็ มี ปม ทองคำ ตี อัห ซิห มานา ระ อน มี งเกราะ อาโรน ตัก ปลัด นทู ตัก อิง นัน เจ็นนัน ก็ มี เกียง เปียะ แพ็น เป็น เกียง ตี เอาซาง เคียน กด ซิบ คอ อน ตัก ครำ อิซราเอล แอ นัน ซะ ปึง เน อัห ซิห ระ ใน ฮีบ นัน มด 5 คอม เคลิบ ฮีบ ลัห ทึห นัน ก็ มี ฮูบ เทวาดา เครูบ เปียะ นัง อี เริห พนาล ปุก ระ เคลิบ ฮีบ นัน เอาซาง ก็ ทาง อุ คอม เคลิบ ฮีบ นัน เคลิบ ฮีบ นัน เป็น ตี เอาซาง ตึ อัง ครำ ลุห นัน เลือง พาเต็น เน เอิญ ไล แป ตึก มอก เน วาล นอ มานะ เน เอิญ ไท ไล อน แป ดก กวา เน ไอ มี กุญ เตาะ นอ 6 แลว อัห แอง พาเต็น นัน แลว อัห ก็ เอิด จู มบลึ เน ซิห ระ ตัก ควังใน พาเต็น นัน มด ปึง มอ เอาซาง ก็ แองกาน ควังใน พาเต็น นัน กุญ อัห ก็ แอง ตาม นาตี ออ ตัก ฮ็อง ซักซิด นัน จู งิ กุญ 7 แต ฮ็อง ซักซิด ทีซุด นัน ปึง มอ จู ล็อง กุด ไอ มี กุญ เตาะ มี แต มอ เอาซาง จ็อง มี ล็อง เดียว กุด กุญ มี วาง นเดย นำ กุด กุญ มี ลบ เดียว ญาม นำ กุด นัน นำ ต็อง ซับ เมียม ทม แอ็ม ตี ลุห ออ วาล เจ็นนัน นำ ก็ ทม แอ็ม ตี ลุห ปึง พซาซน แทะ วัล เป็น ซะ ลุห ตี อัห แอง แบบ ไอ มี เม็จ ซึก นัง ออ นัน ปึง มอ เอาซาง ต็อง ทม แอ็ม ลุห อัห มอก นัน นอ 8 ตี เอาซาง ไอ มี ระ อัห กุด ฮ็อง ซักซิด ทีซุด นัน ซีมาล เอาซาง ก็ ระ แอ เคาใจ เค็ย แอ กุด อุ มี ตี เลิม เคิบ เอาซาง ไอ มี กุญ เตาะ ซีมาล เอาซาง ระ แอ เคาใจ จังนะ นอ กัน ควะ มี พามาน กาง ฮ็อง ซักซิด ทีซุด นัน อุ กัน ควะ มี มอ เอาซาง แองกาน ตาม นาตี ออ ตาม กด นัน อุ เอาซาง ก็ ไอ มี งเคาะ พลาง รวง กุด ฮ็อง ซักซิด นัน ตัน แอ จู ล็อง จู นัง กุด ฮ็อง ซักซิด ทีซุด นัน ก็ ไอ มี ตัน กุญ เตาะ 9 แต พาเต็น เคิบ พิที ตี อัห แอง จู มบลึ นัน เป็น พาบ มาลือ เป็น พาบ จวย ระ แอ ตัก ซะไม มานะ เน เคาใจ เค็ย เมียม แปะ เมียม แกะ นัน จวย แก แอ็ม ตี ลุห ไอ มี กุญ เตาะ ซะ ตี อัห ทวาย นัน ไอ มี กุญ จวย ระ ครำ อุ เลาะ เคิบ เอาซาง เตาะ แอง แลว ก็ ควะ ลุห อุ นัน 10 แบบ เครม นัน ไอ มี ซมบูน เตาะ เป็น เลือง ป็อง กัห เลือง ออก กัห เลือง ทม ตี ลุห ออ กัห เลือง แอง พิที ดก มบลึ ระ ซะ เน ซะ นัน เลาะ ตาม กด เอาซาง กัห ซะ มู เน เป็น กด พาลือ แต อัห ต็อง แอง ตาม แบบ เครม นัน จำปอ เล็ห แบบ แมะ ตี กิว แก แอ็ม ตี ลุห กุญ กัน เล็ห แบบ แมะ แลว แบบ เครม ก็ ไอ มี จำเป็น แอง วัล เตาะ เยซู เป็น เคือง ทวาย ตี ซมบูน เลาะ ทีซุด 11-12 เอาซาง ระ เยซู โตะ เป็น มอ เอาซาง จ็อง ตี แกะ ทีซุด แลว นำ เป็น มอ จ็อง คอง แอ ฮัก นำ ก็ กุด พาเต็น ตัก วาง นทึห ลด ทวาย เมียม ออ ระ แอ กุญ ปน แอ็ม เจ็น ลุห จำ นเดย จำ กวา นัน พาเต็น นัน ก็ เป็น ตี เลาะ ทีซุด คอง เอาซาง ฮัก ไอ แมน คอง โลก เน เตาะ ไอ แมน ครำ แอง เตาะ นำ ก็ ไอ มี เอิด เมียม แปะ เมียม งัว ลัง เตาะ นำ ทวาย เมียม ออ ฮัก นำ ทวาย เมียม ออ มี ลบ เดียว นัน ก็ ปอ แอ ก็ กุญ ปน แอ็ม เจ็น ลุห จำ นเดย จำ กวา นโดน 13 แบบ เครม นัน แกด ลบ อัห เอิด เมียม แปะ แกด ลบ อัห เอิด เมียม งัว ลัง แกด ลบ อัห เอิด งัว เม็ย ซีเติน เคิม วัล อัห เคิม งัว นัง เม็ย นัน แลว อัห ก็ เอิด พุน ตี ควะ เลือ นัน ซุน ซิห เคิบ ออก ลด ซัห ซิห ตัก ครำ เจอะ นัน เอาซาง ก็ เค็ย อัห ซะอาด แลว 14 แต เมียม เยซู คริด ก็ เน็ด กวา เมียม ซัด นัน วัล มี ริด มี แร็ง แก แอ็ม ตี ลุห แอ กุญ ซีมาล เอาซาง ตี รีด อุ ตลอด นัน นำ ซับรวง เยซู ทวาย นัง ออ เป็น ซะ ทวาย ตี เลาะ ตี ไอ มี ตี ติ ตี คอล นำ ทวาย นัง ออ มอก นัน แลว ก็ เพือ ระ แอ ปน แอ็ม เจ็น ซะ เครม ตี แอ แอง ตี ไอ มี คิ นัน เพือ ระ แอ กุญ ฮับไจ เอาซาง ตี รีด อุ ตลอด นัน เมียม เยซู เป็น ปะโยด อน ตัก แอ กวา เมียม ซัด ซีเละ 15 แญง ซันญา เครม นัน กัน อัห แอง ลุห แลว อัห ก็ กุญ โทด แต แญง ซันญา แมะ อัห ก็ ปน แอ็ม เจ็น โทด นัน กุญ ญอน เยซู เปิล ญอน นำ ทวาย นัง ออ นัน เยซู ก็ แอง ฮุน แญง ซันญา แมะ ตี เอาซาง ซันญา เคิบ ครำ แอ แลว จู ล็อง ตี เอาซาง มพอล เอิด แลว นัน เยซู ก็ ระ อัห กุญ ซืบ เอิด กากุน ตี เอาซาง ซันญา อง อน นัน เป็น กากุน เลาะ จำ นเดย จำ กวา 16 ทาเน กัน อัห เคียน นังซือ แบง กากุน อน ตัก ควัน ออ อัห ก็ เพีย เคียน ระ อน วาล ไอ มี ตัน อัห เปิล นอ อัห เคียน ไล อน เค็ย ควัน ล็อง เน ล็อง นัน ต็อง กุญ ซีวะ แต ล็อง ตี เคียน นัน ต็อง เปิล แอ็ม วาล ซัง อัห แบง กากุน นัน กุญ ต็อง เม็จจึด เค็ย ล็อง นัน เปิล นังเลาะ 17 กัน ไอ มี ตัน นำ เปิล นังซือ แบง กากุน นัน ไอ มี ตัน มี คิ เตาะ แบง กากุน ไอ มี กุญ เตาะ แต กัน นำ เปิล แลว ควัน นำ แบง เอิด กากุน นำ กุญ 18 เลือง เอาซาง ซันญา เคิบ ครำ อิซราเอล ตัก อิง นัน ก็ เมือนนอย ตัก อิง ญาม เอาซาง ซันญา เคิบ อัห นัน ต็อง มี ซะ เปิล ต็อง แจล เมียม วาล ซัง อัห กุญ ซืบ เอิด ซะ ตี เอาซาง ซันญา นัน กัน ไอ มี เซีย เมียม แญง ซันญา นัน ก็ ไอ ตัน มี คิ เตาะ 19 เลือง แญง ซันญา เครม นัน ก็ คือเน ดาย โมเซด ไท อาน กด เอาซาง อน ตัก อัห วาล นำ อาน มด จู คอ แลว นำ ก็ เอิด เมียม แปะ เมียม ควัน งัว นำ ก็ เอิด ออก ซุน ซิห เคิบ เมียม นัน เจ็นนัน นำ ก็ เอิด งกา ลำ ฮุซบ เคิบ นโซก แกะ โซๆ จุบ ซิห ตัก เมียม แปะ เมียม งัว นัน ซัห ซิห ตัก นังซือ ซันญา นัน เจ็นนัน นำ ก็ ซัห ซิห ตัก อัห วัล 20 นำ ก็ ไล อัห คือเน “เอิญ เอิด เมียม เน ซัห ซิห ตัก แป ก็ ระ แป เคาใจ เค็ย เอาซาง กิว ซันญา เคิบ แป แลว บัดนะ นำ ก็ แอง จู มบลึ ฮุน นำ ไล แป นัน” โมเซด ไล อัห จังนะ ตัก อิง กด เอาซาง 8:15 21 เจ็นนัน โมเซด ก็ เอิด เมียม ซัห ซิห ตัก พาเต็น วัล แลว นำ ซัห ตัก พาเต็น แลว นำ ก็ ซัห ซิห ตัก ซะ จู มบลึ ตี อุ ตัก พาเต็น นัน ซะ จู มบลึ ตี อัห เอิด แอง พิที อน เอาซาง นัน โมเซด ก็ ซัห ซิห เมียม มด 22 นังเลาะ แลว ซะไม กด โมเซด นัน อัห เอิด เมียม ซัห ซิห จู มบลึ บัก ซัง อัห เอิด ไจ แองกาน อน เอาซาง กุญ จู ลบ ตี เอาซาง ญ็อก แอ็ม ตี ลุห อัห นัน ก็ ต็อง มี ซะ เปิล ต็อง เซีย เมียม จู ลบ ซะลุบ แลว แญง ซันญา เครม ก็ ต็อง เซีย เมียม (แญง ซันญา แมะ ก็ ต็อง เซีย เมียม เมือนนอย) 23 พาเต็น ตัก โลก เน เคิบ ซะ จู มบลึ ตี อัห ไจ ตัก พาเต็น นัน ก็ เป็น พาบ วิฮาน เอาซาง ตัก ซะวัน ทึห นอ พาเต็น ตัก โลก เน ต็อง เซีย เมียม ซัด แอง ระ จู มบลึ เลาะ เล็ห ระ ไอ มี ตี ติ ตี คอล นัน แต ตัก ตี วิฮาน เอาซาง ตัก วาง นทึห นัน ก็ ต็อง ทวาย ซะ ตี เลาะ กวา เมียม ซัด วัล 24 เจ็นนัน เยซู คริด ไอ มี กุด ตัก ฮ็อง ซักซิด ตี ครำ แอ เน แอง ตี เป็น พาบ มาลือ นัน นำ กุด วิฮาน เอาซาง ตัก วาง นทึห ฮัก เป็น ตี อุ คอง เอาซาง ฮัก มานะ เน นำ อุ เลิม เคิบ เอาซาง นำ จ็อก เคิบ เอาซาง แตน ครำ แอ เน วัล 25 ทาเน เยซู ทวาย เมียม ออ มี ลบ เดียว ก็ ปอ นำ ไอ มี จำเป็น ทวาย ดก ลบ มอก ปึง มอ เอาซาง จ็อง ตัก โลก เน ปึง มอ เอาซาง จ็อง นัน อัห ต็อง เอิด เมียม แปะ เมียม แกะ ซับ ตัก ฮ็อง ซักซิด ทีซุด นัน จูวางๆ แต เยซู แอง มี ลบ เดียว ก็ ปอ แลว 26 กัน เยซู ต็อง แอง มอก อัห ตัก อิง นำ ก็ ต็อง เปิล ดก ลบ นำ ต็อง เปิล เจ็น ซะไม เอาซาง แอง โลก แพนซิก เตา มานะ เน แต มานะ เน ตัก ซะไม ซุดทาย เน นำ ก็ ทวาย นัง ออ แก แอ็ม ตี ลุห แอ มด จู มบลึ นำ เปิล มี ลบ เดียว นัน ก็ ปอ แลว 27 เอาซาง ระ ครำ แอ เน มด จู ล็อง ต็อง เปิล มี ลบ เดียว แอ เปิล แลว เอาซาง ก็ ตัดซิน แอ วัล 28 เยซู คริด ก็ เมือนนอย นำ เปิล นำ ทวาย นัง ออ อน เอาซาง เพือ ระ กุญ แก แอ็ม ตี ลุห แอ ดก ล็อง นำ เปิล มี ลบ เดียว ก็ แลว แอ็ม งิ แมะ บัดนะ นโดน นำ ก็ ลบ วัล โตะ ลบ นัน บัดนะ นำ ไอ มี โตะ แก ลุห เตาะ นำ โตะ จวย แอ ตี วาง เพา นำ อุ นัน ระ แอ ปน แอ็ม เจ็น เปิล ฮัก |
Global Partners
Global Partners