ตัวแทน 10 - Prai Bibleเปโตร เคิบ โคเนลีอัด 1 ทาเน ก็ มี ทฮาน มี ล็อง นำ ตัก อุ เมือง ซีซารียา ซือ นำ ตัก โคเนลีอัด นำ เป็น นายรอย ทฮาน นำ อุ ตัก คาย ทฮาน อีตาเลียน 2 นำ ก็ ทือ เอาซาง มด ตึง ครอบครัว นำ ก็ จวย ครำ ตุก ครำ ญาก ดก ล็อง นำ ก็ มัน ครอ วอน เอาซาง ซีเละ 3 มี ลบ นัน ปะมาน บาย ซาม โมง เน โคเนลีอัด ก็ เม็จ เทวาดา คอง เอาซาง โตะ ไล ออ นำ กิว เม็จ นัง เทวาดา นัน ซีเละ เทวาดา ล็อง นัน ก็ โตะ งกรอ นำ “โคเนลีอัด เฮย” เทวาดา อัง 4 โคเนลีอัด ก็ นทัน นเจิก ลด เงอ ดอม เทวาดา ล็อง นัน โคเนลีอัด ก็ ซ็วน จังเน “มัห อังวะ บ็อห งกีจ็อง” นำ อัง เทวาดา ล็อง นัน ก็ ซวัล นำ “เอาซาง เม็จจึด มัห จวย ครำ ตุก ครำ ญาก แลว มัห ครอ วอน นำ นำ ก็ เม็จ มด นำ ก็ ซวัล มัห มานะ เน ดาย 5 เจ็นเน มัห ต็อง ไล ลูกนอง ออ เริล และ ซีโมน เปโตร ตัก เมือง ยาฟา ดาย ไล อัห มพอล นำ โตะ แต็ห เน 6 เปโตร นัน นำ พัก อุ ตัก เจิง ซีโมน มี ล็อง วัล ซีโมน ล็อง นัน เป็น ซะลา ฟอก ซวัห ซัด ฮัก เจิง นำ อุ นดิ เปล นอก ทะเล นัน” เทวาดา อัง เจ็นนัน เทวาดา ก็ ทอก เริล แอ็ม ออ 7 ปน เทวาดา แลว โคเนลีอัด ก็ งกรอ ลูกนอง ออ เปียะ ล็อง เคิบ ทฮาน มี ล็อง นำ ไล อัห แพะ ล็อง นัน โตะ และ ออ ทฮาน ล็อง นะ นำ ก็ ทือ เอาซาง เน็ด เมือนนอย ทฮาน ล็อง นะ นำ ก็ ฮับไจ โคเนลีอัด นัน จู งิ 8 ทาเน โคเนลีอัด ก็ เลามุน เลือง ตี นำ เม็จ เทวาดา นัน อน อัห ปัง แลว นำ เลามุน อน อัห ปัง แลว นำ ก็ ไล อัห เริล เมือง ยาฟา อัห ก็ เริล 9 ฮุน งิ กรัก อัห ก็ บัก และ ติ โตะ ตัก เมือง ยาฟา แลว เปโตร ก็ อุ ตัก เจิง ซีโมน นัน ทาเน ก็ บัก และ เตียง แลว เปโตร ก็ ก็อห เริล ตัก จาด จัน ลัห ทึห นำ อง ครอ วอน เอาซาง ตัก นัน 10 ทาเน เปโตร ก็ โซะ จะ ญาม นัน ก็ พวม อัห แอง ซะ ป็อง อุ ลัห เซ็บ นำ ก็ เปิล เงอ เม็จ ซะ ตัก วาง ทึห 11 นำ ปัก เม็จ วาง นทึห พลาง อุ แลว ก็ มี ซะ อัง กัด มบอด จ็อง จูล เล็ห เจ็น วาง ตัก ทึห มี ทาล ท็อก มพล็อง มบอด นัน กวัด ตึง ซี แจง 12 ตัก มบอด นัน ก็ มี ซัด จู มบลึ เป็น เซ็ม เป็น แลน เป็น วะ ก็ มี มด 13 เจ็นนะ วัล เปโตร ก็ เม็จ แญง นะ ไล ออ ฮุนเน “เปโตร เฮย ร็อห เนอ มัห มเบิล ป็อง ซะเน ดาย” แญง นะ อัง 14 “ไอ เตาะ งกีจ็อง เฮย ซะ ตี มัห มบราง ป็อง นัน เอิญ ไอ มี เกย ป็อง เอิญ ไอ มี ตัน ป็อง ซัก มี ลบ ดาย” เปโตร อัง 15 แญง นะ ก็ ลบ ไล เปโตร คือเน วัล “ซะ ตี เอาซาง เค็ย เลาะ แลว มัห ก็ ป็อง กุญ ดาย กัน งกีจ็อง เค็ย เลาะ แลว ก็ อำ มัห เค็ย ไอ มี เลาะ เตาะ” แญง นัน อัง 16 เปโตร ตวด เม็จ ซะ แปลก นัน ตึง แพะ ลบ แลว ก็ ลด เญ็น งาล แอ็ม ตัก วาง นทึห ลด กด เอาซาง 11:1 17 ทาเน เปโตร ก็ ควะ กึด เลือง ซะ แปลก ตี นำ เม็จ นัน นำ ซงไซ เค็ย เลือง นัน ซีแล็ม เค็ย ซีวะ ญาม นำ ควะ กึด อุ นัน ก็ พวม โตะ ลูกนอง โคเนลีอัด ซ็วน และ เจิง ซีโมน อัห เม็จ เจิง ซีโมน แลว อัห ก็ ญ็อง อุ ตัก ปะตู งเกริก 18 อัห ก็ ซ็วน และ เปโตร “ซีโมน เปโตร อุ เจิง เน แมน อัน บ็อห” อัห อัง 19 ทาเน ญาม เปโตร ควะ กึด เลือง ซะ แปลก ตี นำ เม็จ เคิน นัน ซีมาล เอาซาง ก็ ไล นำ เค็ย “มี ครำ แพะ ล็อง โตะ และ มัห เซ็บ ดาย 20 มัห เจ็ย จูล และ อัห นเซ็บ ดาย เป็น เอิญ ไล อัห โตะ และ มัห ฮัก มัห เริล เคิบ อัห ติกๆ ดาย” ซีมาล เอาซาง อัง 21 เปโตร ก็ จูล โตะ ซ็วน อัห “แป โตะ และ เอิญ อังวะ บ็อห” นำ อัง 22 อัห ก็ ไล นำ คือเน “นาย รอย โคเนลีอัด ไล อิห โตะ และ มัห ดาย นำ เป็น ครำ เลาะ นำ ทือ เอาซาง ครำ ยิว อัห ก็ ทือ นำ อัห เค็ย นำ เป็น ครำ เลาะ เทวาดา คอง เอาซาง ก็ ไล นำ มพอล มัห โตะ แอว ออ ตัก เจิง ดาย นำ ซีรอก ปัง แญง มัห” ปึง ลูกนอง โคเนลีอัด อัง 23 เจ็นนัน เปโตร ก็ มพอล อัห แพะ ล็อง นัน โตะ ควังใน เจิง นำ มพอล อัห อวย มโบละ เคิบ ออ มี แจ็ล ฮุน งิ กรัก นำ ก็ เริล เลิม เคิบ อัห ควน นไจ ตี ทือ เยซู ตัก เมือง ยาฟา นัน อัห ก็ เริล เลิม เคิบ นำ แด 24 ฮุน งิ กรัก นัน วัล อัห ก็ เล็ห ตัก เมือง ซีซารียา โคเนลีอัด ก็ เพา อัห อุ นัน นำ ก็ มพอล ปึง ควน ปึง นไจ เคิบ เปือน นำ โตะ ตัก เจิง ออ มด อัห ก็ เพา เปโตร อุ นัน 25 โตะ เปโตร แลว โคเนลีอัด ก็ ทอก เริล และ นำ โคเนลีอัด ก็ คุกโคล ไว ตัก เจ็ง เปโตร 26 เปโตร ก็ ทาก ที นำ ร็อห “เอิญ เป็น ครำ พาลือ อำ จบ ไว เอิญ เตาะ” เปโตร อัง 27 เจ็นนัน ปาม ก็ จ็อก เคิบ นอย กุด ควังใน เจิง เปโตร ก็ เม็จ ดก ครำ เพา นำ อุ นัน 28 เปโตร ก็ ไล อัห ฮุนเน “แป ก็ เม็จ แลว นอ ครำ ยิว อิห เน กุด เจิง ครำ กรอก ซอ ไอ มี กุญ อิห อุ เลิม เคิบ อัหซอ ไอ มี กุญ เตาะ ลุห กด อิห นอ แต เอาซาง ไล เอิญ งิ นาน แลว ‘อำ มัห เค็ย อัหซอ ไอ มี เลาะ เตาะ’ เอาซาง อัง เค็ย เอิญ 29 อุ เจ็นนัน วัล ก็ มี ครำ โตะ และ เอิญ อัห ไล เอิญ โตะ และ แป เอิญ ก็ โตะ ไอ มี คัด แญง อัห เตาะ แต เอิญ ครอ ซ็วน แป วาล ดาย แป มพอล เอิญ โตะ อังวะ บ็อห” เปโตร อัง 30 โคเนลีอัด ก็ ซวัล เปโตร จังเน “งิ นาน มอก นะ ซะ มี ครำ มี ล็อง โตะ และ เอิญ เอิญ ก็ กำลัง ครอ วอน เอาซาง อุ ทาเน ก็ ปะมาน ซาม โมง เน เอิญ ก็ ปัก เม็จ ล็อง นะ ญ็อง อุ เคิบ มัด ออ นำ จึห โกบ พัห ซัล เซ็ล รับๆ 31 นำ ก็ ไล เอิญ คือเน ‘โคเนลีอัด เฮย เอาซาง เม็จ แญง มัห ครอ เคิบ ออ แลว เอาซาง เม็จ มัห จวย ครำ ตุก ครำ ญาก วัล เอาซาง ก็ ดอม เค็ย มัห เลาะ ซีเละ 32 มานะ เน มัห ต็อง ไล ลูกนอง ออ เริล เมือง ยาฟา มัห ต็อง ไล อัห เริล และ ซีโมน ตัก อัห เค็ย เปโตร นัน นำ พัก อุ ตัก เจิง ซีโมน ซะลา ฟอก ซวัห ซัด เจิง นำ อุ นดิ เปล นอก ทะเล’ ล็อง นัน ไล เอิญ คือนะ 33 นำ ไล เอิญ คือนะ แลว เอิญ ก็ ลด ไล ลูกนอง ออ เริล และ มัห มานะ เน มัห ก็ โตะ ตัก เน แลว นอ อิห เพา ปัง แญง มัห นะ งกีจ็อง ก็ อุ เคิบ แอ แลว นอ งกีจ็อง ไล มัห จังนัก มัห ก็ ไล อน ตัก อิห นทึห เตาะ ดาย” โคเนลีอัด ไล เปโตร จังนะ เปโตร จ็อก เคิบ ควน นไจ โคเนลีอัด 34 เจ็นนัน เปโตร ก็ ตัง เกา ไล อัห คือเน “เอิญ เคาใจ แลว ดาย เอาซาง ไอ มี เลือก มัด อีเอ เตาะ 35 ครำ กรอก นเดย ก็ ตึก กัน อัห แอง เลาะ แอง ซือ กัน อัห ทือ เอาซาง กัน อัห แอง ซะ ตี เอาซาง ปอใจ นัน เอาซาง ก็ ปอใจ อัง อัห เมือนนอย มด 36 กำนา เอาซาง ก็ ไล คาว เลาะ เน อน ตัก กรอก อิซราเอล อิห เน แลว นำ เค็ย เยซู เป็น งกีจ็อง คอง ครำ แอ เน มด จู ล็อง เอาซาง ระ แอ อุ เลาะ อุ ซุก เคิบ ออ กุญ ก็ ญอน เยซู คริด นัน ฮัก เลือง เน แป ก็ เม็จ แลว นอ กด ลบ ซอง 10:17 37 จู เลือง ตี เกิด เล็ห ทัว จังวัด ยูเดีย นัน แป ก็ เม็จ มด แลว นอ เกาตีนา นัน เลือง เน ก็ เกิด เล็ห ตัก จังวัด กาลิลี วาล ยอน ก็ แอง พิที จุบ นอก อน อัห นอ แทะ นัน วัล เลือง เน ก็ แปร เริล ทัว จังวัด ยูเดีย มด 38 เป็น เลือง เยซู ครำ นาซาเร็ด นัน เอาซาง ก็ อน แร็ง ออ ตัก นำ เอาซาง อน ซีมาล ออ ตัก นำ นำ ก็ มี แร็ง ดก ซีเละ นำ เริล พานเดย นำ ก็ แอง แต ซะ เลาะ อน อัห ทัว มด นำ เม็จ ปรอง ซาตาน กุด เอา นเดย นำ ก็ มบรึห แอ็ม ระ อัห เลาะ เล็ห มด เยซู แอง กุญ มด ญอน เอาซาง อุ เลิม เคิบ นำ ซีเละ ดาย 39 ซะ ตี นำ แอง นัน อิห ก็ เม็จ เคิบ มัด เคิบ มุห ออ มด นำ แอง ซีวะ ตัก ปะเทด อิซราเอล อิห ก็ เม็จ มด นำ แอง ตัก เมือง เยรูซาเล็ม อิห ก็ เม็จ มด แต อัห ก็ ซำ วัล มเบิล แอ็ม นำ อัห เอิด เล็กจำ มพำ ซิห นำ ตัก งกรัง 40 แพะ งิ เจ็นนัน วัล เอาซาง ก็ พร็อห นำ ระ นำ รีด เล็ห วัล แลว นำ ก็ มแบละ นัง ออ ระ อิห เม็จ วัล 41 แต ไอ แมน เอาซาง ระ จู ล็อง เม็จ นัง ออ ดาย แต นำ เลือก เอิด อิห เน แลว ระ อิห เม็จ ออ ฮัก แลว นำ เปิล ลบ วัล รีด เล็ห วัล อิห เน ก็ กุญ ป็อง จะ เลิม ออก เลิม เคิบ นำ วัล จุม อิห เน ตี นำ ระ เม็จ นัง ออ ฮัก 42 เจ็นนัน นำ ก็ ลด ระ อิห เน ไล เลือง นำ อน ตัก อัห ปัง มด ระ อัห เม็จ เค็ย เอาซาง ตัง ระ เยซู เน เป็น ครำ ตัดซิน ครำ ใน โลก เน มด ฮัก ครำ รีด ครำ เปิล ก็ นำ เป็น ครำ ตัดซิน มด ฮัก 43 ตัก อิง ลาม เอาซาง ก็ เพีย ไล อน เลือง เยซู นัน แลว ลาม มด จู ล็อง ก็ เค็ย เอา นเดย ตี เจือ เยซู นัน เอาซาง ก็ ญ็อก แอ็ม ตี ลุห อัห ระ อัห ปน แอ็ม เจ็น โทด นัน มด อัห ปน เจ็น โทด กุญ ก็ ญอน แร็ง คอง เยซู นัน ฮัก” เปโตร อัง ซีมาล เอาซาง โตะ อุ เคิบ ครำ กรอก ซอ 44 ญาม เปโตร ควะ จ็อก อุ เคิบ อัห นัน ก็ พด โตะ ซีมาล เอาซาง เจ็น วาง ทึห โตะ อุ เคิบ ปึง อัห ตี ปัง แญง เปโตร อุ นัน 45 ครำ ยิว ตัก ทือ เยซู ตี โตะ เลิม เคิบ เปโตร นัน อัห เม็จ เอาซาง อน ซีมาล ออ ตัก ครำ กรอก ซอ ตี ไอ แมน ครำ ยิว นัน อัห ก็ ญ็อก งึด มด 46 ครำ ยิว เม็จ ครำ กรอก ซอ จ็อก แญง อัหซอ กุญ เม็จ อัห ลือ เอาซาง อุ วัล ครำ ยิว ก็ งึด ซีเละ เปโตร ก็ ไล เปือน ฮุนเน 47 “ปาโท็ห ครำ ปึง เน อัห ก็ มี ซีมาล เอาซาง โตะ อุ เคิบ อัห แลว นำ โตะ อุ เคิบ อัห มอก นำ โตะ อุ เคิบ แอ กำนา นัน นอ กัน อัห แอง พิที จุบ นอก ก็ ไอ มี เลาะ แอ มบราง อัห เตาะ ดาย” เปโตร อัง 48 เจ็นนัน เปโตร ก็ ไล อัห ตี เจือ เยซู แมะๆ นัน แอง พิที จุบ นอก ใน ซือ เยซู คริด อัห ก็ ลด มพอล เปโตร อุ เคิบ ออ เปียะ แพะ งิ วัล |
Global Partners
Global Partners