1 โคริน 12 - Prai Bibleซีมาล เอาซาง อน เกียด ตัก เยซู 1 ควน นไจ เฮย เลือง ครำ ตี มี ความ ซามาด ตี ซีมาล เอาซาง อน ตัก อัห นัน ซีมาล เอาซาง จวย อัห แอง ดก มบลึ ตัก คริซจัก แป นัน แป ก็ ซ็วน เอิญ เลือง เน แลว นอ เลือง ความ ซามาด ตี อัห มี นัน เอิญ ก็ ซีรอก ระ แป เคาใจ เลาะๆ ดาย 2 แป ก็ เม็จ แลว นอ กำนา วาล ไอ มี ตัน แป เม็จจึด เคิบ เอาซาง นัน ก็ มี ซะ ดก มบลึ จุ แป ตลอด นอ เย็ห วาง ซับรวง แป ทือ ฮูบ ทือ พะ ตี จ็อก ไอ มี กุญ 3 เจ็นเน ก็ ครอ อำ ระ เย็ห จุ ซับรวง แป วัล ดาย ครอ ระ แป เคาใจ เค็ย ครำ ตี จ็อก ตัก คริซจัก นัน อัห กิว มี ซีมาล เอาซาง ซับรวง อัห อัน มี ลู ไอ มี นัน แอ เม็จจึด จังนัก ก็ แอ ต็อง ปัง ตัก อัห จ็อก กัน ล็อง นเดย จม แจง เยซู จ็อก ไอ มี เลาะ ซิห เยซู ล็อง นัน ไอ มี ซีมาล เอาซาง อุ เลิม เตาะ แต ล็อง นเดย ตี เค็ย เยซู เป็น งกีจ็อง คอง ออ ล็อง นัน กิว มี ซีมาล เอาซาง อุ เลิม กัน มี ครำ จ็อก ตัก ตี พซุม คอง แอ แอ ก็ เม็จ ตัก อัห จ็อก นัน ซีมาล เอาซาง อน ความ ซามาด ตัก แอ 4 เลือง ซีมาล เอาซาง อน ความ ซามาด ตัก แอ นัน ซีมาล เอาซาง อน ตัก แอ ไอ มี เมือนนอย เตาะ นำ อน ความ ซามาด ตัก แอ เอา นเดย เอา นัน ฮัก แลว แต นำ ซีรอก อน แต เป็น ซีมาล เอาซาง มี ล็อง เดียว นัน อน 5 เลือง แอ ฮับไจ เอาซาง ก็ มี ดก มบลึ ไอ มี เมือนนอย แต แอ ฮับไจ งกีจ็อง มี ล็อง เดียว นัน 6 เอาซาง แองกาน ใน ใจ แอ ไอ มี เมือนนอย เตาะ แต เป็น เอาซาง มี ล็อง เดียว นัน ตี แองกาน ใน ใจ แอ มด จู ล็อง ซีมาล เอาซาง อน ความ ซามาด เพือ จวย คริซจัก 7 ตี ซีมาล เอาซาง อน ความ ซามาด ตัก แอ เอา นเดย เอา นัน ก็ เพือ ระ เป็น ปะโยด อน ตัก คริซจัก 8 ซีมาล เอาซาง อน ความ ซามาด ตัก แอ ไอ มี เมือนนอย ซีมาล เอาซาง นำ ก็ ระ แกด ล็อง มี ปันญา จ็อก เลาะ มี เฮดพน จางรู อัห จ็อก นำ ก็ ระ แกด ล็อง มี ความ ซามาด ไล เลือง เอาซาง ตี นำ เม็จ นำ ไล อน ตัก อัห 9 ซีมาล เอาซาง ก็ ระ แกด ล็อง แก็นใจ เจือ ซีเละ แกด ล็อง นำ ก็ ระ มี ความ ซามาด รักซา ครำ โซะ ระ งาล 10 ซีมาล เอาซาง ก็ ระ แกด ล็อง แอง ซะ แปลก กุญ นำ ก็ ระ แกด ล็อง เก็ง ไล แญง เอาซาง อน อัห นำ ก็ ระ แกด ล็อง เม็จจึด ซะ ตี อัหซอ ไล นัน ซะ นเดย ตี ซีมาล เอาซาง ซับรวง อัห จ็อก นำ ก็ เม็จ ซะ นเดย ตี ปรอง ซับรวง อัห จ็อก นำ ก็ เม็จจึด ซีมาล เอาซาง จวย นำ เม็จจึด อัน นเดย เลาะ อัน นเดย ไอ มี เลาะ ซีมาล เอาซาง ก็ ระ แกด ล็อง จ็อก แญง อัหซอ กุญ เป็น แญง ตี อัห ไอ มี ตัน เกย นเจ็น นัน นำ ก็ ระ แกด ล็อง จวย แปล แญง อัหซอ นัน กุญ 11 ความ ซามาด จู มบลึ เน ก็ เป็น ซีมาล เอาซาง มี ล็อง เดียว นัน ฮัก อน ตัก แอ นำ อน ตัก แอ จู ล็อง มบลึ นเดย มบลึ นัน ฮัก แลว แต นำ กึด อน ฮัก 12 ครอ ยก ตัวยาง ตัก นัง ครำ แอ เน ดาย ตัก นัง แอ เน มี ดก มบลึ แอ มี ที มี ลา มี มัด มี มุห จู มบลึ เน ก็ ไอ มี เมือนนอย นอ แต จู มบลึ ตัก นัง แอ เน ก็ เป็น มี นัง เดียว นัน นัง เยซู คริด ก็ มอก นัน มี ครำ ดก มบลึ เป็น นัง เยซู เลิม แอ จู ล็อง ก็ เป็น นัง เยซู มี นัง เดียว นัน 13 ครำ ยิว ก็ มี ครำ กรอก ซอ ก็ มี ครำ เป็น ทาด อัห ก็ มี ครำ อิซระ ตัก ไอ แมน เป็น ทาด ก็ มี ซีมาล เอาซาง ก็ เอิด แอ จู ล็อง รอม นอย ระ เป็น นัง เยซู นัน เป็น งาน ซีมาล เอาซาง แอง แอ จู ล็อง ก็ มี ซีมาล เอาซาง มี ล็อง เดียว นัน 14 ตัก นัง แอ เน มี ดก มบลึ นอ แอ มี ที มี ลา แอ มี มัด มี มุห มี ดก มบลึ ตัก นัง แอ นอ จู มบลึ นัน ไอ มี เมือนนอย แต เป็น มี นัง เดียว นัน 15 กัน เจ็ง จ็อก เค็ย “เอิญ เป็น เจ็ง พาลือ เอิญ ไอ แมน เป็น ที เอิญ ก็ ไอ แมน เป็น คอง นัง เน เตาะ” กัน เจ็ง จ็อก จังเน ก็ ไอ มี จบ แคระ เตาะ เพาะวา เจ็ง ก็ เป็น คอง นัง แอ เน อุ แลว ซำคัน เตา นอย 16 กัน นโทล จ็อก เค็ย “เอิญ เป็น นโทล พาลือ เอิญ ไอ แมน เป็น แก็น มัด เอิญ ก็ ไอ แมน เป็น คอง นัง เน เตาะ” กัน นโทล จ็อก จังเน ก็ ไอ มี จบ แคระ เตาะ เพาะวา นโทล ก็ เป็น คอง นัง แอ เน ซำคัน เตา นอย 17 จู มบลึ ตัก นัง แอ เน ก็ เป็น มี นัง เดียว นัน แต กัน นัง แอ เลอะ เป็น แก็น มัด มด แอ ก็ ไอ มี เม็จ นเซิง ซีวะ กัน นัง แอ เลอะ เป็น นโทล มด แอ ก็ ไอ มี เม็จ งกอด ซีวะ จู มบลึ ตัก นัง แอ เน ก็ ซำคัน เตา นอย มด 18 ทาเน เอาซาง แอง จู มบลึ ใน นัง แอ นำ ก็ แอง ระ เป็น ระเบียบ ตาม กำกึด ออ ฮัก 19 กัน นัง แอ เน เลอะ เป็น มี มบลึ เดียว นัน แอ ก็ ไอ มี เป็น นัง ครำ เตาะ 20 มี ดก มบลึ ตัก นัง แอ เน นอ แต เป็น มี นัง เดียว เลิม นัน 21 ทาเน แอ ก็ ต็องกาน มี จู มบลึ ตัก นัง แอ นอ กัน แก็นมัด ไล ที เค็ย “เอิญ ไอ มี ต็องกาน มัห” ก็ ไอ มี จบ แคระ กัน กึ ไล เจ็ง เค็ย “เอิญ ไอ มี ต็องกาน มัห” ก็ ไอ มี จบ แคระ วัล จู มบลึ ตัก นัง แอ เน ก็ ซำคัน เมือนนอย มด จู ล็อง ตัก คริซจัก ก็ ซำคัน เมือนนอย มด 22 ครำ แอ เน ซอบ เอิด ใจ ซิห นัง ออ จู มบลึ นอ มบลึ นเดย ตี แอ กึด เค็ย แมด ก็ เป็น ซะ ตี จำเป็น ทีซุด วัล คาด ไอ มี กุญ เตาะ 23 ซีวะ ตี แอ กึด เค็ย ไอ ปอ มี เกียด แอ ก็ เอิด ใจ ซิห พิเซด วัล ซะ ตี แอ กราญ ระ อัห เม็จ แอ ก็ เฮง อน เกียด วัล แอ ปอก แอ นเดิด ระ อน ไอ มี ระ ซีเอ เม็จ 24 แต ซะ ตี เลาะ ดอม อุ แลว แอ ก็ ไอ มี จำเป็น แอง จังนัน จังเน วัล เตาะ เอาซาง แอง ระ นัง แอ เน มี ที มี ลา มี มัด มี มุห มี ดก มบลึ เน เอาซาง ก็ แอง ระ เป็น ระเบียบ ระ เลาะ เตา นอย มด แลว ซีวะ ตี ไอ ปอ มี เกียด นำ ก็ ระ มี เกียด ดก วัล 25 นำ แอง จู มบลึ ใน นัง แอ เน ระ จู มบลึ ไอ มี ลุห อัง นอย นำ แอง ระ จู มบลึ ดอม นอย จวย นอย มด 26 กัน มี มบลึ นเดย โซะ ก็ เลอะ โซะ มด ตึง นัง กัน มบลึ นเดย กุญ เกียด ก็ เลอะ เลาะใจ มด ตึง นัง เอาซาง ระ นัง แอ เป็น มอก เน 27 ทาเน นัง เยซู คริด ก็ เมือนนอย แอ จู ล็อง จู นัง ตี เจือ ก็ เป็น นัง คอง เยซู คริด มด แอ แต ละ ล็อง ก็ เป็น ที เป็น ลา เป็น มัด เป็น มุห คอง นำ มด ซำคัน เมือนนอย มด 28 แต เอาซาง ระ แอ จู ล็อง ใน คริซจัก มี นาตี ไอ มี เมือนนอย แกด ล็อง นำ ระ เป็น ตัวแทน คอง ออ แกด ล็อง นำ ระ เป็น ลาม เอาซาง แกด ล็อง นำ ระ อัห ไล แญง เอาซาง แกด ล็อง นำ ระ แอง ซะ แปลก กุญ แกด ล็อง นำ ระ รักซา ครำ โซะ กุญ แกด ล็อง นำ ระ เก็ง จวย อัห แกด ล็อง นำ ระ เป็น ปึง อัหแกะ ซับรวง คริซจัก แกด ล็อง นำ ระ จ็อก แญง อัหซอ ตี อัห ไอ มี เกย นเจ็น 29 เอาซาง อน ความ ซามาด ตัก แอ ไอ มี เมือนนอย เตาะ ควน นไจ เฮย ไอ แมน จู ล็อง เป็น ตัวแทน เยซู กุญ ไอ แมน จู ล็อง เป็น ลาม เอาซาง กุญ ไอ แมน จู ล็อง เป็น ครำ ไล แญง เอาซาง กุญ ไอ แมน จู ล็อง แอง ซะ แปลก กุญ 30 ไอ แมน จู ล็อง รักซา ครำ โซะ กุญ ไอ แมน จู ล็อง จางรู จ็อก แญง อัหซอ ตี อัห ไอ มี เกย นเจ็น ไอ แมน จู ล็อง จางรู แปล แญง นัน กุญ เอาซาง อน ความ ซามาด ตัก แอ ไอ มี เมือนนอย ซีเละ ดาย 31 ความ ซามาด จู มบลึ ตี เอาซาง อน แอ เน ก็ ซำคัน เตา นอย มด แต ไอ แมน แอ จู ล็อง มี ความ ซามาด จู มบลึ เน นอ แอ กุญ ความ ซามาด มี ยาง มี ล็อง ฮัก แต ครอ ระ แอ โซะ กุญ ความ ซามาด ตี เป็น ปะโยด อน ตัก คริซจัก ตี ระ คริซจัก เฮง จเริน นัน ความ ซามาด เน เลาะ ซีเละ เจ็นเน ก็ ครอ ระ แป เม็จจึด แอง จังนัก ซัง เลาะ ทีซุด ดาย |
Global Partners
Global Partners