Wikhikən 9 - Wikhikәn 2014

¹ Pemihat onəmiyal oskitapiyəl nehkahpelicil tanil nekapilitsəpənil nemikosilihte.

² Tanik wetəkehkimocik ohəkek opapehcimawal Sesohsəl: Nsakəmamən, wen milkamikasits, wət skitap, kesəna onikihko, otəlinəmikosin onehkapin?

³ Sesohs asitewtəm: otoskitap skat milkamikasiwis, kesəna onikihko; kenok Kelowəsit otəlohkewakənəl limoskehtaso ohəkek.

⁴ Ntacowiyəlok otəlohkewakənəl tan petəkimitpən, tan kwenicehkwək. Nipayiw weckowihak tan toci skat wen kislokekw.

⁵ Tan kwenihiyi skitkəmikw nil opəshakwhekəm skitkəmikw.

⁶ Kisi itək nihtəl əsomskwe kətakəmikok, ocitonkwahkwəlonskw osəsokow ikək, osonehtowan nekapilicil osiskok kwahkwəlonskwol.

⁷ 'Tiyal: Ŭlih kəsikwens pekotepeyakek Silomk, tan kwelpiwiktasik itəmowiw: Elkimot. Nit tehc macəhat ksəsikwenso; toci apacihat, nəmihta.

⁸ Nit tehc mawikemacihi, tanik nemihatpənik təmk otətlipakowəsilin, itəmok: Skat ihiw wət nət tan ehpit pakowəsit?

⁹ Ankwoc itəmok: Nət nekəm. Kətəkik itəmok: Otəlkwinakwsin. Nekəm itəm: Nil nət.

¹⁰ Nit tehc 'tiyawal: Tan nali kisi pantehtaso ksiskol?

¹¹ Nekəm asitewtəm: Oskitap liwiha Sesohs okisi halkwahkwəlonskwol, ənsonehtakonepənil nsiskok, ntihokon, əli pekotepeyakek Silomk kəsikwens. Toci ntəlihaneyehpən, nkəsikwensihpən, nəmihtahpən.

¹² Nekəmaw 'tiyawal: Tama iyo nekəm? Itəm: Kətama nkəcicihao.

¹³ Opeciphawal Palosi ewoltilit tanəl nekapilitpənil.

¹⁴ Atəlahsimowikiskwəkiwopən tan toci Sesohs kisihat kwahkwəlonskwol pantehtowat osiskol.

¹⁵ Nit tehc Pelosiyək apc papehihimatit tan otəlimsənəməlin elinəmihtalit. 'Tiya: Oponehlapənil kwahkwəlonskwol nsiskok, nkəsikwensihpən, nəmiht.

¹⁶ Nit tehc ankwoc Palosiyək itəmotowək: Wət skitap skat oceyawiw Kelowəsit ikək, ipəcəl atəlahsimowikiskwək skat okəlnəmowən. Ankwoc itəmotowək: Tanəp otəlikisehton nit telikəl kinowaskoltikənəl skitap lahkamiksowin? Sisehlotowakən ikehe ohəkewikhowak.

¹⁷ 'Tiyawal apc nekapilitpənil: Kil kekw ktəlima, ipəcəl pantehtakonəl ksiskol? Itəm: Asəkintatowin.

¹⁸ Kenok Leswihsək skat olamsətəmoniya onehkapilines oməsənəməlin onəmitalin, akimte wikwimawa onikihko tan oməsənəməlin onəmitalin.

¹⁹ Papehihimawa: Wət kilowaw kwəssowa tan itəmekw nkapos nemihkwosit? Nitəl tan otəlikisinəmihtan təlec?

²⁰ Onikihko 'tasitemawa itəmok: Nkəcicihtonen nokwəssinen wət ənkapopən nemihkwosit;

²¹ Kenok tan otəlikisinəmihtan təkec skat nkəcicitonewin, kesəna wen pantehtowat osiskol skat nkəcicihawin. Nekəm kisiko; papehcimok nekəm. Nekəm kəlositəmowewsoc.

²² Yohtəl kəlosowakənəl itəmoticil onikihko, ipəcəl onəkalawa Leswowis. Ipəcəl Leswihsək okislotəməniya tan tepəkt wen sahpakənotək Sesohs Oniweskowin ocinotephap himiyewikwamək.

²³ Nit tehc onikihko itəmok: Nekəm kisiko; nekəm papehihimok.

²⁴ Nit tehc nit nisewe wihkwimatit skitapiyəl tanil nehkapilitpənil, 'tiyawal: Kelowəsit milan kcitəmi təhamkosowakən: nkəcicihtonen wət skitap lahkəmiksowinowiw.

²⁵ Nit tehc itəm: Skat nkəcicihaw otəlakəmiksowinowin. Peskonəlo kecicihto: nil nekapihpən; kenok təkec nəmiht.

²⁶ Toci apc otcawal: Tan ktəlehlokones? Tan ktəli kisipantehtakones ksiskol?

²⁷ Asitemat: Kis kisi iyalolniyapən, skat knotəmohtipakopən. Tanəp apc ktəliciksetəməniya? Kpawatəməniya ktəkehkimkoniya?

²⁸ Ŭnotalmimaniya itəmok: Kil ktəkehkiməkw; kenok Mowis ntəkehkimkon nilon.

²⁹ Nkəcicihtonen Kelowəsit oskowimapənil Mowisəl; kenok wət skitap skat nkəcicihawin tan tet weceyawit.

³⁰ Nət skitap asitewtəm: Asəkinakwot skat kilowaw kəcicitoniya tan weceyawit, npantehtakonəl nsiskol.

³¹ Kəcicitonen Kelowəsit skat awciksətowawi lahkəmiksowino; kenok tan wen wikowaci wihwinowamat Kelowəsitəl, əlehtaket olitahatəmowakən, nekəm Kelowəsit ociksətowal.

³² Tanek kisitasikpən skitkəmikw mehc meskw notəmawən wen pantetowan wen osiskol tanil nit elinəmihkwəsilit onehkapilin.

³³ Skat nekəm ocihakosəpən Kelowəsit ikək, skatəp kekwse kisi lehtakawəp.

³⁴ Nekəmaw 'tiyawal: Kil nekawhciwnəmikosiyəpən lahkəmiksowakən ikək, əktəkehkimihpən nilon? Toci ontiyakaniyal.

³⁵ Sesohs notəmat ontiyakaniyal, meskowat, 'tiyal: Kolamsətəmən Kelowəsit 'Kwəssəl ohəkek?

³⁶ Asitemat: Wen iyo nekəm, Nsakəmam, nolamsətəmən ohəkek?

³⁷ Sesohs 'tiyal: Knəmiyapən, nət nekəm weskowiməsk.

³⁸ Itəm: Nsakəmam, nolamsətəmən. Wihwinowamal.

³⁹ Sesohs itəm: ətplotəmowakən weci pəkəciyaw skitkəmikw, welaman tanik skat nemihitatikwik onəmihtaniya; tanik nemihtaticik onəka pikwehtasoltiniya.

⁴⁰ Ankwoc Palosiyək tanik wiciyewacik notəməniyal yohtəl kəlosowakənəl, 'tiyawal: Nilon na nehkapoltihpən?

⁴¹ Sesohs 'tiya: Nkapoltiyekw, skatəp lahkəmiksowakən ktewltiwniyal. Kanokəlo tahkec ktitəmotihpa nəmihtatihpən. Nit tehc ktəlkəmiksowakənowal ənkesik.