Wikhikən 8 - Wikhikәn 2014

¹ Sesohs əlihe wocok tan liwiso Olipiye.

² Ehcehkwak, ospaswiw apc pəkətiye kci himiyewikwamək. Msiw pəmawsowinowək petapasiniyal. Sesohs həpesso, otəkehkima.

³ Notowikhikhəticik naka Palosiyək otəliphawal ehpilicil tan eyilit, tanil liwihkwehla wapələlohkewakənək, toci osahkelaniya epahsiw.

⁴ 'Tiyawal: Notəkehkikemit, wət ehpit kisiwihkwehla wapələlohkewakən ikək; limskowah otapcilokan.

⁵ Nit Mowis təlitplomkonopən ətplotəmowakən ikək nit elewolticik pənapskwahapənikp. Kenok kil kekwtitəm?

⁶ Weci nit itəmotit otokwetskolawal, witaman oliyeniyac kekwse weci kisimsihatit. Kenok Sesohs citowamkweso, otəlowikənilc ewikhikəhtakw ktakəmikok.

⁷ Elinkohci papehcimatit pehkahkwikapoweso, 'tiya: Nət kilowaw tan skat lahkəmiksowakən ehtikw, nət təmkewe pənapskw təkəmac!

⁸ Toci apc Sesohs citowamkweso, ewikhikəhtakw ktakəmikok.

⁹ Nekəmaw notəmotit, weci onmacit pəlomot oməshono wawikowak, ntiyapasowək, eyankohci ntiyapasowək tan elikətənhətihtit. Sesohs ənkikanəkəla, naka ehpit sehke epahsiw.

¹⁰ Toci Sesohs pehkahkwikapowesit, kətama wenil onəmiyawiyəl tepəkt ehpilicil, toci 'tiyal: Ehpit, tan otəlesoltiniya wehketkək mesimskəpənik? Kətama wen konmacitplomko?

¹¹ Ehpit itəm: Kətama wen Nsakəmam. Sesohs 'tiyal: Nil skat konmacitpəloməlo. Macəha, skat apc milkəmiksowən.

¹² Nit tehc Sesohs apc okəlolah pəmawsowino, itəm: Nil pəssakwekəm skitkəmikw. Nekəm tan nosokowit skat pəmihewoc piskahtek. Kenok otiyinc pəmawsowakəne pəssakwek.

¹³ Nit tehc Palosiyək 'tiyawal: Kil knəspiwolamewos. Kənəspiwəlamewakən skat əleyiw.

¹⁴ Sesohs 'tiya: Cikaw nil nspiwolamewosiyan nəspiw olamewakən əlihe. Ipəcəl nkəcicihton wecihayanpən, tan elihaye. Kenok kilowaw skat kəcicihtoniya tan wecihayanpən, kesəna tan elihay.

¹⁵ Kilowaw wecitplotəmotiyekw mhəkek nil skat ntəpəlomaw wen.

¹⁶ Təpəlotəmanəp ntəplotəmowakən olamewiw. Ipəcəl skat npeskowiw, kenok nil nti naka Nmihtakws tan petəkimitpən nwiceyakw.

¹⁷ Elowikhaso ktəpəlotəmowakənowak: Nisowək pəmawsowinowək onəspiw olamewakənowal əlihi.

¹⁸ Nil nəspiwolamewos, naka Nmihtakws tan petəkimitpən nəspiwəlamewəkw.

¹⁹ Nit tehc otcawal: Kmihtakws tama iyo? Sesohs asitewtəm: Kilowaw kətama kəcicihipa nil kesəna skat kəcicihawihwa Nmihtakws. Kəciciyekwsəpən nil, kəcicihawapənə Nmihtakws.

²⁰ Ihla Sesohs etli itəkil nihtəl kekwseyal manikwamək; etlikehkihkemit kci himiyewikwamək. Kenok skat wen otakwonawiyəl; ipəcəl otepənaskowihakeweyam mehc meskw ikehew.

²¹ Nit tehc Sesohs apc 'tiya: Nil nmacəha, kilowihipac, kenok klakəmikso akəni mehcin hətipac; tan tet elcay skatəc kisi pitapasiyoniya.

²² Nit tehc Leswihsək itəmotowək: Napəhosoc? Ipəcəl itəm. Tan tet elcay skatəc kisi pitapasiyoniya.

²³ Sesohs 'tiya: Kilowaw ktətlewawoltipa emekew. Nil spəmək ntətlewaw. Kilowaw skitkəmikw ktətlewawoltipa. Nil skat skitkəmikw ntətleyawiw.

²⁴ Nit tehc yoholekw klahkəmiksowakəni mehcinhətipac. Ipəcəl skat wəlamsətəmowekw nil nət, klahkəmiksowakəni mehcinhətipac.

²⁵ Nit tehc 'tiyawal: Wen kil? Sesohs 'tiya: Nit tan amskwahs macehak yoholekwpən.

²⁶ Ktanakətol kekwseyal eyanil elakəni mlekwil, ktəpəlomələniya; kenok Nekəm tan petəkimitpən welamewakənit, tanil wici notəmanil ohəkek, nihtəl etli itəmanil skitkəmikw.

²⁷ Nekəmaw skat onəstəmoniya otakənotəmakoniya oci Mihtakwsilicil Kelowəsitəl.

²⁸ Nit tehc Sesohs 'tiya: Tan toci kisi onakelekoc pəmawsowin 'Kwəssəl kəcicitoniyac nil nət, skat kekw noci kisehtowən nil nhəkek; kenok Nmihtakws elkehkimitpən nit elewestowanil yohtəl kekwseyal.

²⁹ Nekəm tan petəkimitpən nisewawtihpən. Nmihtakws skat nəkələko nkətəkayw, ipəcəl mecimiw ntəlokanəl tanil elolitəhatəkil.

³⁰ Tan toci Sesohs itək yohtəl kekwseyal ktanakwsowək olamsətəmotowək ohəkek.

³¹ Nihtəc Sesohs 'tiya Leswihs tanihi olamsətəmotilicihi ohəkek: Kilowaw nkesoltiyekw nkəlosowakən ikək, olamewakən ikək kotəkehkimkwəs soltipac nhəkek.

³² Kəcicitoniyac olamewakən, olamewakən ktəlehləkoniyac ktəpelməsoltipa.

³³ Otasitemawal Nilon Aplahamk onican, mehc meskw noci wehkanwoltipən tan wen: kikwse weci itəmən: Ktəpelməsoltipac?

³⁴ Sesohs 'tasitema: Leyo, yoholekw, msiw wen tan lahkəmiksowakən eloket, nit lahkəmiksowakəni nowawket.

³⁵ Nətloket skat iyew wenocikwamək mecimiw; kenok Kelowəsit 'Kwəssəl mecimiw eynəl.

³⁶ Nit tehc Kelowəsit 'Kwəssəl ktəpelməsoltiniyac, kolamewitpeləməsoltipac.

³⁷ Kəciciholpa kotapeksihpa Aplahamk; kenok ktəkweci nehpihihpa, ipəcəl nkəlosowakən skat iyew khəkewak.

³⁸ Nosko wotəmən tan kekwse weci nəmihitowanpən Nmihtakws; naka kilowaw na ktəlehtakhətiniya. Tan ilinotəmekwpən kmihtakwsowa.

³⁹ 'Tiyawal: Nilon Aplaham nmihtakwsən. Sesohs 'tiya: Aplaham omitakwseyekw, Aplaham otəlohkewakənəl ktəlokhətiniyapənilp.

⁴⁰ Kenok təkec ktəkwecineyepihihpa, skitap tan yəholakwpən olamewakən. Aplaham kətama təlokawnewihpən nit.

⁴¹ Kilowaw ktəlokhətiniya kmihtakwsowa otəlohkewakənəl. Nekəmaw yahahtit, itihawal: Skat nsekewiwhskicino oltihpən. Piskowiw nmihtakwsən, Kelowəsit nət.

⁴² Sesohs 'tiya: Kelowəsit kmihtakwsowa kəselmihpap. Ipəcəl nocihahpən Kelowəsitow ikək, npəkəcihahpən, nil skat npetəkimsiw, kenok Kelowəsit petəkimitpən.

⁴³ Kekw weci skat nsətəmowekw nkəlosowakən? Ipəcəl skat knotəmoniya tan ntitəm.

⁴⁴ Kilowaw ktəleyoltipa kəmihtakwsowa məcəhantok, naka kəmihtakwsowa otəlohkewakənəl koli təhatəməniya ktəlehtakhətiniya. Wecehtahkamək amskwahsete macəpak nepahtekewinowiwos, skatəna mecimiyiw olamewakənək, ipəcəl olamewakən skat eyiw ohəkek. Keloskit oməshonək ocikəloso; ipəcəl wikikəlosko nekəm mihtakwsəl kəloskowakən.

⁴⁵ Ipəcəl nolamewest, skat kolamsətəwipa.

⁴⁶ Wenəlo kilowaw kisiyolamihit npahtatakan? Wəlamewestowan, kekw weci skat olamsətowiwekw?

⁴⁷ Nekəm tan təleyawit Kelowəsit ohəkek ociksətəmənəl Kelowəsitəl okəlosowakənəl. Nit tehc kilowaw skat weciciksətəmotihwekw, ipəcəl skat ktətlewawoltihpa Kelowəsit ohəkek.

⁴⁸ Leswihsək asitematit 'tiyawal: Skat nolyitəmopən ksameliyakewo, naka ktiwan məcəhant khəkek.

⁴⁹ Sesohs asitewtəm: Məcəhant skat ntewaw nhəkek; kenok nkihitəmitəhama Nmihtakws, kilowaw kənskitəhamihpa nil.

⁵⁰ Skat nkwilowahtowan nil nkihi təmitəhamkosowakən. Kenok wen iyo tan kilowahtakw, tan teplomowet.

⁵¹ Leyo, tan yoholekw, tan wen kenok nkəlosowakən, npowakən skatəc onəmihtowən mecimiw.

⁵² Leswihsək 'tiyawal: Təkec nkəcicitonen ktiwan məcəhant khəkek. Aplaham mehcineyesəpənak naka nikanikcici takewinok, kenok kil ktitəm, Tan wen kelnək nkəlosowakən, skatəc oməspətəmowən npowakən mecimiw.

⁵³ Kil piyemikəpme skatək kmihtakwsno Aplaham? Tanek mehcinetsəpənak? Naka nhikanikcicitakewinək mehcinhətetsəpənik. Tan kil ktəleləsin?

⁵⁴ Sesohs asitewtəm: Kci təmitəhamsiyan, nkcitəmitəhamsot skatəc kekwseyawiw. Nmihtakws tan kihitəmitəhamit, tan kilowaw itəmekw nekəm kelowəsitowa.

⁵⁵ Kilowaw skat kəcicihawihwa; kenok nil nkəciciha. Etəman skat nkəcicihaw ntəlikəloskapihp tahalo kilowaw. Kenok nkəciciha, okəlosowakənəl nkəlnəmowan.

⁵⁶ Aplaham kmihtakwsowa olitohasopənak onəmihton nkiskom; onəmihtoneyapən, olitəhasopən.

⁵⁷ Nit tehc Leswihsək 'tiyawal: Kil mehc meskw naninsk kesikətənewo, knəmiyasəpənak Aplaham?

⁵⁸ Sesohs 'tiya: Leyo, yoholekw, meskw Aplaham eyihkw nil nti.

⁵⁹ Nit tehc nekəmaw wihkwehtoniyal pənapskol otəkəmaniya. Kenok Sesohs kalso, ocinotehe kci himiyewikwamək.