Wikhikən 6 - Wikhikәn 2014

¹ Akimte yohtəl kekwseyal Sesohs kwosəkasopən Koliletk 'cey sopekw tan Tiypiliyəs osopekwəm.

² Ktanakwsowək pəmawsowinowək onosokwawapənil, ipəcəl onəmi htoniyapəni l ki nowaskolti kənəl tanil kisitakwil kesinokəticik ohəkewikowak.

³ Sesohs tkwakweheyepən wocək, nit tet omawopihi anepənihi tanihi ekehkimatpənihi.

⁴ Nit nankəmihakewe, wikopaltimək kəti ikehe nit Leswihsək wikopaltimkeweyəmowak.

⁵ Nit tehc Sesohs ewepiw lapesopən onəmiya kesilit pəmawsowino weckowapasilicihi tan nekəm eyit, toci 'tiyal Pilipəl: Tamapal kisotənohan həpan tanil kisi məhaticil yohoht?

⁶ Weciyəhat nit otokwetskolal: Ipəcəl Sesohs okəcicihton tanəc elehtakec.

⁷ Pilip 'tasitemapənil 'tiyal: Nisatkw tineliyəl, (man nit tan ap nkotinsk kesitkikon,) eltaotit həpan skatəp memihew cikaw ehtasiw wikwehlat apsəkilsəswəl.

⁸ Peskowəl yohoht peməkehkimacihi, Atəle Simo Piyel wicikititicil, 'tiyal Sesohsəl:

⁹ Oskinosis eyolo tan ewowat nanənol paliyeweya pkwesikən; naka, niso psəkilsəsilicihi nəmesis. Kekw pal nit əliyolehtakiyək kesit pəmawsowin?

¹⁰ Sesohs itəm: Kisehtowok pəmawsowinowək olakwaniya, Nit olaskike. Nit na olakwaniya oskitapiyək, tamahal nanamkwakəsowək.

¹¹ Sesohs wikwehlan yohoht əpkwesikən, kisi olasoweltək osisenmowan nihiht elakwelicihi. Naka, nəmese tan kesipawatəmotit.

¹² Tan toci memihpoltitit, Sesohs 'tiya tanihi ekehkimacihi: Makwayewotək piyapənekol; welaman skat kekw ksihkehew.

¹³ Nit tehc mawewototit, weci əpsənehtoticil nisankotol pəsənotiyəl piyapənekol tanil weci piyemihakil wehketkək nanəwol paliyeweyak əpkwesikənək tanik kisihpoltitpənik.

¹⁴ Nit tehc pəmawsowinowək tan nemihtotitpən kinowaskoltikən tan Sesohs elikisehtakwpən, itəmotopənik: Olamewakən ikək wət nət nikanitəhasowin tan kehtipəkəciyatpən skitkəmikw.

¹⁵ Nit tehc tan toci kecicihat Sesohs okətipetapasilin onacit kwənkən onacikinceməs wehləkon, apc omacihan, tkwakwehe wəcək nkwəlokwayw.

¹⁶ An welakwiwik tanik wetəhkehkimocik ohəkek mətapiyapasilin sənohciw.

¹⁷ Nohotepapasiniya əpəsoləkok kwəsəkahaniya sopekw, limtətəkahiyək Cepəlniyəmk. Akis piskitpokət, mehc meskw Sesohs pəkəcihawən ewoltilit.

¹⁸ Asopekw ksatkwin elikslamsək.

¹⁹ Nit tehc kis eliyelcinaskwesoltihtit tamahal nəhowək mayelək, kəsəna nəhowək mihiyelək, onəmiyawal Sesohsəl pemihalicil oskitpemək, ckowicəsihihəl əpəsoləkok, seksoltowək.

²⁰ Kenok Sesohs 'tiya: Ekwiseksoltikw! Nit nil.

²¹ Toci olitəha sowimsənawal əpsoləkək; nit tehna əpsoləkw kwehe tan elcatitpən.

²² Ehcehkwiwik ehtayiwkisok, tan toci pəmawsowinowək tanik sekəlticik kamiw sopekək onəmitoniya, kətama kətək əpəsoləkw ew nit, tepəkt peskon, Sesohs skat wiciyewawipənihi tanihi ekehkimacihi əpəsoləkək; kenok tanik wetəkehkimopənik ohəkek macehiyopənik nkwotəkokayo;

²³ Kanokəlo kis ocikwəhehtopənil kətəkil əpəsoləkol Tipiliyəsk, kwəhehtopənil kwihiw tan tet etli micoltititpən əpkwesikən, kisi olasoweltəkpən 'Sakəmamowal.

²⁴ Nit tehc kisinəmitotit kwtanakwsicik mawihamək Sesohsəl skat otiyeliwən nit, tehna tanik wetəkehkimocik ohəkek, nekəmaw na tepesoltowək əpəsoləkw ikək əkkwahlətowək Cepəlniyəmk opeci kwilowahawal Sesohsəl.

²⁵ Kisimskowalit kamək, 'tiyawal: Nsakəmamən, tanek kpəkəcihaps yot?

²⁶ Sesohs 'tasitema: Leyo, yoholekw, kwelowihihpa, skat ipəcəl knəmihtoniyapənil kinowaskoltikənəl; kenok ipəcəl kəmahawapənik əpkwesikənək naka kəmemi poltipapən.

²⁷ Mosahk ocilokətikekw nit micowakən ikək tan pemiksikahak olamistak ocilokətikw nit micowakən ikək, tan cenesik askəmawsowakən ikək, tan pəmawsowin 'Kwəssəl lkəmilkoniyac. Ipəcəl Mihtakwsit Kelowəsit kisi kinowaskolal nihtəl.

²⁸ Nit tehc iyalahtit: Tanəc ntəlehtakhətinen lokitəmokt Kelowəsit otəlohkewakənəl?

²⁹ Sesohs 'tiya: Yot Kelowəsit otəlohkewakən, kolamsətəmotiniya nekəm ohək, tanil Kelowəsit kisi ləkimacil.

³⁰ Nit tehc 'tiyawal: Kekwse kinowaskoltikən elokiyən? Welaman kisinəmihtonenəp, welaman kolamsətolpən? Kekw elokatəmən?

³¹ Kəmitakwsənok micoltititpənik mana penekwikpənekw pahkahtakəmikw. Tahalo tan elowikhasikpən: Wecimilatpənek həpan spəmkik, micoltilits.

³² Nit tehc Sesohs 'tiya: Leyo, yoholekw, Mowis skat kəmilkoni awipənil həpan spəmkik təleyaw: kenok Nmihtakws kəmilkoniyal olamewe həpanəl spəmkik təleyaw.

³³ Ipəcəl Kelowəsit otəpanəməl nit nət tan weci pənekwesit spəmkik, omilowan pəmawsowakən oskitkəmikw.

³⁴ Nit tehc 'tiyawal: Nsakəmamən, mecimiw milini wət həpan.

³⁵ Sesohs 'tiya: Nil nit pemawsowakəna həpan. Nekəm tan ikəhat nhəkek skatəc kətopiw; nekəm tan welamsətəknhəkek skatəc kətowosmin askəmiw.

³⁶ Kemokəlo ktiholopapən, kisi nəmihipapən, skat kolamsətəmotipa.

³⁷ Msiw wen tan Nmihtakws milit pəkəciyec nhəkek. Tanəc wen nekəm ikəhat nhəkek skatəc notekimaw kwəcəmək.

³⁸ Ipəcəl weci pənekwesiyənpən spəmkik skat ntəlokawən tan nil eliyolitəhatəm; kenok ntəlok tan nekəm iliyolitəhatək tan petəkimitpən.

³⁹ Ipəcəl yot Nmihtakws olitahatəmowakən, msiw wen tan nemihat Wemitakwsilicil, tehna olamsətəmənəl ohəkek, otiyinp askəmawsowakən. Nil nonakehlac mcəsəlewe kisok.

⁴⁰ Yot nekəm olitahatəmowakən tan petəkimitpən, msiw tan militpən, skatəp nkəskatowən kekwse, kenokəc nonakehton mcəsəlewe kiskət.

⁴¹ Nit tehc Leswihsək mamselewestotihtit nekəm oci, ipəcəl itəm, Nil həpan tan weci penikwesitpən spəmkik.

⁴² Etəmotowək: Skat yot Sesohs, Sosep 'kwəssəl tan onikihko kəcicitowaneno? Nit tehc tan otəlikisiyitəmən: Nil weci penikwesi iyanpən spəmkik?

⁴³ Sesohs 'tiya: Ekwimamselitoltikw.

⁴⁴ Skat wen kisi ikəhew nhəkek Nmihtakws tan petəkimitpən skat wihkwonakw. Nonakehlac mcəsəlewe kiskət.

⁴⁵ Nit telowikhasik nikani təhasowinowək otowikhikənowaw ikək: Msiw kehkim kwəsoltowək Kelowəsitow ikək. Msiw wen tan wecinotəkəpən Mihtakwsit Kelowəsit owikok wetəhkehkimkositpən ohəkek npetehkakw.

⁴⁶ Kətama wen onəmiyayəl Mihtakwsilicil Kelowəsitəl, tepəkt nekəm tan weciyatpən Kelowəsitow ikək, nekəm kisi nəmiyapənil Mihtakwsilicil Kelowəsitəl.

⁴⁷ Leyo, tan yoholekw, tan welamsətək nhəkek otiyin askəmawsowakən.

⁴⁸ Nil pəmawsowakəne, həpan.

⁴⁹ Kəmihtakwsowawk omicoltiniyahpən mana penekwikpən, mehcinhətopənik.

⁵⁰ Wət nət həpan tan wecipənekwesit spəmkək, welaman wen mahatp skatəc mehcinewəp.

⁵¹ Nil nhək wət həpan pemawsit nit, tan weci pənekwesitpən spəmkik. Tan wen wecimahat yohtəl həpanəl askəmawsoc. Cə ketəlal həpanəc tan nil milowih, nil nowiyosəm, tan nil milowanc ociskitkəmikw opəmawsowakən.

⁵² Nit tehc Leswihsək kweciwekwa mawtoltihtit, yəhotoltowək Tanəpəl wət skitap təli kisi milkonen ohək kəmici mowanen?

⁵³ Nit tehc Sesohs 'tiya: Leyo, yoholekw, skat miciwekw pəmawsowin 'Kwəssəl ohək, opəkənom skat kətosəmoltiwekw pəmawsowakən kətama ktiwniya khəkewikowak.

⁵⁴ Tan micit nhək kitosəmit npəkəmom, otiyin askəmawsowakən; nonakehlac mcəsəlewe kiskət.

⁵⁵ Ipəcəl nil nhək olamewi micowakən nit, npəkənom olamewi kətosəmowakən nit.

⁵⁶ Tan micit nhək ketosəmit npəkənom, omecimkatəmən nhəkek, nil nənmecimkala ohəkek.

⁵⁷ Tahalo Nmihtakws pemawsit petəkimitpən wecipemawsi Nmihtakws ohəkek, nit elehik tan mihit ocipəmawso nhəkek.

⁵⁸ Nit wət həpan tan weci pənekwesitpən spəmkik. Skat tetpiw kəmitakwsowa otəlimicititpən mana penekwikpən pakətakəmikw, təli mehcinhətopənik. Nekəm tan micit nhək askəmawsoc.

⁵⁹ Sesohs onəstəhmənəl nihtəl kekwseyal himiyewikwamək, toci tan etlikehkihkemit Cepəlniyəmk.

⁶⁰ Nit tehc ktanakwsowək tanik kisi kehkimocik ohəkek, tan toci notəmotihtit nihtəl, kəlosowakənəl, itəmotowək: Mətowew kəlosowakən nit; Wenəpal kisi ciksətək?

⁶¹ Kenok Sesohs wecikcicihtawk ohəkek tanik weci kisi kehkimocik ohəkek otəlimamselewestotiniya ociyot kəlosowakən 'tiya: Nit nit tehc napiskwahmatiyekw?

⁶² Tanəpəl nəmihehkw pəmawsowin 'Kwəssəl otəliwonakihan tan təmk eyitpən?

⁶³ Kehtakws nət tan pemawsowihowet. Mhək skat wicokekemwiw. Nihtəl kəlosowakənəl tanil yoholekwil, nihtəl təkeh kehtakwsikil, tehna pəmawsowiwəl.

⁶⁴ Kenok kilowaw ankwəc kətama kolamsətəmoniyal. Ipəcəl Sesohs okociciya amskwahsete wecehtakemək tan yəhot skat welamsətəmo tilikwihi, tehna iyo tanil ehkinowehlihcil.

⁶⁵ 'Tiya: Nit tehna weciholekwpən, skatəc wen kisi ikəhew nhəkek skat ocilelmoksikw Nmihtakws.

⁶⁶ Akimte nit wesowi apasititpən ktanakwsititpən, tanik wici kisəkekimocik ohəkek, kətama, akwamk tələmi wicewawiwal.

⁶⁷ Nit tehc Sesohs iyalhat nisankoso weswiweskacihi: Kilowaw na kəti maciyapasipa?

⁶⁸ Simo Piyel 'tasitemal: Nsakəmamən wenəcalo ohəkek elapasiyek? Kil eyyin kəlosowakənəl askəmawsowakəneyal.

⁶⁹ Tehna nilon nolamsətəmotinen nkəcicitonenen kil. Kelowəsit wewesinoməl.

⁷⁰ Sesohs 'tasitema: Skat nil kisimkənəlopapəs kilowaw nisankosiyekw? Kilowaw peskw məcəhant.

⁷¹ No oskowiman Sotahəl Iskaliyotəl, Simo 'kwəssəl, tanəc wət ehkinowehlat wət nət peskw nisankosicik wesiweskacihi.