Wikhikən 5 - Wikhikәn 2014

¹ Nit kis kisitpihak yohtəl kikwseyal wikwhəpaltineyapən Leswihso ikək, Sesohs əlitkwakwehepən Selosalemk.

² Nit Selosalemk pekotepeyakek ew kwihiw əsipikhakənehtikənək liwiswiw Leswihsowatowemək, Petesta, (Ktəmakel kewihkwam,) nanənol tohsanəl.

³ Ktanakwsoponik elakwehcik ksinokewinowək yohtəl tohsanəl, nkapoltopənik, askasoltowək, tanik nepowikpənil opitinowal okatowal, otət laskowahtoniyapən, matpekehtaso samakwan.

⁴ Ipəcəl asel pənehkwesopən kinowiw cowahpesopən pekotepeyakek matpekehtonepən samakwan. Nit tehc tan wen təmk cewpesitpən kisi matpekehtasik samakwan, nət kikəhotpən tan kekwse kesinokatpən.

⁵ Oskitapi ewpənak nit tet tanek kesinokatpənak nsinsk kesikətən cel okəmolcin.

⁶ Sesohs nəmiyat otləssinlin, kəcicihal otəleyilin nit kispihce, 'tiyal Kolitəhatəmən kikəhoken?

⁷ Tan kesinokat 'tasitemal: Skaməm kətama wen ntewaw ncopehləkon pekotepeyakek tan toci samakwan matpekehtahsik kenok kweni lihayitəmk kətək nikani cowahpeso.

⁸ Sesohs 'tiyal: Onakes, onakeht kohot, pəmohsen!

⁹ Nəkəsayw skitap olewo, onaketon okohot pəmohseh. Nit kiskət atəlahsimowikiskwək.

¹⁰ Nit tehc Leswihsək 'tiyawal: Atəlahsimowikiskwək yot: skat kocikiseltəmeyewən əlkitəmowakənək kpəmipton kohot.

¹¹ Oskitap 'tiya: Nekəm tan kihkihit nticəkw, Onakeht kohot, pəmohsen.

¹² Nit tehc papehcimatit: Wen iya nət oskitap tan yəhosk, Onakeht kohot pəmohsen?

¹³ Kenok tan kikohot skat okəcicihawiyəl tan wenil: Ipəcəl Sesohs semasopən, ipəcəl kətanak wsopənik ewoltitpənik nit tet.

¹⁴ Akimte Sesohs otətlimskowal kci himiyewikwamək, 'tiyal: Sakiht kikəhok; mosak milkəmiksohkəc apc: skat acimətowe yinokic ikahak khəkek.

¹⁵ Oskitap macehe 'tiya Leswihs Sesohs nət tan kikəhatpən.

¹⁶ Nit tehc Leswihsək otəplomawal Sesohsəl, otəkwecinepahawal, ipəcəl yohtəl elokecil atəlahsimowikiskwək.

¹⁷ Kenok Sesohs otəliyasitema: Nmihtakws pemloket maləməte təkec nil ntəlok.

¹⁸ Nit tehc Leswihsək piyemikwehci nepahawal, ipəcəl skat tepəkt osəkwə skehtowən atəlahsimowikiskwək, kenok mac apc itəmopən Kelowəsitəl Mihtakwsəl, lecləsopən otetpawotiniya Kelowəsitəl.

¹⁹ Nit tehc otəliyasitema: Leyo, tan yəholek, Kelowəsit 'Kwəssəl skatək kekw kisi ənkotokalehtakewo; tepəkt nəmiyat Mihtakwsəl elehtakelit ipəcəl tanil Kelowəsit elehtaket, nihtəl iyaka 'Kwəssəl təhalo elilehtakelicil.

²⁰ Kelowəsit omosalal 'Kwəssəl, otəkehkimanəl msiw kekwseyal tanil elehtaket. Oməsowehtowanəlc ecinəkəmkikonol skatək yohtəl, welaman kohciyasəkitəha soltiniyac.

²¹ Ipəcəl tahalo Mihtakwsit Kelowəsit apaciphat npowino pəmawsowetahsit, nit peskon 'Kwəssəl pəmawsowetahsicil tan eliyolitəhatək.

²² 'Ciw Mihtakwsit Kelowəsit skat otəplomawiyəl wenil, kenok msiw tplotəmowakən omihtan 'Kwəssəl.

²³ Welaman msiw wenik okici təmitəhamawal Kelowəsit 'Kwəssəl tahalo elikici təhamatit Mihtakwsitəl. Tan wət skat kicitemi təhamakw Kelowəsit 'Kwəssəl skat nekəm okici təmitəhamawiyəl Kelowəsitəl tanil petəkimitpənil.

²⁴ Leyo, yoholekw, tan wen notək nkəlosowakən, welamsətək ohəkek tan pətəkimitpən, otiyin askəmawsowakən, skatəc ikehew wənmacitplotəmowakən ikək; kenok okisiwcinotehe npowakənək akimte, pəmawsowakənək.

²⁵ Leyo, yoholekw, tepənaskowihak kəti ikehe, tan toci, npowinowək onotəmotiniyac Kelowəsit 'Kwəssəl okəlosowakən; tanik onotəmotiniyac pəmawsoltowəkc.

²⁶ Ipəcəl tahalo Mihtakwsit Kelowəsit eyit pəmawsowakən ohəkek, nit elimilat 'Kwəssəl otipilin pəmawsowakən ohəkek.

²⁷ Omilanepən peltəmowakən otəplotəməlin, ipəcəl nekəm pəmawsowin 'Kwəssəl.

²⁸ Mosahk asəksətəmokekw yohtəl. Ipəcəl tepənaskowihak ikehe tan toci msiw wenik tanik ewolticik poskənikən alkw ikək onotəmotiniyac okəlosowakən;

²⁹ Oci moskapasowəkc, tanik kisi wəlehtakhətitpənik, pəmawsowakən apicipemkewe ikək; tanik patawek asoltitpənik, wənmacitplotəmowakəne apicipemkewe ikək.

³⁰ Skat kekw nkisinkwotokətomo. Tan elinotəm nit elitpəlotəm; ntəplotəmowakən kiyakwihe. Ipəcəl skat nkwilowahtowan nil nolitəhatəmowakən; kenok nkwilowahtowan Mihtakwsit Kelowəsit olitahatəmowakən tan petəkimitpən.

³¹ Nspiwolamewsiyan nəspiw wəlamewakən skat əwihew.

³² Kətək iyo tan nespiwəlamewit, naka nkəcicihton onəspiw wəlamewakən əlihe, tan elinspiwolamewit.

³³ Kilowaw ktəlkikesiniyahpən Sapatisk, nekəm linspiwolameyapən olamewakənək.

³⁴ Kenok nil skat nociwikwehtowən nspiwolamawakən pəmawsowinow ikək. Kenok yohtəl kekwseyal itəmanil welaman kohci kikatcəniyap.

³⁵ Nekəm (Sapatis) pəsakwhepən təlamkəlepən ksahtowepən, kilowaw kolitəhatəm əniyapən mahkiyew kolitəhasoltiniya opəshakwhekəm ikək.

³⁶ Kenok piyemi nəkəmkikwon nspiwolamewakə ntin skatək Sapatis onəspiw olamewakən; ipəcəl lohkewakənəl tanil Nmihtakws militpənil nkisehton, yohtəl lohkewakənəl tanil elokiyanil, nəspiw wəlamewokonəl, Nmihtakws npetəkimkon.

³⁷ Nmihtakws tan petəkimitpən nkispiwolamewokopən. Kilowaw skat knotəmowəniyawihpən eltakwsit, kesəna skat knəmiyawiwahpən tan elikit.

³⁸ Okəlosowakənəl skat əktimowawoniya mecimtewi khəkewikowak. Ipəcəl tanil petəkimatpənil, skat kolamsətowawiwa.

³⁹ Wəlipapehkisakitək Kelowəsiteweyal Awikhasikil, ipəcil ktəlitəhasoltipa nit tet ktihiniya askəmawsowakən, yohtəl nihtəl wecinspiwəlamewikil nil.

⁴⁰ Skat kolitəhatəmoniyawihpən kockowihihiniya nil, ktihiniyap pəmawsowakən.

⁴¹ Skat nocimsənəmowən kicitəmitəham kosowakən pəmawsowinow ikək.

⁴² Kenok kəciciholpa skat ktiyoltiyoniya Kelowəsit okəseləmoksowakən khəkewikowak.

⁴³ Npəkəci Nmihtakws wisowənək, skat kwikwehlipahkwopən. Apc kətək pəkəciyat nekəm ta wisowənək, kowikwehlawac nekəm.

⁴⁴ Tan ktili kisi olamsətəmotiniya? Kilowaw kəməsənəmawtoltiniya kci təmitəham kosowakən, skat kilowahtoniya nit, kci təmitəhamkosowakən tan wecihat tepəkt Kelowəsitow ikək.

⁴⁵ Mosahk litəhasoltikekw kməsimləpac Nmihtakwsək. Ew tan wen mesiməlakw nət Mowis, tan ohəkek. Elitəhasoltiyekw.

⁴⁶ Ipəcəl olamsətowekw Mowis, kolamsətowipahpənp nil. Ipəcəl Mowis ociwikhikepən oci nil nhək.

⁴⁷ Kenok skat wəlamsətəmowekw elowikhiketpən nekəm, tanəc ktəliyolamsətəməniya nil nkəlosowakənəl?