Wikhikən 3 - Wikhikәn 2014

¹ Naka skitapi eyitsəpənak Palosiyək ohəhewow ikək liwisosəpənak Nikotem, tanek etlitplotəm owinowitsəpənak Leswihsow ikək.

² Nekəm pəkəciye anesəpənil Sesohsəl nipayiw, 'tiyal: Nsakəmam, kəciciholpən kənotəkehkikemin weciheyin Kelowəsitow ikək; ipəcəl skat wen okisi lehtonəl yohtəl kənowaskoltikənəl tanil kil kisitonil, skat Kelowəsit wicihemakw.

³ Sesohs 'tiyal: Leyo, yəhol, skat wen minowinəmihkosihkw, skatəc onəmitowən Kelowəsit okinceməswakim.

⁴ Nikotem 'tiyal: Tanəc wen təlikisinəmikosin kisi keciwskicinowit? Kisipicesop nisewe wikowasəl apc nəmikoso?

⁵ Sesohs asitewtəm: Leyo, yəhol, skat wen oci nəmikosikw samakwan ikək, naka Kehci-niweskwitow ikək, skat nekəm kisi ksihew Kelowəsit okinceməswahkimək.

⁶ Tan kekw weci tkisitpihak mhəkek, mhək nit; tan kekw wecikisitpihak kehtakwsow ikək, kehtakws nit.

⁷ Mosahk asəkitəhasikəc ktiholən cotehlo tepkawto ktəlnapiyoltiniya apc.

⁸ Wocowsən wetsək tan eliyoli təhatəmowik, kiknotəmən metelamsək kenok skat kci citowən tan weciyak kesəna tan elihak. Nit teleyit msiw wen tan weci əlnapit Kehci-niweskwitow ikək.

⁹ Nikotem asitewtəm: Tanəc yohtəl kekwsal əlikisilew?

¹⁰ Sesohs asitewtəm: Kil etə etlinotəkehkikemiyən Islel ikək, skat kci citonəl yohtəl kekwseyal?

¹¹ Leyo, iyatol noskotəmənen tan kecitowek, nəspiw olamatəmənen tan nimitowek, kenok kilowaw skat wihkwehtoniyowihpən nəspiwolamewakənən.

¹² Kisi yəholekwsəpən tanil skitkəmikweweyal skat olamsətəmowekosəpən, tanəc ktəli olamsətəməniya yəholeyekw tanil spəmkik təleyal?

¹³ Skat wen kisi onakesə spəmkik nət tepəkt nekəm tan weci pənehkwehsits spəmkik, iya pəmawsowin 'Kwəssəl tan iw spəmkik.

¹⁴ Tahalo Mowis teliwnakelatpən hatosisowəl pakətakəmikw, nit təkec otahcowi liyonakehlan pəmawsowin 'Kwəssəl.

¹⁵ Welaman msiw wen tan welamsətək ohəkek otihinc askəmawsowakən.

¹⁶ Ipəcəl Kelowəsit etohci mosacitpən skitkəmikw wecimilowetpən wihwipə 'Kwəssəl, welaman msiw wen tan welamsətək ohəkek, skatəp ksikehewi, kenok otiyinp askəmawsowakən.

¹⁷ Ipəcəl Kelowəsit skat oci əlkimawipənil 'Kwəssəl skitkəmikw onmacit pəlotaməlin skitkəmikw, kenok oci ilkimapənil welaman skitkəmikw ocikikan ohəkek.

¹⁸ Tan wen welamsətək ohəkek skat onmacitplomawo; kenok nekəm tan skat welamsətəmok təkec onmacitploma: Ipəcəl skat wəlamsətəmowən Kelowəsitəl wihwipo 'Kwəssəl wisowən ikək.

¹⁹ Yot wicihak onmaci tplotəmowakən, ipəcəl pəssakwek ikahak skitkəmikw, kenok pəmawsowinowək peyemimosaciniya piskahtek skat tetpiw pəshakwhek, ipəcəl okisitakənowəl skat kəlowətowiyəl.

²⁰ Ipəcəl msiw tan wen poski wapələloket ocisinəmən pəssakwek, skat opəkəciyawən pəssakwek, welaman otəlohkewakənəl skat ocimawənəl.

²¹ Kenok tan wen welameloket, otəlehton olamewakən, pəkəcihepəssakwek, welaman otəlohkewakənəl kəcicitasowəl ocikisitasowəl Kelowəsitow ikək.

²² Nit kisitpihetol yohtəl kekwseyal Sesohs pəkəciheyepən, naka tanik wetəkehkimocik ohəkek petapasopənik ktakəm ikək Leswihsowakik, nit tet etlimawi oltititpən, etli papteysowehlowatititpən.

²³ Naka Sapatis etli paptihsowehloweyehpən. Enənk kwihiw Selemk ipəcəl ktanakot samakwan eyikpən nit. Petapasopənik papteysowehtasoltopənik.

²⁴ Ipəcəl Sapatis mehc meskw pihsehlawihipən laplisonək.

²⁵ Naka toci papehcitowakən ikehe Sapatisk wetəkehkimkosicik Leswihs ociwakəmehləswakən.

²⁶ Petapasiniyal Sapatisəl 'tiyawal: Lapeyi, Təpeltəm, nət skitap tan niseyawtiyekpən Kamək Soltənk, kil tan nespiwəlamewotəpən, sakiht, nekəm paptihsowehlowe, msiw pəmawsowinowək opetapasiniyal.

²⁷ Sapatis itəm: Kətama wen oməsənəmowən kekw, skat ocimilamok spəmkik.

²⁸ Kilowaw kocinspiwəlamhətipa nil yəholehkpən nil skat Niweskwit, tan Mimkweno; kenok nikankimk nekəm ohəkek.

²⁹ Nekəm tan ewat mahtamaliyewəl, mosimaliye nət; kenok mosimaliye witapiyəl tan sehket onotowəl mosimaliyewəl, kəmac olitəhaso ocimosimaliyewol eltakwsilit. Nit tehc yot nolitəhasowakən psənte.

³⁰ Nekəm cə pəminəkəmkil kenok nil cə npəmiyapsəkil.

³¹ Nekəm tan wecihat spəmək mawispew. Tan 'cey ktakəmikok; ktakəmikwewe nit, oskowotəmən ktakəmikw. Nekəm tan wecihat spəmkik mawispew.

³² Naka tan nemitakwpən naka tan notəkəpən weci nspiwəlamet, onəspiw olamewakən kətama wen wikwehtowən.

³³ Nekəm tan wikwehton onəspiw wəlamewakən kisi nspiwolamalat Kelowəsitəl olamewakənilin.

³⁴ Nekəm tanil Kelowəsit elkimatpənil itəmənəl: Kelowəsitəl okəlosowakənəl; ipəcəl Kelowəsit skat otəlimilowawonəl. Kehci-niweskwilicil ətpihikənək.

³⁵ Mihtakwsit Kelowəsit omosacinəl 'Kwessəl, msiw kekw omilan opitinək.

³⁶ Nekəm tan welamsətək Kelowəsit 'Kwəssəl ohəkek otiyin askəmawsowakən. Kenok nekəm tan skat welamsətəmok Kelowəsit 'Kwəssəl, skatəc onəmitowən pəmawsowakən; kenok Kelowəsit okiyowakən ənkeso ohəkek.