Wikhikən 18 - Wikhikәn 2014

¹ Tan Sesohs kisi itəkəpən yohtəl kəlosowakənəl əlihyapon mawiw tanihi ekehkimacihi ksamək siposis Ketlənk, tan tet eyikpən npisonkikan, tan nekəm kesəhatpən naka tanihi ekehkimacihi.

² Sota tan ehkinowehlatpən okəcicitonepən yot kətakəmikwsis, ipəcəl Sesohs meskiw otəlihaneyepən mawiw tanik wetəkehkimocik ohəkek.

³ Nit tehc Sota kisi wikwehla omawohkan skitapo naka Palosiyək kcipahtəliyasək oskinosəmowa, petapasopənik nit tet petahsenəmatopənik pəsakwhenmakənoholtopənik, nsakosowənholtopənik.

⁴ Nit tehc Sesohs okəcicitoneyepənil msiw kekwsal tanil ketikəhakil ohəkek otəlihanepənihi 'tiya: Wen kilowehekw?

⁵ 'Tasitehmawapənil: Sesohs Nasaletkew. Sesohs 'tiya: Nil nət nekəm: naka Sota tan ekinowehlatpən omawikapowinepənihi.

⁶ Nit tehc kisi iyalatpən, Nil nət nekəm setiyapasopənik msakənahtesoltopənik, ktakəmikok.

⁷ Nit tehc apc opapehcimapənihi: Wen kilowehekw? Itəmotopənik: Sesohs Nasaletkew.

⁸ Sesohs asitewtəm: Ktiholopahpən nil nət nekəm: nit tehc kilowahyehkw kiseltəmwok nihtək omaciyapasi niya.

⁹ Wilaman kəlosowakən əlihe tan itəmənpən: Nihtək tanik miliwnpənik kətama wen nkəskahlaw.

¹⁰ Nit Simo Piyel təmokehtəhikən otiyin onalkwakehton, otəkəmal kcipatəliyas oskinosəməl oməntehmowan inahkatowe ocalkəs. Yohtəl oskinosəməl liwisowəl Malkəs.

¹¹ Nit tehc Sesohs 'tiyal Pceləl: Piseht apih pitəlawənək ktəmkwehtəhikən. Towəsmotiyəl tanil Nmihtakws militpənil skatəcal nəkahlaw?

¹² Toci nopewsewin naka keptihnək otapəsesəmowa Leswihsək otakonawal Sesohsəl, okəlpilawal.

¹³ Təmk opeci kəlatəkənawal Anəsk ipəcəl Anəsk Kayihp 'silhosəl, Kayihp təlikci pahtəliyasowiw nit pimikətək.

¹⁴ Kayihp nət nekəm tan iyalatpən Leswihs mawakənotəmatit ocikaniwinp peskw skitap ocimecinen ocipəmawsowino.

¹⁵ Simo Piyel naka kətək notəkehkimot, onosokowawal Sesohsəl. Nət notəkehkimot, ocikcicikwəso kcipahtəliyasow ikək kəsewicewal Sesohsəl kcipahtəliyas wikək.

¹⁶ Kenok Piyel skeh khakənək kwəcəmiw. Nit tehc nit notəkehkimot tan ocik cicikwəso kcipahtəliyasow ikək noteheha okəlolal pilskesisəl nociskhakənelicil, okəsekimal Piyeləl.

¹⁷ Toci piskwesis nociskhakənet 'tiyal Piyeləl: Skatiya kil peskw tanik notəkehkimacihi wət skitap? Itəm: Nil skat.

¹⁸ Notlokhəticik naka apəsesək nit tet skəltowək; kisətotowəsowək məkəsiyəl, ipəcəl ətkewo, təliwosoltowək, Piyel omawikapowin təlowəso.

¹⁹ Nit tehc kcipahtəliyas papehcimal Sesohsəl ociyekehkimacihi naka ociyotəkehkitowakən.

²⁰ Sesohs 'tasitəmal: Nmesowiyosko otəmənepən skitkəmikw; mecimiw ntətləkehkikemihpən himiyewikwamək, naka, kcihimiyewikwamək, tan tet msiw Leswihsək etlimawihatit. Meskw kekw kikimiw ntitəmokopən.

²¹ Kekwse, nil weci papehcimiyən? Papehciman nit notowitpənik. Sakiht, nekəmaw okəcicitoniya, tan yəhokpən.

²² Yot kisihitək, peskw nocitkwoket tan kwihiw sehket, osəkskehtowal Sesohsəl osiskək, 'tiyal: Nit teliyasitemət kcipahtəliyas?

²³ Sesohs 'tasitemal; Wapəlewestowansəpən ocinspiwolam ewapəlihak; kenok wəlewestowansəpən, kekw weci təkəmiyən.

²⁴ Anəs 'təlipcitakanəl kəlpisowəl Kayihpk, kcipahtəliyasow ikək.

²⁵ Simo Piyel skehowaso. Nit tehc otcawal: Skat kil peskw nekəm notəkehkimacihi? Nekəm ikənewe, itəm: Nil skat.

²⁶ Peskowək nit kcipahtəliyas oskinosəm, otəlnapeməl nekəm tan ocalkəs Piyel mentehmowatpən, 'tiyal: Skat ktətlinəmiholopəs kil npison kikanək nisiw nekəm?

²⁷ Apc nit tehc Piyel ikənewe, olewəte napaha mətehtakso.

²⁸ Toci ocimacephaniya Sesohsəl Kayihpk, otəliphawal kcisakəmw ikək. Ospasahkiw: nekəmaw skat ksiyapasiwiyək kcisakəmowikwamək, welaman skat otokwakweh tasoltiwniya; kenok welaman okisi miciniya nankəmihakewe wikhəpaltimək.

²⁹ Pilot nit tehc əlinotəhat ewoltilit itəm: Kekwse msitowakən peciptowekw wət skitap?

³⁰ 'Tiyawal: Skat wapəlokewinowikosəpən, skatəp kmilonewin kil.

³¹ Pilot nit tehc 'tiya: Kilowaw wikwehlok tplomok, litplomok tan elkəmawik ktpaskowakənowa. Nit tehc Leswihsək 'tiyawal: Nilon skat nkisel təmakewonewin nnepahannen wen.

³² Welaman Sesohs okəlosowakənəl əlihe tan itəkəpən tanəp əlikən npowakən napohoht.

³³ Pilot nit tehc apih ksahat kihisa kəmawikwamək nowihkwiman Sesohsəl, 'tiyal: Kil nit Leswihsək okinceməsmowal.

³⁴ Sesohs asitewtəm: Kociwihtəmon teyot kil khəkek? Kesəna kətəkik ktihokon oci nil?

³⁵ Pilot asitewtəm: Nil iya Leswihs? Kil nektokəmiksiyekw naka kcipahtəliyasək nmilkenehpənil kil. Kekw kisiyəlokeps?

³⁶ Sesohs asitewtəm: Nil nkinceməswahkim skat yot skitkəmikw təleyawiw. Nkinceməswahkim təleyawik yot skitkəmikw, noskinosəmək ocimikakhətiniyap nil skat nponehləkewən Leswihsək opitinowawikowak Kenok təkec nkin ceməswahkim skat təleyawiw tet.

³⁷ Pilot nit tehc 'tiyal: Kincaməsowiya iya kil? Sesohs asitewtəm: Kil kisi itəmən, ipəcəl nkiniheməso. Oc yohtəl weci nəmikwəsiyanpəhin, ociyotəl weci pəkəciy ayanpən skitkəmikw nəspiw wəlamatəmən olamewakən. Msiw wen tan etlewawit olamewakənik, ciksətəmən elewesto.

³⁸ Pilot 'tiyal: Kekwse; iya olamewakən? Kisi itək yot apc otəlinotəhan Leswihs ewoltilit, 'tiya: Kətama nməskəmowən ewapəlehtakw ohək.

³⁹ Kenok ktəlmahtopa nponehlan oci kilowaw peskw nankəmipakewe wikhəpaltimək. Kolitəhatəməniya nit tehc nil nponehlan oci kilowaw Leswihsək okinceməs əmowal?

⁴⁰ Msiw nit tehc apc kintakwsoltowək, itəmotowək Skat wət, kenok Palapas. Nit Palapas kəmotənesks.