Wikhikən 17 - Wikhikәn 2014

¹ Yohtəl kəlosowakənəl Sesohs itəm, spəmək spəmkik əlapopən. Itəm: Nmihtakws tepənaskowihak ikehe kci təmitəhaman kwəss, welaman kwəss kihitəmitəhaməkw kil.

² Tahalo kil elimiltəpən otəpeltəmən msiw mhək, welaman omilan askəmasowakən msiw tanihi miltəpənihi.

³ Yot nit askəmasowakən, knənakon kil tepəkt welamewi Kelowəsit wiyən, naka okəcicihaniya Sesohs Niweskol tan petəkimitəpən.

⁴ Nil kihitəmitəhaməlopən ktakəmikok: nkisaton lohkewakən tan miliwnpən ntəlokatəmən.

⁵ Təkec, Nmihtakws, ocikcitəmitəhamin kil khəkek nit kci təmitəhamkosowakən ikək tan nisiyəkwpən meskw kehtakəmikwinok.

⁶ Ntahkinowehtowanepən kowisowən nihtək pəmawsowinowək tanik weci miliwnpənik skitkəmikw. Kil nehketkək, kil kmilinək, osaktəməniyapən kəlosowakən.

⁷ Təkec okəcicitoniya, msiw kekwsal tanil kisi miliwpənil ocihe khəkek.

⁸ Ipəcəl kəlosowakənəl tanil miliwnpənil, nmilanepənil oməsənəməniyapənil, okəcicitoniya olamewakən ikək nocihan kil khəkek, olamsətəmotiniyapən kpetəkimihpən.

⁹ Npapatəmowewak. Skat npapatəmowewotəmowən skitkəmikw; kenok npapatəmowewak tanik miliwnpənik, ipəcəl kil nit.

¹⁰ Msiw kikwsal tanil nil, kil na nihtəl; tanil kil, na nihtəl: nil wecikcitəm mitəhamkosi nihtəl.

¹¹ Nil skat akwamk ntəlmeyiw skitkəmikw; yoktək eyoltowək skitkəmikw, nil npəkəhihi eyən. Kelowəsitwi Mihtakwsəl, awkewowan yoktək kowisowənək tanik miliwnpənik, welaman lipeskowiwəkc, tahalo kilon elipeskoweyəkw.

¹² Tan kweni wicihemok, ntətəlankewowapənik kowisowənək. Tanik yəkt miliwnpənik ntankewowapənik kətama wen skwəskehtasiw, tepəkt skwəskehlətowakən 'kwəssəl, welaman tan Kelowəsitewe Wikhikən itək nki kahki sehtaso.

¹³ Təkeyih npəkəci tan eyiyən, yohtəl kekwsal etliyetəmanil skitkəmikw, welaman otiyeniya nil nolitəhaswakən nkikapsənehtaso ohəkewak.

¹⁴ Milanepən kəlosowakən, skitkəmikw otakwitəhamapənihi, ipəcəl skat 'ceyaoltiwiyək skitkəmikw, tahalo nil skat elitəleyawiw skitkəmikw.

¹⁵ Skat wikotəmolowən kociwikw, wehlan skitkəmikw; kenok kociyankewowanp mətowewowakənək.

¹⁶ Skat 'ceyaoltiwiyək oskitkəmikw tahalo nil skat elitəleyawiw skitkəmikw.

¹⁷ Oci nəkskamewewehlan nekəmaw kolamewakənəm ikək; 'kəlosowakən olamewakən nit.

¹⁸ Tahalo kil eliyəlkimiyənpəha skitkəmikw nil, nitna nekəmaw elihəlkimək oskitkəmikw.

¹⁹ Oci nekəmaw kci tpəsowewehləs, welaman nekəmaw ocikci tpəsowewe tasoltiniya olamewakən ikək.

²⁰ Skat tepəkt yokt npapatəmowewawiyək, kenok naka owihi msiw tanik ociyolamsətəməniya nhəkek okəlosowakənəl əmowikowak.

²¹ Welaman msiw nekəmaw opeskowiniya, tahalo kil, Nmihtakws, elihiyən nhəkek nil khəkek nti, nekəmaw iyoltowəkp khəkeyenok. Welaman skitkəmikw olamsətəmən kil kpetəkimihpən.

²² Kicitəmitəhamkosowakən tan miliwnpən, nil nkisimilan, welaman opeskowiniya tahalo kilon elipeskowiyəkw.

²³ Nil nti ohəkewak, kil ktih nhəkek welaman nekəmaw okikawəli peskowehlan, welaman oskitkəmikw okəcicitonc kil kpetəkimihpən, ktəli mosalan nekəmaw tahalo nil elimosaliyən.

²⁴ Nmihtakws, npawatəmən tanik miliwnpənik nwiciyeyakon tan eyi; welaman otəsakihtoniya nkicitəmitəham kosowakəm tan miliwnpən; ipəcəl kəselmihpən meskw skitkəmikw kisitasinok.

²⁵ Ksəsewey Nmihtakws, skitkəmikw skat knənakowənewihpən, kenok nil knənolohpən, yokt okəcicitoniyahpən kil petəkimihpən.

²⁶ Ntahkinowehtowanepən kowisowən, ntahkinowehtonc, welaman ksalməkwsowakən, tan wecikselmiyənpən iyop ohəkewak, nil ntiyəp ohəkewak.