Wikhikən 14 - Wikhikәn 2014

¹ Mosahk onmacitəhasowic kməshonowal! Wəlamsətəmotikw Kelowəsit ohəkek, naka, nil nhəkek wəlamsətəmotikw!

² Lamikowam Nmihtakws wik ktanakətol ihyoltimkil. Skat leyinokəsəpən ktiholniyapənp; ipəcəl nil ntəlihan naci wəlehtolniya tan ihyoltimək.

³ Lihayan naciwəlehtolekw ihyoltimək, apcəc npəkəci təliwihkwehləlpac nhəkek welaman tan eyi kilowaw na ktiyoltiniya.

⁴ Kəcicitotiniya tan elihay, naka kəcicitotiniya awht.

⁵ Toma 'tiyal: Nsakəmam, skat nkəcicitonewin elihayin, tan ntəlih kisikcicitonen awht?

⁶ Sesohs 'tiyal: Nil nit awht, naka welamewakəni, pemawsowakəni. Skat weci opəkəcihayonəl Nmihtakwsəl; skat ocipəkəcihakw nil nhəkek.

⁷ Kciciyekwsəpən nil, kci cihawapəna Nmihitakws. Təkec wecehtakemək kəcicihawa Nekəm, kisi nəmiyawa.

⁸ Pilip 'tiyal, Nsakəmam, moskehtowineh Kmihtakws, nihtəc kiyaskwi nilon.

⁹ Sesohs 'tiyal: Kis kweni wiciyewolekw, Pilip, meskw mehc kəciciho? Tan kisi nəmihit nil okisi nəmiyal Nmihtakwsəl. Kekwse weci itəmən: Moskehtowineh Kmitakws?

¹⁰ Skat iya kolamsətəmowən nil ntin Nmihtakws ohəkek? Naka Nmihtakws iyo nil nhəkek? Kəlosowakənəl tanil yəholekwil skat nociyitemonəl nil nhəkek kenokəlo Nmihtakws tan meci mihehit nhəkek, Nekəm otəlokanəl lohkewakənəl.

¹¹ Wəlamsətowikw nil nti Nmihtakws ohəkek naka Nmihtakws iyo nil nkəkek kesəna oci wəlamsətəmokw lohkewakən ikək.

¹² Leyo, yəholekw Tan welamsətək nhəkek lohkewakənəl tanil nil elokiyanil nekəmcəna otəlokanəl: piyemkikwənolc lohkewakənəl elehtakecil, ipəcəl ntəlih Nmihtakws.

¹³ Tan kekwse wici wikotəmekw nil nowisowənək, nit ntəleykanc; welaman Nmihtakws okici təmitəhamkosin 'Kwəssəl ohəkek.

¹⁴ Wihkotəmekw kekwse nowisonək, ntəlehtakanc.

¹⁵ Mosaliyekw, saktəmok ntəlkitəmowakənil.

¹⁶ Nil nkwilotəmowan Nmihtakws, kmilkoniyac kətək Nociwəlehlowet, Nekəm wiciyeyakowahc mecimiw.

¹⁷ Nət olamewakəne Kehci-niweskwit, tan skitkəmikw skat kisi wikwehlakwil; ipəcəl skat onəmiyawiyəl kesəna skat onənoowiyəl. Kenok kilowaw knənowawa; ipəcəl wiciyeyakowa, iyoc khəkewak.

¹⁸ Skatəc knəkələlopa ksesəmi kipəswoltiniya. Aoltiyekw kpetehkolpac.

¹⁹ Nit mcəsəl mahkiyewos skitkəmikw skatəc nəmcokowən: kenok kilowaw knəmihipa; ipəcəl nil npəmaws, kilowaw na kocipəmawsoltiniya.

²⁰ Nit kisokin kəcicitoniyac nil nti Nmihtakws ohəkek, naka kilowaw ktiyoltiniya nil nhəkek; naka nil ntin kilowaw khəkewak.

²¹ Tan eyit ntəlkitəmowakənəl osaktəmənəl, nekəm nət nkəselməkw; nekəm tan keselmit, ocikseləmoksoc Nmihtakws; niləcəna nkəselma nekəm ntəlih nesowehləsəc ohəkek.

²² Sota 'tiyal, (skat Sota Iskaliyot), Nsakəmam, tanəc ktəli kisi mesowehləsinc nhəkenok, yaka skat kmesowehləsihwən skitkəmikw?

²³ Sesohs asitewtəm: Wen mowalit nhəlowakənəl osaktəmənəlc, Nmihtakws okəselmalc npehtehkowanəc tan eyit nwiciyewaw toltinenəc.

²⁴ Tan skat mohsalikw nekəm skat osaktəmonəl nkəlosowakənəl. Kəlooswakən tan notəmekw skat nil nkəlosowakən nit, kenok Nmihtakws okəlosowakənəl nit, Tan petəkimitpən.

²⁵ Yohtəl kəlosowakənəl iyalolekwil kweni wiciyewolekw.

²⁶ Kenok Nociwolehlowet kesəseyit Kehci-niweskwit, Wici oliniweskwit, tanil Nmihtakws otəlkimalc nowisowənk Nekəm knəka kehkimkoniyalc msiw kekwsal kisehtakoniyac kmikwitəhatəməniya msiw kikwsal tanil nil kisi yəholekwpənil.

²⁷ Wantəkewowakən nəkətəmən khəkewak. Nwantəkewowakən kəmiləniya. Skat ktəlimiloniya tahalo skitkəmikw elimilowek. Mosahk sespehtəhasowic kməshonowal, kesəna mosahk seksowic!

²⁸ Knotəməniyapən yəholekwpən nmacəha acəc kpetekolpa tan ewoltiyekw. Mosaliyekw kolitəhasoltipap, ipəcəl ntitəmopən ntəlih Nmihtakws, ipəcəl Nmihtakws piyemkil skatək nil.

²⁹ Nit təkec kisi yəholekwpən meskw skat tepənaskowihanok, welaman toci tepənaskowihak kolamsətəməniyac.

³⁰ Skat akwamk təlimoskowimlopa, ipəcəl skitkəmikw okinceməsəməl ckowihiyəl, nil nhəkek kətama, kekw otipiwən.

³¹ Kenok welaman skitkəmikw okəcicihton nmosalan Nmihtakws, naka tan Nmihtakws elitpəlomit, nit elehtahki. Onakesoltikw maciyapasinic!