Wikhikən 13 - Wikhikәn 2014

¹ Nit meskw nankəmihanok wikhəpaltimək Sesohs okocicihtones otepənaskowihahkən ikehe ocinotahan skitkəmikw otəlihan Omihtakwsək, kis okisi kselmapənihi osiwes tanili skitkəmikw ewoltilicihi, omosalapənihi maləməte mehcihak.

² Olakwihpowakən ikəhes, məcəhant okisi pcehtowats Sota Iskaliyot Simo 'kwəssəl oməshonək otahkinowehlan;

³ Sesohs okəcicihtones Omihtakwsəl oponehtakon msiw kekwsal opitinək, nekəm okisocihan Kelowəsitow ikək, otəlihan Kelowəsitow ikək;

⁴ Oci onakehsopən olakwihpowakənək, oponehtonepənil otəlkwotawakənəl, wikwehtonepən kasikəhosot otəlekəpilsinepən.

⁵ Akimte osokatowepən samakwan towikəsikwensotik, toci omaceksəsptowanepənil osihtowal tanihi ekehkimacihi, ocikashəmowanepənil kasikəhosotik tan elekəpilsihtpən.

⁶ Toci opəkəcihanəl Simo Piyeləl, Piyel 'tiyal: Nsakəmam, kəsəspatonəl nsitəl?

⁷ Sesohs asitewtəm: Tan eləki təkec skat kəciritowən; kenok elmihak kəcicitonc.

⁸ Piyel 'tiyal: Kil skat tehc kəsəspatowiwnəl nsitəl. Sesohs 'tasitewtəmal: Skat ksəspahləlowan kil kətama ktiyewən təpeltəmowakən nhəkek.

⁹ Simo Piyel 'tiyal: Nsakəmam, skat tepəkt nsitəl, kenok naka npihtinəl naka nəniyakən.

¹⁰ Sesohs 'tiyal: Tan wət kisiksəspahtasit tepəkt wetəmetəhatək okosəspahton osihtəl, toci nkihkahpapatəmipehkiko. Kilowaw kpapatəmipeh kikoltipa, kenok skat msiw.

¹¹ Kenok Sesohs okəcicihal tanəl ketowikinowehlihcil, nit weci itək: Skat msiw kpapatəmi pehkikoltipa.

¹² Nit kisiksəspatowat osihtowal, kisiwihkweyehtakw otəlkwotawakənəl, kisəpesit, 'tiya: Kəcicitoniya kisilehləlekw?

¹³ Təliwihihpa Notəkehkikemit Nsayit kəmamən, kolamhəltipa, ipəcəl nil nət.

¹⁴ Nit tehc nil tan Ksakəmamoltiniya nhək, naka kənotəkehkimləpa, ksispahtolekw ksitowal, kilowaw əpəna kəsəspahtaotoltiniyal ksitowal.

¹⁵ Ipəcəl kisimiləniya, kehkinsot ktəlokhəteniya tan lehləlekw.

¹⁶ Leyo, yəholekw, tan wət tepeləməkwsit, skat acispew skatək 'Sakəmaməl; kesəna tan wət elkimot skat piyemispew skatək tanil elkimacil.

¹⁷ Nit kəcicitowew yohtəl kekwsal, kolewoltipa hələkhətiyekw.

¹⁸ Skat nocikəlosiw msiw kesiyekw: nkəcicihak tanik mekənokpənik: Ipəcəl welaman tan elowikhasik əlihe: Tan wət mawihpoltiyek həpanəl, eliyonkehtakws wokwən nil əlkwiw.

¹⁹ Nit nikanakən otəmolpa meskw ikəhanok, welaman ikəhak kolamsətəməniyac nil nət.

²⁰ Leyo, tan yəholekw, tan wen wikwehlat tanil nil elkimok, naka nil nowihkwehləkw. Tan wen wikwehlit nil, wikwehlal tanil petəkimitpən.

²¹ Nit Sesohs kisi itək nihtəl, nihtəl wənmacitəhaso oməshonək, otakənotəmowa, itək: Leyo, tan yəholekw, peskw kilowaw ntahkinoowehləkwih.

²² Toci notəhkehkimocik isakihotoltowək, skat okəcicihawiwal tanil wenil itəkil.

²³ Nit peskw tanil Sesohs ekehkimacihi, tanil kesehnacil, sitkwehsinol Sesohsəl opəskonək.

²⁴ Nit tehc Simo Piyel omatkwehtowal opapehihiman tanil wenil itəkil.

²⁵ Toci nekəm tan esitkwesikpən Sesohsəl opəskonək, 'tiyal: Nsakəmam wen nət?

²⁶ Sesohs asitewtəm: Nət ehtə tanəc mihlok apsəkikwsəsək kisiskwihikiyan. Kisiskwihikek apsəkikwsəsək omilan Sota Iskaliyotəl, Simo 'kwəssəl.

²⁷ Kisimsənək apsəkikwsəsək mocəhant okəsahahnəl. Toci Sesohs otiyəhal: Tan kekw ketilehtakiyən, nəkəsalehtak.

²⁸ Nit skat wen nekəmaw tanik mawipomacik okəcicitoniya kekwse weciyəhat nit.

²⁹ Kenok ankwəc litəhasoltowək ipəcəl Sota otiyin maninot, Sesohs okisiyəhan mənohmon tanil kekwsal pawatəməkw ociwikhəpaltimək, kesəna omilan kekwse təmaksəsowino.

³⁰ Nit kosimsənək apsəkikwsəsək nəkəsanotehe kis piskihe.

³¹ Nit tehc kisi notəhat Sesohs itəm: Tokec pəmawsowin 'Kwəssəl kci təmitəlamkosowəl.

³² Kelowəsit wecikcitemitəhamkosit ohəkek. Kelowəsit ninka okici təmitəhamalc ohəkek, onəkəsak citəmitəhamalc.

³³ Wasistək, mahəsəl mahkiyewos kowiceyolpa. Kilowahipac, tahalo iyalokpən Leswihsək tan tet elihay skat petapasoniya, nit na kilowaw iyalolekw.

³⁴ Piley həlkitəmowakən milekw, welaman kəseltoliniya. Tahalo nit elikselməlekw, nit na ktəlikseltoltiniya kilowaw.

³⁵ Nihtəc msiw wenik okəcicitoniya kilowaw kotəkehkimkosoltiniya nil nhəkek kseltoltiyekw.

³⁶ Simo Piyel 'tiyal: Nsakəmam, tama ktəli? Sesohs 'tasitemal: Tan elihay skat kisi nosokəwiw təkec; kenok elmihak nosokowic.

³⁷ Piyel 'tiyal: Nsakəmam, kekweci skat kisi nosokolo təkec? Npəmawsowakən ntəliponmənc oci kil.

³⁸ Sesohs 'tasitemal: Ktəliponmənc kpəmawsowakən oci nil? Leyo, yəhol, napahac skat mətehtaksiw akimte ktikənewalic nihi.