Wikhikən 12 - Wikhikәn 2014

¹ Toci, Sesohs kamacin kisokənək meskw nankənihakewe wikhəpaltimək, Petanik pəkəcihe tan Lasal eyit, tan wət kisi mehcinetpən, tanil Sesohs kisi pəmawsowehlatpənil.

² Nit tet etliwikwhəpalatit, Malt onotəmawa. Enokəlo Lasal nit peskw nekəmaw tanik mawihpomacik.

³ Toci Mali wihkwehton nkocitkikon sonhəkensot liwihtaso spciknalt, pokəkihe, seskewse, osonpekənəmowanəl Sesohsəl osihtəl, ocikasəmowanəl osihtəl ocikasəmowanəl osihtəl opiyesom ikək, winohcikwam psənakwheso sonhəkensot.

⁴ Toci nət peskw tanik weci kehkimocik ohəkek, Sota Iskaliyot liwiso, Simo 'kwəssəl, tan ketikinowehlat Sesohsəl itəm.

⁵ Kekw weci skat ankowehtasinokəs yot sohəkensot ocinsatkehtol tineliyəl? Tamahal newowinsk kisakihsowək, ənəpmilan təmaksəsowinowək?

⁶ Skat yot ociyitəmowən otəmitəhaman təmaksəsowino, kenok oci nekəm kəmotənesks, otiyin maninot, pəmipton tan kekw picetasik.

⁷ Toci Sesohs item: Ehkwihan ehpit: ociyines okisacihtəmən kiskət poskənimk.

⁸ Ecpilihil təmaksəsowinowək kmeci miwawak maweyiniyak; kenok nit skat kmecimi iyowepah.

⁹ Nit tehc ktanakwsowək Leswihsək kecicatit Sesohsəl otiyelin nit, pitapasowək skat tepəkt oci nekəm, kenok naka ocinəminhaya Lasaləl tanil Sesohs kisi pemawsowehlatpənil.

¹⁰ Kenok kcipahtəliyasək mawakənotəmatowək naka onepəhaniya Lasaləl.

¹¹ Ipəcəl oca nekəm ktanakwsopənik Leswihsək maciyapasitpənik, welamsətəmotopənik Sesohsəl ohəkek.

¹² Nit apc ehtaw kisok ktanakwsowək pəmawsowinowək tanik petapasicik wikhəpaltimək, notəmatit Sesohsəl ockoyehalin Selosalemk,

¹³ Wihkwehtoniyal psketkonol əpəs liwiso Piniks, otəlapasiniya otasikoniya, otokemoltowək, itəmotowək; Hosana! Nihtəna, kikikw təkec! Olehləkwsowəl Islel okinceməsməl, tanil weckocalicil Ksakəmamowa wisowən ikək.

¹⁴ Sesohs meskowat ewasisoyelicil cakhasəl, otesakopesinəl, tahalo elowikhasik,

¹⁵ Mosahk seksikəc Siyən otosəl! Sakihok kinceməsəm wicowihat otesakopitowal cakhas ocakhasisəməl.

¹⁶ Nihtəl kekwseyal wetikehkimocik skat onəstəmo tiliwnewihpən təmk. Kenok kisikcitəmitəhamkosit Sesohs omikwitəhatəməniyal nihtəl kekwsal ewikhasikil; naka Sesohsəl okisi lehtakanepənil nihtəl kekwseyal.

¹⁷ Nit tehc nekəmaw tanik wicewowatitpənik Sesohsəl tan toci weci notekimat Lasaləl poskənikənaləkok, pemawsowehlat nspiwolamhətowək.

¹⁸ Nit tehc mawihamək otasikowawal, cipəcəl okisi notəmaniya nekəm okisi lehtakan yot kinowaskoltikən.

¹⁹ Nit tehc Palosiyək iyalotoltowək: Skat knəmihtoniya skahəlkekw ktəlikisehtopa? Sakihok, skitkəmikw onəkanosokakon.

²⁰ Nit ankwoc Kəlikewiyək mawiyoltowək nekəmaw tanik kisic kowikwakwiyapasicik otimihaniya Selosalemk wikhəpaltimək.

²¹ Nekəmaw petapasowək Pilipk, tan 'cey Petsehtik, Koliletk, opapehcikesiniyal, itəmotowək: Sakəm, npawatəmənen nəmiyanin Sesohs.

²² Pilip pekəcihat otakənotəmowal Atəlewol akimte Atəle Palip petkawotowək otakənotəmowawal Sesohsəl.

²³ Sesohs 'tasitema: Tepənaskowihak ikehi pəmawsowin 'Kwəssəl okici təmitəhamkosin.

²⁴ Leyo, yəholekw, tanəc iyaka nkohciminkət hikliskalən skat əlipənekwihanok kətakəmikok skat mehcinewinək, nkotokahtek; kenok mehcinewik kceyawimin kasoc.

²⁵ Tan wət mosacit opəmawsowakən, okəskatonc. Kenok tan akwitehpatək opəmawsowakən yot skitkəmikw, otankewotəmən askəmawsowakən ikək.

²⁶ Wen lokewit nosokowic; tan nti, noskinosəm nit tetəc eyitəc. Wen lokewit Nmihtakws okici təmitəhamalc.

²⁷ Təkec ncəcakw omacitəhaso: kehkoc ntitəm? Nmihtakws, ocikikihin yot tpaskotikən! Kenok ociyot npəkəci yot tpaskotikənək.

²⁸ Nmihtakws, kci təmitəhatəmon kowisowən. Toci Kelowəsit notowah etlewestakw spəmkik itəm: Nkisikihi təmitəhatəmən, naka apc nkicihtəmitəhatəmənc.

²⁹ Nit tehc mawihamək tanik sekləticik kwihiw itəmotowək: Petakiw. Kətəkik itəmotowək: Aseliyəl okəlolkol.

³⁰ Sesohs itəm: Yot kəlowakən skat ocihikahew ociniy: kenok ociyekehi oci kilowaw.

³¹ Təkec yot skitkəmikw ətplotaso; təkec yot skitkəmikw okinceməsəməl ntiyakanc.

³² Nil owihi onakehlikw ktakəmikok nockowiphakc msiw pəmawsowinowək tan eyi.

³³ Yot weci itək otahkinowehton tanəc elimecinet.

³⁴ Pəmawsowinowək 'tasitemawal: Nocinotəmənenopən tpaskowakən ikək Niweskw askəmihiw. Kekwe wecihitəmən pəmawsowin 'Kwəssəl cowiyonakehlac? Wen iya notpəmawsowin 'Kwəssəl?

³⁵ Toci Sesohs 'tiya: Mahkiyew pəshakwhek wecihemkoniya. Pəmapasikw kwenihiyekw pəssakwek, welaman piskahtek skat ktələmihkakoniya; ipəcəl tan pemihat piskahtek skat okəcicitowən tan elihat.

³⁶ Kwenihiyekw pəssakwek olamsətəmokw pəsakwhek ikək, welaman okwasin pəshakwhek khəkewa. Yohtəl kekwsal Sesohs itəkil, macehe naka okwasohtowah.

³⁷ Kenok kak etociktanakətol kinowaskoltikənəl kisehtakpənil wewocəskowiw, skat olamsətəmoneyawipən ohəkek.

³⁸ Welaman Isayi nikanik cicitahkawino okəlosowakənəl, leyo tan itəkəs: Nsakəmamən, wen kisi olamsətəkəs ntakənotəmakənən? Wen Nsakəmamən opitin elemesowehtowəts?

³⁹ Nit tehc skat kisi wəlamsətəmotihtikopən, ipəcəl Isayi apc itəkəs:

⁴⁰ Okisinkapowehtowanəl osiskowal, naka, okisisaklihtowanəl oməshonowal; welaman skat ocinəmihtahtiwniyal osiskowal ocinsətəmotiwniyal oməshonowal, okwolpeh ləsoltiwniya nil nkisipilawənp.

⁴¹ Yohtəl kekwsal Isayi itəkəpənil, ilpəcəl onəmihtowanepən okici təmitəhamkosowakən, naka onəstohapənil.

⁴² Kenok ktanakwsowək potowəsowinowək welamsətəmoticik ohəkek, kenok oci Palosi skat opapehkinsətomoniya, skat oci notihnawənp himiyewikwamək.

⁴³ Ipəcəl opiyemi mosaciniya pəmawsowinowək oki ihitəmi təham kosowakənowa skatək. Kəlowəsit oki citəmitəhamkosowakən.

⁴⁴ Sesohs kintakwso, itəm: Tan welamsətək nhəkek skat [tepəkt] lcolamsətəmo nil nhəkek kenokəlo Nekəm ohəkek tan petəkimitpən.

⁴⁵ Tan nemihat onəmiyal Tanil petəkimitpənil.

⁴⁶ Npəkəci skitkəmikw npəshakwhan, welaman msiw wen tan welamsətək nhəkek, skatəp pəmohse piskahtetək.

⁴⁷ Tan wen notək ntəloswakənəl skat kəlnəmok, nil skat ntəplomao; kenok skat nocipəkəcihaw ntəplotəmən skitkəmikw, kenok wici pəkəcihay nkikehton skit kəmikw.

⁴⁸ Tan wen semahlit, skat wikwehtokw nkəlosowakənəl, otiywal tanil teplomcil. Kəlosowakən tan itəmanpən, nihtəc teplomal mcəsəlewe kiskət.

⁴⁹ Ipəcəl skat nocikəlosikopən nil nhəkek, kenok Nmihtakws tan petəkimitpən, Nekəm nmilkonepən həlkitəmowakən tan elewesto tan itəm.

⁵⁰ Nkəcicihton otəlkitəmowakən askəmawsowakəniw. Nit tehc tanil kekwsal nestomanil Nmihtakws tan ihitpən nit nestəm.