Wikhikən 19 - Wĭkheegŭn 1870

¹ Toocheu’ netwāje Peloot wekwĕhlal Sāsoosŭl ha oomatŭhal.

² Ha sŭmagŭnŭsŭk ootŭlŭskŭn‐wŏtŭmŭn’ea chetookā’pesoot’ menooseā’, ha oochetookā‐pela’nea, ha mooskwŏŏnĭmkwŏŏpĕhtĕh wesāgŭnŭsoot’ oonasāhtooŏnea.

³ Ha pĕtabase’neal, ha etŭmootooŭk: Koolasekoolpŭn kel kĭnchamŭsweŭn Lĕsweesooĭkŏŏk. Ha ookaske‐gwĕhtahawŏl.

⁴ Peloot apch ootŭlĭhan ha ootĭha: Sagĭhtŏŏk, n’pĕjĭpha āoolteĕkw koojĭkchĭjetoo’nea nel skat ’nmŭskŭmooŭn patawĕhkasooagŭn oohŭkĕk.

⁵ Netwāje wĕchkooe‐noodahat Sāsoos oopŭskŭmŭn chetookāpesoot’ menooseā’, ha neaga mooskwŏŏn‐ĭmkwŏŏpĕhtĕk wesā’gŭnŭsoot’, ha ootĭha: Sagĭhtŏŏk ooskedap’.

⁶ Netwāje k’chepatŭleasŭk ha noojĭkwŏŏnkateejĭk nĕmehatĭt, ŭksekowā‐wĕstootooŭk, etŭmootooŭk: Sedakwtaha’n! sedakwtaha’n! Peloot ootĭha: Kelooow’ wekwĕhlook ha sedakwtoohook! eebŭchŭl nel skat n’mŭshŭmooŭn patawĕh‐kasooagŭn oohŭkĕk.

⁷ Lĕsweesŭk ootasedāmawŏl: Bootoosooagŭn n’te’‐enā’n: ha neeloon n’bootoosooa’gŭnŭn ĕlkŭmawĭk chooe‐mĕche‐nĕp’; eebŭchŭl lĕhlŭsoopŭn Nŭkskam ookwŏŏsĭn.

⁸ Netwāje Peloot noodŭk yoot kŭlooswagŭn, oopeāmesĕksĭn,

⁹ Ha apch ŭksĕhĕ k’chesakŭmowĭgwamŭk, ha ootĭhal Sāsoosŭl: Tama’ ktŭtlāyow’? Kānookŭloo Sāsoos skadama ootasedĕmow’eŭl.

¹⁰ Toocheu’ Peloot ootĭhal: Skat kŭlooleu? skat ŭkŭjejetooŭn nel n’teĭn tŭpĕltŭmooagŭn ŭktasedakwtŭhoo’lŭn? ha neaga n’teĭn tŭpĕltŭmooagŭn ŭkpoonĕhlŭlŭn?

¹¹ Sāsoos asedāmat: Kel skatŭp ŭktëeewŭn tŭpĕltŭmooagŭn ooche nel, skat oochemĭl’oomook’ spŭmŭk. Netwāje nāgŭm nŭt tan melooĕt n’hŭk, peĕmkekoon lakŭmĭksooagŭn āĭt.

¹² Net wĕjātagāmŭk Peloot ootŭkwājeboonĕhlal. Kānookŭloo Lĕsweesŭk kĭntakwsooltooŭk etŭmootooŭk: Poonĕhlŭt wŏŏt ooskedap, skat koosewāwewŭn Sesŭl. Tan wĕn kesĕhlŭsĭt ookĭnchāmŭsooĭn, oonathŭmooŏl Sesŭlŭl.

¹³ Netwāje Peloot nootŭk yootŭl kŭlooswa’gŭnŭl, oonootĕphăl Sāsoosŭl ha ŭpĕssoo bootoosoo‐agŭne‐kwootŭpoot’, tan tĕt lewĭhtasoo Lapskŭneegŭn owt, ha Lĕsweesooŏdooāmŭk, Gabbata.

¹⁴ Net kesook oolăjooltĭn nankŭmehagāwā’ wĭkhŭpaltemŭk, ha tamahal’ paskwĕ. Ha ootĭha Lĕswees: Sagĭhŏŏk, kĭnchāmŭsmooŏh!

¹⁵ Kānookŭloo kĭntakwsooltooŭk: Ulmĭpha’n! ŭlmĭpha’n! sedâkwtŭha’n! Peloot ootĭha: n’tase’dakwtaha’ch kĭnchāmŭsŭmooŏ? K’chepatŭleasŭk ootasedāmawŏl: Skadama n’teewawĭn kĭnchāmŭs tĕpŏŏkt Sesŭl.

¹⁶ Toocheu netwāje oopoonātooŏnân’eal Sāsoosŭl oopeteenooŏk ootasedâkw‐tŭhaselĭn. Ha nāgŭmow wekwĕhlawŏl Sāsoosŭl, ha ootŭlĭphawŏl.

¹⁷ Ha pŭmegalal oochebeat‐koomŭl, ha ŭlĭhĕ net tan ĕlewĭhtasĭk, Oosŭgatŭp, tan Lĕswesooŏdooāmŭk lewĭhtasoo, Gŏlgŏta;

¹⁸ Tan tĕt ĕtle‐sedâkwtŭhatĭt, nāgŭm ha neaga sedâkwtŭhasooŭk kŭtŭkĭhĭ nesoo wejāachĭhĭ, tŭhĕdooĭkagoo, ha Sāsoos ā’baseu’.

¹⁹ Ha Peloot wesooŭnhasoo āwĭkhŭk, ha oosasetaskĕhtoon chebeatkŏŏk. Ha ŭlooĭkhasoo: Sāsoos Nasalĕtkāoo, Lesweesŭk ookĭnchāmŭsŭmooŏl.

²⁰ Netwāje yoot wesooŭnhasoo ŭktanâkwsooŭk Lĕsweesŭk ĕketŭmootĭt, eebŭchŭl net ĕtlesedâkwtŏŏhoot kweheu’ oodāānĕk; ha ŭlooĭkhasoo Lĕswesooŏdoowāweu’, ha Glekāwŏdoowāweu’, ha Lătŭnwŏdoowāweu’.

²¹ Netwāje Lĕsweesŭk ookechepatŭleasŭmooŏ ootĭhawŏl Pelootŭl: Moo sak ŭlooekŭmookŭch’, Lĕsweesŭk ookĭnchāmŭsŭmooŏl: ŭlooĭkhŭmoon’tak’: Eetŭmoopŭn nel Lĕsweesŭk ookĭnchāmŭsŭmooŏl.

²² Peloot asedāmat: Tan keswĭkhŭm, n’kesewĭkhŭmŭn.

²³ Toocheu’ sŭmagŭnŭsŭk kese sedakwtŭhatĭt Sāsoosŭl, wekwĕhtooŏn’eal oohŭlgwootāwa’gŭnŭl ha oonāwĭchpŭnmŭneal, ātăseu sŭma’gŭnŭs n’koojechpŭt; ha neaga ootŭpskwŏŏns. Net pŭskoonas skadama legwŏdĭgŭneu’, ha ooche‐maje‐atŭketa’hasoos’ kwŏŏnaskweu malŭmŭtā ĕmĕkāu’.

²⁴ Netwāje yŏŏhoodooltooŭk: Chegow’ skat skwŏŏskenā‐too’wŭkw, kŭtootĕhmowtooltenĕch tak wĕnŭch oomŭchĕsoom. Wĕlaman Nŭkskamwā Wĭkheegŭn tan eetŭmooĭk ŭlĭhĕ: Oosesĕnmân’eal n’tŭlkwŏŏtāwa’gŭnŭl, ha ookŭtootĕh‐mowtool‐te’nea n’tŭpskwŏŏns.

²⁵ Yootŭl kĕkwsăl sŭmagŭnŭsŭk ĕlookhŭteetĭtpŭnĭl. Ha kweheu’ skŭltooŭk Sāsoos oochebeatkoomŭk, Sāsoos wegoowŏŏsŭl, ha neaga Male Clopŭs oonesooeteejĭl, ha neaga Male Mădlān.

²⁶ Sāsoos netwāje nĕmĭhat wegoowŏŏsŭl ha neaga net noodŭkĕhkemoojĭl tanĭl moosalajĭl sĕhke kwĭheu’, ootĭhal wegoowŏŏsŭl: Apet, sagehan’ kwŏŏs.

²⁷ Toocheu’ ootĭhal noodŭkĕhkemoojĭl: Sagehan’ kegoowŏŏs’. Ha wĕjātagāmŭk net tŭpaskoodeegŭn nŭt noodŭkĕhkeemoot ootŭlĭphal weegŭk Sāsoos wegoowŏŏsŭl.

²⁸ Net agĭmte Sāsoos eebŭchŭl ookŭjejihtoon m’seu’kĕkwsăl tŭkā’ch n’keka‐kesātasĭn, wĕlamân Nŭkskamwā’ Wĭkheegŭn tan eetŭmooĭk kesātasoop, eetŭm: N’kŭtoowŏŏsŭm.

²⁹ Net malĭkeĕsees net ŭpoo p’sŭnpĕ peneegŭl; ha oochĭpsŭnpātoo’nea sĭnkŭlateegŭn, ha oonasakw’hŭmŭn’ea ha ootŭlakwhŭmooŏn’ea ootoonŭk.

³⁰ Sāsoos netwāje kes mĕs’ŭnŭk peneegŭl, eetŭm: Kesātasoo ha ŭlaagoo, ha ĕkoolamoo.

³¹ Netwāje Lĕsweesŭk eebŭchŭl oolajooagŭnekeesook net keesook, wĕlamân m’hŭkeŭl skatŭp ëeuëŭl chebeatkwĭkŏŏk atlasĭmooe‐kesookŭk, eebŭchŭl net atlasĭmooekesook k’chekeesook net, oopagoowŏŏma’nea Pelootŭl ookatooŏl tŭmĭhtĕhmoo‐ootŭp ha pŭlewooplĭphak.

³² Netwāje sŭmagŭnŭsŭk pĕdabase’nea ha tŭmĕhtooŏn’eal tŭmkāwāâl ookatŭl ha neaga kŭtŭkĭl tanĭl wej’e‐sedakwtoohoot.

³³ Kānookŭloo pĕjeëeatĭt Sasoosŭl ha nĕmehatĭl oomĕchenalĭn tŭkā’ch, skatama ootĕmĕhtooow’neal ookatŭl.

³⁴ Kānookŭloo pĕskw nĭkt sŭmagŭnŭsŭk oosaphal ĕpmĕlwalĭt tŭkŭteegŭnŭk, ha nŭkŭsaeu’ pŭgahkŭn ha samagwŏn wĕjesakheejooŭk.

³⁵ Ha nŭt tan kese‐nŭmĭhtakw kesĭnspeuwŏŏlamĕh, ha oonŭspeuwŏŏlâmāwagŭn oolamāweu’, ha ookŭjejĭhtoon tan eetŭk oolamā, wĕlaman kelooow’ neaga koolamsŭtŭmootenea’p.

³⁶ Ebŭchŭl yootŭl kĕkwsâl wĕjekesātasegĭl wĕlamân tan Nŭkskamāwā’ Wĭkheegŭn edŭmooĭk, ŭlāu: Pĕskoon ooskŭneesŭm skatŭch tŭmĕhtaseu’.

³⁷ Ha apch kŭtŭk tan āwĭkhasĭk Nŭkskamāwā’ Wĭkheegŭn ĭkŏŏk, eetŭmooĭk: Ootŭsagehawŏl’ch nāgŭm tanĭl saphatĭtpŭnĭl.

³⁸ Ha agĭmtĕ yoot, Soosĕp tan tŭlā’ Alĭmŭteâk, tan Sāsoos oohŭkĕk wĕtŭkĕhkemoot’, kānookŭloo ke’gemeu’ eebŭchŭl oonŭgaala Lĕswees, pagoowŏŏman Pelootŭl ookesĕltŭmagoon oomajĕptooŏn Sāsoosŭl oohŭk: ha Peloot ookesĕltŭmooŏn. Netwāje pŭkŭchehĕ ha oomajĕptooŏn oohŭk Sāsoosŭl.

³⁹ Ha neaga Nĭkoodĕm pŭkŭchehĕ tan tŭmk oopŭkŭchehanāāpŭnĭl Sāsoosŭl ne’baeu’, ha oopĕjĭptoon [n’pesoonŭl] mŭl ha alos wowëŭkĭhĕ tamaha’l n’koodât’kw kĕsĭtkeegoon.

⁴⁰ Toocheu’ wĭhkwĕhtoo’ŏnea Sāsoosŭl oohŭk’, ha wĭsĕgĕhlawŏl atoolhawā’gŭnŏŏk, maweu yootŭl melepookĭl: tan Lĕsweesŭk eelĕhlahtĭt n’pooenooŭl pooskŭnatĭt.

⁴¹ Net tan tĕt ĕtlesedâkwtŭhootpŭn n’pesoonkĭkan ëupŭn, ha n’pesoonkĭkanŭk ëupŭn pelā’ pooskŭnegŭnalŭkw, net tĕt mĕsk wĕn māch kese poonawŭnaweepŭn.

⁴² Netwāje net tĕt poonatĭt Sāsoosŭl ooche Lĕsweesŭk oolajoo‐agŭne‐keesookŭmoowŏ; eebŭchŭl net pooskŭnegŭnalŭkw kwĭheu ëupŭn.