Zakarias 7 - BIBLIA - traduson antigu in Krioulo

Junjun ku Deus ka kontenti ku el

¹ Na dia 4 di nonu mis, ku sedu mis di Kisleu, na kuartu anu di renansa di rei Dariu, SIÑOR bin papia ku Zakarias.

² Jinti di Betel manda Sarezer ku Rejen-Melek, ku se omis, pa e buska fabur di SIÑOR.

³ E bai pa anunsiaduris ku saserdotis ku staba na kasa di SIÑOR ku ten tudu puder, e punta: “No dibi di cora na kintu mis, ku junjun, suma ku no tarda ta fasi na manga di anu ku pasa?”

⁴ Asin SIÑOR ku ten tudu puder bin papia ku mi, i falan:

⁵ “Papia ku tudu pobu de tera, ku saserdotis, bu punta elis: ‘Oca ku bo junjuŋa, bo cora, na kintu mis ku setimu mis, duranti e setenta anu di katiberasku, i pa mi ku bo junjuŋa, pa mi propi?

⁶ Oca ku bo kume bo bibi, i ka pa bos ku bo na kumeba, bo bibi?

⁷ Bo ka obi palabras ku SIÑOR papia na boka di anunsiaduris antigu, oca ku Jerusalen, ku tabankas na roda, ku ladu di sul ku kau rasu, teneba manga di jinti; kusas na kuriba diritu ku elis?’ ”

Disobdiensia ku tisi kastigu

⁸ SIÑOR bin papia ku Zakarias, i falal:

⁹ “Asin ku SIÑOR ku ten tudu puder fala disna: ‘Bo fasi justisa di bardadi, bo mostra bondadi ku pena, kada un pa si ermon.

¹⁰ Ka bo kalka viuva, nin orfan, nin stranjeru nin koitadi; ka ningin pensa na si korson fasi mal kontra si ermon.’

¹¹ Ma elis, e ka mistiba obi, e ntema, e dan kosta, e tapa se orejas.

¹² E pui se korson risu suma pedra, pa e ka obi lei, nin palabras ku SIÑOR ku ten tudu puder, pa meiu di si Spiritu, manda fala na boka di anunsiaduris di ki tempu. Pabia di kila, SIÑOR ku ten tudu puder paña raiba dimas.

¹³ “N coma, e nega obi; asin tambi e coman, ma ami N ka obi.” Asin ku SIÑOR ku ten tudu puder fala.

¹⁴ “N pajiga elis ku garandi turbada na metadi di tudu nasons ke ka kunsiba; tera ke fika tras i dana tok ningin ka pudi pasa la pa kualker ladu. Asin ke fasi ki tera bonitu torna lala.”