Zakarias 6 - BIBLIA - traduson antigu in Krioulo

Oitavu vison — kuatru karu

¹ Utru bias N yalsa uju, N oja kuatru karu ku sai na metadi di dus monti di bronzi.

² Kabalus di ki purmeru karu i burmeju, di sugundu, pretu,

³ di terseru karu, branku, di kuartu, kastañu. Elis e forti.

⁴ N punta anju ku na papiaba ku mi: “Siñor, es i ke?”

⁵ Anju ruspundi i falan: “Esis i ki kuatru bentu di seu ku na sai di kau ke firmaba dianti di SIÑOR di tudu mundu.

⁶ Karu ku tene kabalus pretu na bai pa tera di norti, ki brankus na bai pa ladu di kaida di sol; karu ku tene kabalus kastañu na bai pa tera di sul.”

⁷ Oca ku ki kabalus forti na sai, e na turmentaba pa bai dianti, pa yanda na tudu parti di mundu. Anju fala: “Bo bai bo yanda na tudu mundu.” Asin e bai yanda pa tudu parti di mundu.

⁸ I coman, i fala: “Jubi, kilis ku na bai pa tera di norti e pui ña Spiritu pa i diskansa na tera di norti.”

Koroa pa Josué

⁹ SIÑOR bin papia ku mi, i falan:

¹⁰ “Eldai, Tobias ku Jedaias, ku seduba katibus, e bin di Babilonia, e yentra na kasa di Josias, fiju di Sofonias. Bai la,

¹¹ bu risibi prata ku uru, bu kumpu koroa, bu pul na kabesa di Josué, fiju di Jeozadak, ŝef di saserdotis,

¹² bu falal kuma SIÑOR ku ten tudu puder fala: ‘Ali omi ku tene nomi di Ramu; i na kirsi na kau ki sta nel, i na kumpu kasa di SIÑOR.

¹³ El mesmu i na kumpu kasa di SIÑOR; i na dadu gloria suma rei, i na sinta na si tronu, i guberna. I na sedu tambi saserdoti na si tronu; i na junta ki dus tarbaju ku pas.’

¹⁴ “Koroa na sta na kasa di SIÑOR suma lembransa di Eldai, Tobias, Jedaias, ku En, fiju di Sofonias.

¹⁵ Kilis ku sta lunju na bin juda lantanda kasa di SIÑOR. Abos bo na sibi kuma i SIÑOR ku ten tudu puder ku mandan pa bos. Es i na sedu, si bo pui sintidu pa obi vos di SIÑOR bo Deus.”