Zakarias 4 - BIBLIA - traduson antigu in Krioulo

Kintu vison — Kanderu di uru

¹ Anju ku na papiaba ku mi i riba, i dispertan suma algin ku kordadu na sonu.

² I puntan: “Ke ku bu na oja?” N falal: “N oja un kanderu, tudu di uru, ku un parti la riba pa pui azeiti, ku si seti lampada, ku seti tubu, un tubu pa kada lampada.

³ Lungu del i ten dus olivera, un na ladu direita di kanderu, ku utru na ladu skerda.”

⁴ N punta anju ku na papiaba ku mi: “Siñor, es i ke?”

⁵ I puntan: “Bu ka sibi es i ke?” N falal: “Nau, Siñor.”

⁶ I ruspundi i falan: “Es i palabra ku SIÑOR misti papia ku Zorobabel: ‘I ka ku forsa di gera nin ku violensia, ma i ku ña Spiritu.’ Asin ku SIÑOR ku ten tudu puder fala.

⁷ Montaña garandi, abo i kin? Dianti di Zorobabel bu na sedu suma kau rasu, pabia el i na koloka pedra di kabantada, nkuantu jinti na grita ku kontentamentu, e na fala: ‘I bonitu! I bonitu!’ ”

⁸ SIÑOR torna bin papia ku mi, i falan:

⁹ “I mon di Zorobabel ku pui alisersu de kasa; si mon tambi ku na kabantal, pa bo pudi sibi kuma i SIÑOR ku ten tudu puder ku mandan pa bos.

¹⁰ Kin ku ta njuti dia di kusas pikininu? Jinti na kontenti ora ke oja prumu na mon di Zorobabel. “Ki seti uju i ujus di SIÑOR ku ta pasa na tudu mundu.”

¹¹ N papia mas, N punta anju: “Ki dus olivera na direita ku skerda di kanderu, ke ke sedu?”

¹² N puntal tambi: “Ki dus ramu pikininu di olivera ku sta lungu di dus tubu di uru ku ta leba azeiti kor di uru, i ke?”

¹³ I puntan: “Bu ka sibi esis i ke?” N falal: “Nau, Siñor.”

¹⁴ I falan: “Esis i ki dus jinti ku unjidu ku azeiti pa sirbi SIÑOR di tudu mundu.”