Zakarias 2 - BIBLIA - traduson antigu in Krioulo

Terseru vison — Jerusalen mididu

¹ N torna yalsa uju, N oja un omi ku teneba na si mon un korda di midi.

² N puntal: “Nunde ku bu na bai?” I ruspundin: “Pa midi Jerusalen, pa jubi kal ki si largura ku si kumprimentu.”

³ Anju ku na papiaba ku mi i sai. Utru anju bai dal kontrada,

⁴ i falal: “Kuri bu fala ki joven: ‘Jerusalen na sedu un prasa sin mura, pabia di manga di jinti ku limarias ku na mora la.

⁵ SIÑOR fala kuma i na sedu un mura di fugu na roda di prasa, kuma el mesmu i na sedu si gloria na metadi del.’ ”

Katibus comadu pa riba pa se tera

⁶ SIÑOR fala: “No bai! N pajiga bos suma kuatru bentu di seu, ma gosi N na fala bos: Bo kuri di tera di norti.

⁷ O Sion, libra bu kabesa, abo ku mora na Babilonia,

⁸ pabia kil ku toka na bo i toka na minina di ña uju.” SIÑOR ku ten tudu puder mandan pa ki nasons ku roba bos kusas, pa N fala elis:

⁹ “N na yalsa mon riba di bos; bo katibus na roba bos kusas. Asin bo na sibi kuma i SIÑOR ku ten tudu puder ku mandan.”

¹⁰ SIÑOR fala: “O Sion, kanta, bu kontenti, pabia N na bin mora na bu metadi.”

¹¹ Na ki dia manga di nason na bin pa sta juntu ku SIÑOR, e na sedu si pobu. El i na mora na bu metadi. Bu na sibi kuma SIÑOR ku ten tudu puder mandan pa bo.

¹² SIÑOR na tene Judá suma si yardansa na tera sagradu; i na torna kuji Jerusalen.

¹³ Pa tudu jinti kala dianti di SIÑOR, pabia i lanta di si morada sagradu.