Zakarias 1 - BIBLIA - traduson antigu in Krioulo

Jinti comadu pa e ripindi

¹ Na oitavu mis di sugundu anu di renansa di Dariu, rei di Persia, SIÑOR bin papia e palabra pa anunsiadur Zakarias, fiju di Barakias, fiju di Idu.

² “Ami, SIÑOR, N tenba garandi raiba kontra bo papes.

³ Asin, konta pobu kuma SIÑOR ku ten tudu puder fala: Bo riba pa mi; N ta riba pa bos.

⁴ Ka bo sedu suma bo papes, ku ki purmeru anunsiaduris coma, e fala elis kuma, SIÑOR ku ten tudu puder fala pa e konverti di se mau kamiñus, ku kusas mau ke fasi, ma e ka seta obi, nin e ka para sintidu.

⁵ Bo papes, nunde ke sta nel? Ki anunsiaduris na bibu pa sempri?

⁶ Nta ña palabras ku ña avisus ku N manda na boka di ña servus anunsiaduris ka yangasa bo papes? E ripindi, e fala: ‘SIÑOR ku ten tudu puder fasinu ke ku no mersi, suma ki puiba sintidu pa fasinu, konformi no manera di yanda, ku kusas ku no fasi.’ ”

Purmeru vison — kabalus

⁷ Na dia 24 di mis di 11, ku sedu mis di Sebat, na sugundu anu di Dariu, SIÑOR bin papia ku anunsiadur Zakarias, fiju di Barakias, fiju di Idu.

⁸ Di noti ami, Zakarias, N teneba vison, N oja un omi montadu na kabalu burmeju. I para na metadi di murteras ku staba na un kobon fundu. Tras del i staba kabalus burmeju, kastañu ku branku.

⁹ N punta: “SIÑOR, esis i kin?” Anju ku na papiaba ku mi falan: “Ami N na bin mostrau kin ke sedu.”

¹⁰ Dipus, ki omi ku staba na metadi di murteras fala: “Esis i kilis ku SIÑOR manda pa e yanda na tudu parti di mundu.”

¹¹ E bai pa anju di SIÑOR ku staba na metadi di murteras, e falal: “No yanda ja na tudu parti, no oja kuma tudu mundu sta na diskansu ku pas.”

¹² Anju di SIÑOR fala: “O SIÑOR ku ten tudu puder, kal tempu ku bu na torna sinti pena di Jerusalen ku prasas di Judá, manera ki fasi ja setenta anu ku bu raiba kontra elis?”

¹³ SIÑOR ruspundi ku bon palabras di konsolason pa anju ku na papiaba ku mi.

¹⁴ Ki anju falan: “Anunsia kuma SIÑOR ku ten tudu puder fala: ‘N ten garandi siumi pa Jerusalen ku Sion,

¹⁵ ma N ten raiba ciu dimas kontra ki nasons ku sinti fiansadu, pabia ami N tenba un bokadiñu di raiba kontra ña pobu, ma ki nasons e buri elis kastigu.’

¹⁶ “Pabia di kila, SIÑOR fala asin: ‘N na riba pa Jerusalen ku pena pa ña pobu; ña kasa na torna kumpudu la. Korda di midi na distindidu riba di Jerusalen.’ Asin ku SIÑOR ku ten tudu puder fala.

¹⁷ “Anunsia utru bias kuma SIÑOR ku ten tudu puder fala: ‘Ña prasas na torna inci bon kusas, pabia SIÑOR na konsola Sion, i na kuji Jerusalen.’ ”

Sugundu vison — kuatru cifri ku kuatru fereru

¹⁸ N yalsa uju, N oja kuatru cifri.

¹⁹ N punta ki anju ku na papiaba ku mi: “Es i ke?” I falan: “Es i sedu puderis ku pajiga Judá, Israel ku Jerusalen.”

²⁰ Dipus, SIÑOR mostran kuatru fereru.

²¹ N puntal: “Ke ku esis bin fasi?” I falan: “Ki cifris pajiga Judá tok ningin ka pudi lantanda kabesa, ma e fererus bin pa pantanda, pa bati puder di ki nasons ku lantanda se puder kontra tera di Judá, pa pajiga si pobu.”