Titu 3 - BIBLIA - traduson antigu in Krioulo

Manera di yanda suma krenti

¹ Lembranta elis pa e baŝa pa gubernu ku otridadis, pa e obdisi elis, pa e sta pruntu pa fasi tudu bon tarbaju,

² pa ka e fala mal di ningin, ka e buska palabra, ma pa e mostra pasensa, e sedu mansu pa tudu jinti.

³ Purmeru, asin ku no seduba: tulu, disobdienti, eradu, katibus pa tudu koldadi diseẑu mau, ku gozu di mundu. No ta yandaba na malisia ku nveẑa; no odiaduba, no ta odia utru jinti tambi,

⁴ ma oca ku Deus no Salbadur mostra si bondadi ku si amor pa jinti,

⁵ i salbanu; i ka pabia di kualker kusa bon ku no fasi, ma i pabia di si miserikordia ki labanu, i danu nobu nasimentu, un vida nobu di Spiritu Santu.

⁶ I darma si Spiritu ciu riba di nos pabia di Jesus Kristu no Salbadur,

⁷ pa no pudi ojadu justu dianti di Deus pabia di si fabur, pa no bin tene vida ku ka ta kaba, konformi speransa ku no ten.

⁸ Es i palabra ku bu pudi fia nel. Konta e kusas ku firmesa, pa tudu kilis ku fia na Deus pui sintidu pa da se tempu pa fasi bon tarbaju. I ka son kuma i bon, ma i di purbitu pa tudu jinti.

⁹ Libra di purfias di tulesa, ku ki listas di jinti antigu, ku jus, ku diskuti kusa di lei, pabia i ka ten purbitu; i suma nada.

¹⁰ Algin ku ta tisi rapatimentu, dal avisu te dus bias. Dipus, bu libra del.

¹¹ Bu sibi kuma jinti di ki koldadi e tortu; e ta fasi mal, e na kondena se kabesa.

Manteña di kabantada

¹² Ora ku N mandau Artemas o Tíkiku, fasi forsa pa bin nunde mi na Nikópolis, pabia la ku N rezolvi pasa cuba nel.

¹³ Fasi mpeñu pa juda Zenas, pursor di lei, ku Apolu, pa nada ka falta elis na bias.

¹⁴ No jinti dibi di buska sibi pui sintidu na bon tarbaju, pa e tene tudu ki pirsis, pa ka e sedu amonton.

¹⁵ Tudu jinti ku sta ku mi e mandau manteña. Fala kilis ku amanu na fe manteña. Fabur di Deus ta sta ku bos tudu.