Tiagu 5 - BIBLIA - traduson antigu in Krioulo

Avisu pa rikus

¹ Agora abos rikus, bo sukuta. Bo cora, bo grita pabia di disgrasa ku na bin riba di bos.

² Bo rikesa na podrisi; bo ropa, bicu na kumel.

³ Bo uru ku prata feruẑa. Si ferús na da tustumuñu kontra bos, i na kume bo karni suma fugu. Bo junta rikesa na dia ku pertu kaba.

⁴ Diñeru ku bo ka paga tarbajaduris ku kebra na bo lugar i na grita. Gritus di kebraduris ciga na oreja di Siñor ku ten tudu puder.

⁵ Bo vivi na mundu ku manga di ronku ku alegria. Bo ngorda bo korson suma limaria ku algin na kria pa mata.

⁶ Bo kondena, bo mata kil ku ka ten kulpa, ku ka tenba forsa pa luta ku bos.

Pasensa ku orason

⁷ Asin ermons, bo ten pasensa te ora ku Siñor na bin. Bo oja kuma ku labradur ta pera pa si con da bon frutu. I ta pera ku pasensa tok i risibi purmeru cuba ku kil di kabantada.

⁸ Bo sedu tambi pasenseru asin; bo tesanta bo korson, pabia Siñor pertu bin.

⁹ Ka bo keŝa kontra ŋutru, ermons, pa ka bo bin julgadu. Bo oja juis na porta ja.

¹⁰ Ña ermons, bo lembra di anunsiaduris ku falaba na nomi di Siñor. Bo toma se isemplu di pasensa na sufrimentu.

¹¹ No ta fala kuma kilis ku nguenta fadiga e sortiadu. Bo obi pasensa di Jo; bo oja fin ku Siñor dal, pabia Siñor ta sinti garandi pena ku miserikordia.

¹² Riba di tudu, ña ermons, ka bo jurmenta, nin pa seu, nin pa tera, nin ka bo fasi utru koldadi juramentu. Bo palabra dibi di sedu “Sin” si i sin, “Nau” si i nau, pa ka bo kai na kondenason.

¹³ I ten algin fadigadu na bo metadi? Pa i ora. Algin sta kontenti? Pa i kanta i ngaba Deus.

¹⁴ Utru sta duenti na bo metadi? Pa i coma garandis di igreẑa pa e ora riba del, e untal azeiti na nomi di Siñor.

¹⁵ Orason di fe i ta salba ki duenti; Siñor ta lantandal. Si kontra i fasi kualker pekadu, i ta purdadu el.

¹⁶ Asin bo ta konfesa ŋutru bo pekadu, bo ora pa ŋutru, pa bo kuradu. Orason ku un algin justu fasi i ten puder; i ta da bon rusultadu.

¹⁷ Elias seduba koldadi di omi suma nos, ma i ora Deus pa cuba ka cubi; cuba ka cubi tris anu ku seis mis.

¹⁸ I torna ora mas; cuba cubi; con da frutu.

¹⁹ Ña ermons, si un di bos disvia di kamiñu di bardadi, si algin ribantal,

²⁰ i ta sibi kuma, kil ku ribanta algin di si kamiñu mau, i na salba un alma di mortu, i na kubri manga di pekadu.