Tiagu 4 - BIBLIA - traduson antigu in Krioulo

Deus gosta di kilis ku ta baŝa se kabesa

¹ Ki geras ku jus na bo metadi, nunde ke sai nel? Nta e ka bin di diseẑus ku bo ten ku na luta dentru di bos?

² Bo ta kubisa; bo ka tene nada. Bo ta mata, bo ta nveẑa; nada bo ka ta yangasa. Bo ta luta, bo ta geria; nada bo ka ta tene pabia bo ka ta pidi.

³ Si bo pidi, bo ka ta risibi, pabia bo ta pidi mal, son pa bo gasta na bo vontadi.

⁴ Abos jinti ku ka fiel pa Deus, bo ka sibi kuma amisadi ku mundu i inimisadi ku Deus? Asin, kil ku misti sedu amigu di mundu i ta bida inimigu di Deus.

⁵ Bo kuda kuma Skritura fala amonton kuma, spiritu ku Deus pui na nos i kumboseru?

⁶ Ma fabur ku Deus da i mas garandi. E ku manda Skritura fala: “Deus i sta kontra jinti ku ta yalsa se kabesa, ma i ta mostra fabur pa kilis ku ta baŝa se kabesa.”

⁷ Asin, bo baŝa pa Deus; bo firma kontra diabu; i ta kuri di bos.

⁸ Bo ciga pertu di Deus; i ta ciga pa bos. Bo limpa bo mon, abos ku ta fasi pekadu; abos di dus sintidu, bo purifika bo korson.

⁹ Bo sinti tristi, bo miskiña, bo cora. Bo grasa pa i bida cur; bo alegria pa i bida tristesa.

¹⁰ Bo baŝa dianti di Siñor; el i ta lantanda bos.

Ka bo kritika ŋutru

¹¹ Ermons, ka bo fala mal di ŋutru. Kil ku na fala mal di si ermon, o i kritikal, i na fala mal di lei, i na julga lei. Si bu na julga lei, bu ka sedu obdisidur di lei, ma si juis.

¹² I ten un son ku ta da lei; i el ki juis. I el ku pudi salba, i pudi dana. Abo i kin ku na kritika bu kumpañer?

Avisu kontra njatamentu

¹³ Agora bo sukuta, abos ku ta fala asin: “Aos o amaña no na bai pa tal prasa; no na fika la un anu pa no nogosia, pa no ngaña.”

¹⁴ Ma nin bo ka sibi ke ku na sedu amaña. Ke ki bo vida? Bo sedu suma un fumu ku lanta; un bokadu i ta pirdi.

¹⁵ Kusa ku bo dibi di fala i asin: “Si Deus kiri, i danu vida, no ta fasi ’sin ku ’sin.”

¹⁶ Ma abos bo ta njata na bo fiansa. Tudu njatamentu de koldadi i mau.

¹⁷ Kil ku sibi fasi ben, i ka fasil, i na fasi pekadu.