Tiagu 3 - BIBLIA - traduson antigu in Krioulo

I pirsis toma sintidu ku lingua

¹ Ña ermons, i ka bon pa manga di bos sedu mestres. Bo sibi kuma anos mestres no na julgadu mas forti.

² Anos tudu no ta yara ciu, ma si algin ka ta yara na palabra, si dunu i diritu, i pudi tambi manda na tudu si kurpu.

³ Si no pui freiu na boka di kabalu pa i pudi obdisinu, no ta pudi gia tambi tudu si kurpu.

⁴ Bo jubi tambi barku. Nin ki garandi, ku ta lebadu pa forti bentu, un lemisiñu ta viral pa lugar ku kapiton misti bai.

⁵ I suma lingua tambi; i un kusa pikininu, ma i ta njata kusas garandi. Bo oja kuma un matu garandi, fugusiñu pudi kemal.

⁶ Lingua tambi i un fugu, i un mundu di maldadi. I un parti ku sta na nos ku ta susa tudu no kurpu. I ta yardinti tudu no vida, na no manera di yanda. Lingua propi, i nfernu ku ta sindil ku si fugu.

⁷ Tudu koldadi limaria ku kacu, ku kilis ku ta rasta ku bariga, ku limarias di mar, e pudi mansadu; jinti mansa elis ja,

⁸ ma nin un algin ka pudi mansa lingua. I un mal ku ka ta pudi friantadu. I inci ku venenu ku ta mata.

⁹ Ku el no ta fala ben di Deus no Pape; ku el tambi no ta fala mal di jinti ku kumpudu na parsensa di Deus.

¹⁰ Na un boka i ta sai palabra bon ku palabra mau. Ña ermons, i ka dibi di sedu asin.

¹¹ Nta na un uju di fonti i pudi sai yagu dos ku yagu malgos?

¹² Ermons, pe di figu pudi padi azeitona? O pe di uva pudi padi figu? Asin tambi un fonti ka pudi da yagu salgadu ku yagu dos.

Jiresa ku bin di riba

¹³ I ten na bo metadi algin jiru o ntindidu? I dibi di mostral ku si bon vida, ku kusas ki ta fasi na mansesa ku bin di jiresa.

¹⁴ Si bo ten forti nveẑa, bo misti tudu pa bo kabesa, ka bo njata, nin ka bo konta mintida kontra bardadi.

¹⁵ Es i ka jiresa ku bin di riba, ma i di tera, di no naturesa di limaria; i bin di dimoniu.

¹⁶ Nunde ku jinti ten nveẑa, ku kubisa, falta di ordi ta sta la, ku tudu koldadi mal,

¹⁷ ma jiresa ku bin di riba, purmeru i ta sedu puru, i ta buska pas, i sedu mansu, ntindidu, i ta mostra pena, ku frutu di bon obras; i ka ta fasi skuju, i ka finjidu.

¹⁸ Kilis ku ta buska pas e ta sumia ku spiritu di pas, e ta kebra frutu di un vida justu.