Tiagu 2 - BIBLIA - traduson antigu in Krioulo

Ka bo fasi skuju di jinti

¹ Ña ermons, suma ku bo ten fe na no Siñor Jesus Kristu ku rena na gloria, ka bo fasi diferensa di jinti.

² Si i yentra na bo kultu un omi ben bistidu, ku anel di uru, i yentra utru koitadi ku ropa beju,

³ bo mostra mas rispitu pa kil ku sta ben bistidu, bo falal: “Fasi fabur, bu sinta li,” bo fala ki koitadi: “Sikidu li,” o bo falal: “Sinta bas di mi,”

⁴ nta bo ka fasi skuju na bo metadi? Bo sedu juis ku tene mau pensamentu.

⁵ Ña kiridu ermons, bo sukuta. Deus kuji koitadis de mundu pa e sedu riku na fe, pa e yarda renu ki fala i na da kil ku amal,

⁶ ma abos bo lebsi koitadi. Nta i ka rikus ku na kalka bos, e na rasta bos pa tribunal?

⁷ I ka elis ku na fala mal di bon nomi ku bo comadu?

⁸ Bo na fasi diritu si bo obdisi lei di renu ku sta na Skritura, ku fala: “Ama bu kumpañer suma bo propi.”

⁹ Ma si bo na fasi skuju di jinti, bo na fasi pekadu; lei na kondena bos suma kebraduris di lei.

¹⁰ Kil ku guarda tudu lei, i yara na un puntu son, i ta sedu kulpadu di tudu.

¹¹ Kil ku fala: “Ka bu dita ku algin ku bu ka kasa ku el,” i fala tambi: “Ka bu mata.” Asin, nin ku bu ka kai na pekadu seksual, si bu mata algin, bu sedu kebradur di lei.

¹² Bo fala, bo yanda, suma jinti ku na julgadu pa lei ku ta liberta.

¹³ Kilis ku ka ten miserikordia pa utrus, e na julgadu sin miserikordia. Miserikordia ta ngaña riba di julgamentu.

Fe ku obras

¹⁴ Ña ermons, ke ki bali pena si algin fala kuma i ten fe, ma i ka fasi nada pa mostral? Nta ki fe pudi salbal?

¹⁵ Si un ermon macu o femia ten falta di ropa, i ka tene tambi kusa di kume ki dia,

¹⁶ un di bos falal: “Bai, Deus kumpañau; bu bai kenta, bu farta!” bo ka dal gora nada ki pirsisa pa si kurpu, ke ki bali?

¹⁷ Asin tambi ku fe son, si i ka mostra na kil ku si dunu fasi, i sta mortu.

¹⁸ Utru na fala: “Un algin pudi ten fe, utru i ta tarbaja.” Mbon, ki algin pa i mostra si fe sin fasi nada; ami N ta mostrau ña fe ku ña tarbaju.

¹⁹ Bu fia kuma Deus i un son. Bu fasi ben. Dimonius tambi fia, tok e ta tirmi!

²⁰ Abo, omi ku ka ten sintidu, bu misti sibi kuma fe sta mortu si i ka liga ku tarbaju?

²¹ Nta i ka kusa ku no pape Abraon fasi ku manda i comadu justu, oca ki da si fiju Isak suma sakrifisiu na altar?

²² Bu oja ben kuma fe junta ku tarbaju; tarbaju kompleta fe.

²³ Asin ki sedu suma ku Skritura fala: “Abraon fia na Deus. E ku manda i ojadu justu, i comadu amigu di Deus.”

²⁴ Bo oja kuma omi ojadu justu pabia di ke ki fasi; i ka son pa fe.

²⁵ Asin tambi ki sedu ku ki minjer di mau vida, Raab. I ojadu justu pabia di kil ki fasi, oca i risibi ki spions na si kasa, i fusinti elis na utru kamiñu.

²⁶ Suma ku kurpu sin folgu sta mortu, asin tambi fe, si i ka mostra na obras, i sta mortu.