Tiagu 1 - BIBLIA - traduson antigu in Krioulo

Manteña

¹ Ami Tiagu, servu di Deus ku Siñor Jesus Kristu, N na manda manteña pa dozi jorson di Israel ku spaja na mundu.

Fe ku jiresa

² Ña ermons, ora ku bo ten ku pasa manga di koldadi probason, bo fasi di konta kuma bo sortiadu.

³ Bo sibi kuma probason di bo fe i ta da bos pasensa.

⁴ Bo disa pasensa tarbaja na bos diritu, pa bo pudi kabanta sedu kompletu, pa ka bo falta na nada.

⁵ Si un di bos ka sibi ke ki dibi di fasi, pa i pidi Deus jiresa; i ta dadu. Deus ta da tudu jinti ku vontadi; i ka ta nfastia.

⁶ Ma pa ki algin pidi ku fe; ka i duvida, pabia algin ku ta duvida, i suma onda di mar ku bentu na bulbuli, i na fercadu pa kada ladu.

⁷ Un algin asin, ka i kuda kuma Siñor na dal kualker kusa.

⁸ Un omi di dus sintidu i ka di fiansa na tudu ki ta fasi.

Koitadis ku rikus

⁹ Ermon koitadi pa i kontenti ora ku Deus lantandal.

¹⁰ Ermon riku dibi di kontenti si Deus baŝal, pabia si vida na disparsi suma flor na matu.

¹¹ Sol ta lanta, i ta yardi ku si kalur, i ta seka plantas; flor ta kai, si bonitasku ta kaba. Asin tambi ku rikus ta murca na se vida, tok e pirdi.

Forsa na tentason

¹² Sortiadu un algin ku nguenta tentason, i fika fiel, pabia, dipus di pasa proba, i ta risibi premiu ku sedu vida ku Deus fala i na da kilis ku amal.

¹³ Algin ku tentadu ka dibi di fala: “I Deus ku tentan,” pabia Deus ka pudi tentadu pa mal; el propi i ka ta tenta ningin,

¹⁴ ma kada un i tentadu ora ku si propi diseẑu mau na jundal, i na ngodal.

¹⁵ Ora ku ki diseẑu mau preña, i ta padi pekadu. Ora ku pekadu kirsi, i ta padi mortu.

¹⁶ Ña kiridu ermons, ka bo ngana bo sintidu.

¹⁷ Tudu bon pursenti ku tudu kusa diritu ku no patidu, i bin di riba; i disi di Pape, dunu di lus di seu, ku ka ta muda, ku ka tene sombra.

¹⁸ Na si vontadi i padinu ku si palabra di bardadi, pa no pudi sedu suma si purmeru fijus.

Bo obi, bo fasi

¹⁹ Ña kiridu ermons, bo lembra de kusa li, kuma tudu algin dibi di sta pruntu pa obi, ma pa i tarda pa papia, pa i tarda pa raiba,

²⁰ pabia raiba di omi ka ta juda pa kusa sta diritu suma ku Deus misti.

²¹ Asin, bo nega tudu koldadi susidadi ku tudu restu di kabalindadi; bo risibi ku mansesa ki palabra ku parantadu na bos, ku ten puder pa salba bo alma.

²² Ka bo sedu son obiduris di palabra. Si i asin, bo na ngana bo kabesa. Bo sedu fasiduris di kil ku palabra fala.

²³ Si algin i son obidur di palabra, i ka ta fasi konformi i fala, i suma un omi ku na jubi na spiju si rostu ki padidu ku el.

²⁴ I jubi si kurpu diritu, ma logu i da kosta, i diskisi kuma ki parsi,

²⁵ ma kil ku jubi diritu pa lei pirfitu ku ta liberta, i pega nel, i ka sedu son obidur ku ta diskisi, ma fasidur di kil ku palabra fala, si dunu ta sedu sortiadu na kil ki ta fasi.

²⁶ Si algin kuda kuma i sedu riliẑiosu, ma i ka frianta si lingua, i na ngana si korson; si riliẑion i ka nada.

²⁷ Koldadi riliẑion ku ka ten kulpa nin manca dianti di Deus no Pape i es: pa bai juda orfans ku viuvas na se kansera, tambi pa libra di podrisa de mundu.