Sirmonias 9 - BIBLIA - traduson antigu in Krioulo

Aron fasi sakrifisiu

¹ Na oitavu dia, Moisés coma Aron ku si fijus ku garandis di Israel,

² i fala Aron: “Toma un turusiñu pa bo suma oferta pa pekadu, ku un karnel macu pa oferta kemadu, tudu dus sin difeitu, bu tisi elis dianti di SIÑOR.

³ Dipus bu na fala fijus di Israel: ‘Bo toma un bodi suma oferta pa pekadu, tudu ku fiju di baka ku fiju di karnel, elis dus di un anu, sin difeitu, pa oferta kemadu.

⁴ Bo na toma tambi un turu ku un karnel macu pa oferta di pas, pa sakrifika dianti di SIÑOR, tudu ku oferta di kumida masadu ku azeiti, pabia aos SIÑOR na parsi bo dianti.’ ”

⁵ E tisi ke ku Moisés manda pa pursental dianti di tenda di juntamentu. Tudu jinti ciga, e firma dianti di SIÑOR.

⁶ Moisés fala: “Es i kusas ku SIÑOR manda pa bo fasi, pa gloria di SIÑOR pudi parsi bo dianti.”

⁷ Moisés fala Aron: “Ciga pa altar, bu sakrifika bu oferta pa pekadu, ku bu oferta kemadu; bu fasi sakrifisiu pa bu pekadu, ku di bu familia. Dipus, sakrifika oferta pa pobu, bu fasi sakrifisiu pa se pekadu, suma ku SIÑOR manda.”

⁸ Asin Aron ciga pa altar, i mata turusiñu ku sedu oferta pa si pekadu.

⁹ Si fijus tisi sangi pa el; i moja si dedu na sangi, i pul riba di pontas di altar. Restu di sangi, i darmal na pe di altar.

¹⁰ Gurdura ku rins, ku parti ku sta riba di figadu di oferta pa pekadu, i kemal riba di altar, suma ku SIÑOR daba ordi pa Moisés,

¹¹ ma i kema karni ku kuru fora di kampamentu.

¹² Dipus, Aron mata limaria pa oferta kemadu. Si fijus ntregal sangi; i wagal na tudu ladu di altar na roda.

¹³ Tambi e ntregal limaria pa oferta kemadu kortadu padas padas, tudu ku kabesa; i kemal riba di altar.

¹⁴ I laba partis di dentru ku pernas, i kema elis na altar riba di oferta kemadu.

¹⁵ Dipus Aron ciganta oferta di pobu. I toma ki bodi ku sedu oferta pa pekadu di pobu, i matal, i sakrifikal pa i sedu oferta pa pekadu, suma ki fasi ku ki purmeru pa si kabesa.

¹⁶ I tisi limaria pa oferta kemadu, i sakrifikal konformi regra.

¹⁷ I tisi tambi oferta di kumida, i pañal tok si mon inci, i kemal na altar, riba di oferta kemadu di parmaña.

¹⁸ Dipus Aron mata ki baka ku karnel macu suma oferta di pas ku seduba di pobu. Si fijus ntregal sangi ki waga na tudu ladu di altar na roda.

¹⁹ E tira gurdura di baka ku di karnel, ku sedu rabu, ku gurdura ku kubri partis di dentru, rins, ku parti ku sta riba di figadu,

²⁰ e pui es riba di pitus di limarias; dipus Aron kema gurdura na altar.

²¹ Ma pitu ku perna direita di tras, Aron sanal dianti di SIÑOR suma oferta di sana, konformi Moisés daba ordi.

²² Dipus Aron yalsa si dus mon pa pobu, i bensua elis. Dipus di sakrifika oferta pa pekadu, oferta kemadu ku oferta di pas, i ria bas.

²³ Moisés ku Aron yentra na tenda di juntamentu. Dipus e sai, e bensua pobu. Gloria di SIÑOR parsi dianti di tudu pobu,

²⁴ pabia fugu sai na pursensa di SIÑOR, i kaba ku oferta kemadu ku gurdura riba di altar. Kontra tudu jinti oja ki kusa, e grita di alegria, e mpina rostu na con.