Sirmonias 7 - BIBLIA - traduson antigu in Krioulo

Lei di oferta pa kulpa

¹ “Es i lei di oferta pa kulpa ku sedu un kusa sagradu dimas.

² Na kau nunde ku limaria ta matadu pa oferta kemadu, la ku limaria di oferta pa kulpa na matadu tambi; si sangi na wagadu na tudu ladu di altar.

³ Tudu si gurdura na pursentadu: rabu, gurdura ku na kubri partis di dentru,

⁴ tudu dus rin ku gurdura ku sta nelis, pertu di lumbu, ku parti ku sta riba di figadu, ku ta tiradu juntu ku rins.

⁵ Saserdoti na kemal riba di altar suma oferta kemadu pa SIÑOR. I oferta pa kulpa.

⁶ Kualker macu na familia di saserdotis pudi kumel, ma i ten ku kumel na un kau sagradu. I sedu un kusa sagradu dimas.

⁷ “Suma oferta pa pekadu, asin ku oferta di kulpa na sedu tambi; elis dus e na tene mesmu lei. I na sedu di saserdoti ku fasi sakrifisiu ku el.

⁸ Saserdoti ku sakrifika oferta kemadu di algin, ki mesmu saserdoti na fika ku kuru di ki limaria,

⁹ suma tambi tudu oferta di kumida ku kusñadu na furnu, ku tudu ku purparadu na panela o na kaleron, i na sedu di saserdoti ku pursental.

¹⁰ Tudu oferta di kumida ku masadu ku azeiti, o ku seku, i na rapatidu, sin diferensa, pa tudu fijus di Aron.

Lei di oferta di pas

¹¹ “Es i lei di oferta di pas ku algin pudi pursenta pa SIÑOR.

¹² Si i pursental pa fala Deus obrigadu, juntu ku limaria di sakrifisiu di gardisimentu, i na pursenta tambi bulus sin fermentu ku masadu ku azeiti, ku bolaŝas finu sin fermentu untadu azeiti, ku bulus di foriña finu masadu ku azeiti, i fritadu.

¹³ Juntu ku ki bulus i na pursenta pon kumpudu ku fermentu, tudu ku ki limaria pa oferta di pas di gardisimentu.

¹⁴ I na leba un son di kada koldadi, i pursental suma oferta pa SIÑOR; i na sedu di saserdoti ku toma sangi di oferta di pas, i wagal na altar.

¹⁵ Karni di oferta di pas pa gardisi Deus i na kumedu na dia ki pursentadu; i ka pudi disadu te parmaña.

¹⁶ “Ma si si oferta di pas i pabia di un votu, o i na pursental di si libri vontadi, karni di sakrifisiu na kumedu na dia ki pursental. Kil ku sobra del, i na kumel na sugundu dia.

¹⁷ Kualker karni di sakrifisiu ku sobra te na terseru dia i na kemadu na fugu.

¹⁸ Si karni di ki sakrifisiu di pas kumedu na terseru dia, Deus ka na seta ki algin ku pursental. Si oferta ka na ojadu na si fabur; i na tomadu suma kusa nujenti. Ki algin ku kume kualker parti del i na leba si kulpa.

¹⁹ “Karni ku toka na algun kusa impuru, i ka na kumedu; i na kemadu ku fugu. Utru karni, kualker algin ku sta puru i pudi kumel.

²⁰ Si algin impuru kume karni di oferta di pas ku sedu di SIÑOR, ki algin na tiradu na metadi di si pobu.

²¹ Si algin toka na un kusa impuru, di omi o di limaria, o kualker utru kusa nujenti o impuru, i bin kume ki karni di oferta di pas ku sedu di SIÑOR, ki algin na tiradu na metadi di si pobu.”

Deus tuji kume gurdura ku sangi

²² Dipus, SIÑOR fala Moisés

²³ pa i papia ku fijus di Israel, i fala elis: “Nin gurdura di turu, nin di karnel, nin di kabra, bo ka na kume.

²⁴ Gurdura di un limaria ku muri i pudi usadu pa utru kusa, suma tambi un ku limaria brabu mata, ma di nin un manera bo ka pudi kume ki gurdura.

²⁵ Un limaria ku un parti del i pursentadu pa SIÑOR suma oferta kemadu, algin ku kume si gurdura i na tiradu na metadi di si pobu.

²⁶ Kualker kau ku bo mora, bo ka na kume sangi di kualker kacu o limaria.

²⁷ Kualker algin ku kume sangi, i na tiradu na metadi di si pobu.”

Kiñon di saserdoti

²⁸ SIÑOR torna fala Moisés

²⁹ pa i papia ku fijus di Israel, i fala elis: “Kualker algin ku tisi SIÑOR oferta di pas, i na tira parti suma sakrifisiu pa SIÑOR.

³⁰ Ku si propi mon i na tisil suma oferta kemadu pa SIÑOR. I na tisi gurdura tudu ku pitu, ki na sana ku el dianti di SIÑOR, suma oferta di sana.

³¹ Saserdoti na kema gurdura riba di altar, ma pitu na sedu di Aron ku si fijus.

³² Bo ten ku da saserdoti si parti di oferta di pas, ku sedu perna direita di ladu di tras di limaria.

³³ Fiju di Aron ku pursenta sangi ku gurdura di oferta di pas, el ku na tene ki perna direita suma si kiñon.

³⁴ N tira di ofertas di pas di fijus di Israel ki pitu ku sanadu ku el, ku perna direita ku pursentadu, N da elis pa saserdoti Aron ku si fijus suma se kiñon. Es i lei di fijus di Israel pa sempri.”

³⁵ Na dia ku Aron ku si fijus pursentadu pa sirbi SIÑOR suma saserdotis, lei dadu kuma e ten ku dadu sempri ki parti di oferta kemadu pa SIÑOR.

³⁶ Na dia ke unjidu, SIÑOR da ordi pa fijus di Israel, ku se jorson ku na bin, pa e da saserdotis ki partis suma se diritu pa sempri.

³⁷ Es i lei di oferta kemadu, oferta di kumida, oferta pa pekadu, oferta pa kulpa, oferta pa konsagrason, ku oferta di pas.

³⁸ SIÑOR da Moisés e leis na monti Sinai, na dia ki manda fijus di Israel pa e tisi se ofertas pa SIÑOR, na lala di Sinai.