Sirmonias 6 - BIBLIA - traduson antigu in Krioulo

Pekadu di diskarna

¹ SIÑOR torna papia ku Moisés, i falal:

² “I pudi sedu ku algin peka, i fasi mal kontra SIÑOR, manera ki nega torna kusa ku si kumpañer ntregal na si mon pa i rakada, o i furta, o i toma kusas di si kumpañer ku violensia,

³ o i oja un kusa ku pirdi, i nega ku juramentu falsu kuma i ka ojal; o i fasi kualker utru kusa mau ku jinti kustuma ta fasi.

⁴ Si i peka asin, i na kulpadu. I ten ku torna kil ki furta, o kil ki toma ku violensia, o kil ki ntregadu pa rakada, o ki kusa pirdidu ki oja,

⁵ o ki kusa ki fasi juramentu falsu aserka del. I ten ku tornal kompletu, i buri kintu parti riba del, i da tudu pa si dunu na ki dia ki na da si oferta pa kulpa.

⁶ Suma oferta, i ten ku leba pa SIÑOR un karnel macu di koral, sin difeitu, konformi balur ku bu pui nel, suma oferta pa kulpa. I na lebal pa saserdoti.

⁷ Saserdoti na fasi sakrifisiu pa el dianti di SIÑOR; i na purdadu kualker de kusas ki fasi ku pul i sedu kulpadu.”

Lei di oferta kemadu

⁸ SIÑOR fala Moisés

⁹ pa i da Aron ku si fijus e ordi: “Es i lei di oferta kemadu. Oferta kemadu ten ku fika na altar tudu noti, te parmaña. Fugu na altar i ten ku yardi sempri.

¹⁰ Saserdoti na bisti si ropa di liñu, ku kalson di liñu bas del; i na tira sinsa di ki oferta kemadu, ku fugu kema riba di altar, i na pul lungu di altar.

¹¹ Dipus, i na dispi ki ropa, i na bisti utru ropa, i na leba sinsa fora di kampamentu, pa un kau limpu.

¹² Fugu na altar i ten ku yardi sempri; i ka na paga. Kada dia parmaña saserdoti ten ku buri leña, i ruma oferta kemadu riba di fugu, i kema gurdura di ofertas di pas.

¹³ Fugu na yardi sempri riba di altar; i ka na paga.

Lei di oferta di kumida

¹⁴ “Es i lei di oferta di kumida. Un fiju di Aron ten ku pursental pa SIÑOR dianti di altar.

¹⁵ I na inci si mon foriña finu, ku azeiti, ku tudu nsensu ku sta riba di oferta di kumida. I na kemal riba di altar suma lembransa, pa i cera sabi pa SIÑOR.

¹⁶ Aron ku si fijus na kume kil ku sobra. E na kumel sin fermentu na un kau sagradu, ku sedu na kau fora di tenda di juntamentu, ma dentru di tapada di kurtinas.

¹⁷ I ka na kusñadu ku fermentu. N da elis el suma se parti di ña ofertas kemadu. I sedu un kusa sagradu dimas, suma oferta pa pekadu, tambi suma oferta pa kulpa.

¹⁸ Tudu macu di familia di Aron na kumel. I na sedu se parti di ofertas kemadu pa SIÑOR, di un jorson pa utru pa sempri. Tudu kil ku toka nel i na sedu sagradu.”

Oferta pa konsagrason di saserdotis

¹⁹ SIÑOR torna papia ku Moisés, i falal:

²⁰ “Es i oferta ku Aron ku si fijus ten ku tisi pa SIÑOR na dia ki na unjidu: dus litru di foriña finu, suma oferta di kumida di kustumu, metadi di parmaña ku utru metadi di tardi.

²¹ I na masadu ku azeiti, i kusñadu na kaleron. Dipus i na kebra-kebradu, i na pursentadu suma oferta di kumida ku ta cera sabi pa SIÑOR.

²² Tambi fiju ku na toma si lugar suma saserdoti unjidu i na fasi mesmu kusa. I na kemal tudu pa SIÑOR. Es i un lei ku ka na kaba.

²³ Asin tudu oferta di kumida di un saserdoti na kemadu tudu; i ka na kumedu.”

Lei di oferta pa pekadu

²⁴ SIÑOR fala Moisés mas

²⁵ pa i papia ku Aron ku si fijus, i fala elis: “Es i lei di oferta pa pekadu. Na kau ku limaria di oferta kemadu ta matadu, la ke dibi di mata limaria di oferta pa pekadu dianti di SIÑOR. I sedu un kusa sagradu dimas.

²⁶ Saserdoti ku sakrifikal i na kumel na un kau sagradu, fora di tenda di juntamentu ma dentru di tapada di kurtinas.

²⁷ Tudu kil ku toka na ki karni i na bida sagradu. Si sangi paña ropa di algin, ki ropa ten ku labadu na un kau sagradu.

²⁸ Panela di lama ki kusñadu nel i na kebradu, ma si i kusñadu na un panela di kobri, i na fergadu, i sogadu ku yagu.

²⁹ Tudu macu na familia di saserdotis pudi kumel. I sedu un kusa sagradu dimas.

³⁰ Ma nin un oferta pa pekadu ku si sangi lebadu na tenda di juntamentu, na lugar sagradu, pa sedu sakrifisiu pa pekadu, i ka na kumedu; i na kemadu na fugu.