Sirmonias 5 - BIBLIA - traduson antigu in Krioulo

¹ Ora ku algin comadu pa i bai sedu tustumuña di kil ki oja o di kil ki obi, si i ka konta klaru ke ki sibi, i ta kontra i na peka; i na leba si kulpa.

² Ora ku algin toka na un kusa impuru, nin ki sedu kadaver di limaria impuru, di matu o di kasa, o kadaver di limaria impuru ku ta rasta, nin ki sedu un kusa ki ka sibi, i na sedu impuru i kulpadu na mesmu.

³ Ora ki toka na kusa impuru di un omi, kualker kusa ku pudi fasil i kontamina, si i ka nota, ma i bin sibil dipus, i na sedu kulpadu.

⁴ Si un algin yabri si boka sin i ka pensa, i jurmenta pa fasi mal o pa fasi ben na kualker kusa ku algin pudi jurmenta aserka del, nin si i ka nota, ora ki sibi, i na sedu kulpadu na un de kusas.

⁵ Asin si algin sedu kulpadu na un de kusas, i na konfesa ki kusa ki peka nel.

⁶ Pa purdon di ki pekadu ki fasi, i na tisi pa SIÑOR un fiju femia di karnel o di kabra, suma oferta pa pekadu. Saserdoti na fasi sakrifisiu pa el pa si pekadu pudi purdadu.

⁷ Si i ka ten manera di ranja fiju di karnel, i na tisi pa SIÑOR dus pumba di matu o dus pumba di kasa pa purdon di ki pekadu ki fasi, un pa oferta pa pekadu, utru pa oferta kemadu.

⁸ I na leba elis pa saserdoti, ku na sakrifika purmeru kil ku sedu oferta pa pekadu. I na tursil garganti, ma i ka na tiral kabesa.

⁹ I na waga utru sangi di oferta na ladu di altar, ma kil ku sobra, i na pirmil na pe di altar. Es i sedu oferta pa pekadu.

¹⁰ Dipus saserdoti na sakrifika ki utru pumba suma oferta kemadu, konformi kustumu. Asin i na fasi sakrifisiu pa pekadu ku ki omi fasi; i na purdadu.

¹¹ Si i ka pudi ranja dus pumba di matu nin dus di kasa, i ten ku tisi dus litru di foriña finu suma oferta pa pekadu, pa i pudi purdadu. I ka na darma azeiti riba del, nin i ka na pui nsensu, pabia i oferta pa pekadu.

¹² I na lebal pa saserdoti, ku na inci mon, i tomal pa lembransa, i kemal na altar, riba di ofertas kemadu pa SIÑOR. I oferta pa pekadu.

¹³ Asin saserdoti na fasi sakrifisiu pa el, pa kualker pekadu ki fasi; i na purdadu. Restu di oferta na sedu di saserdoti, suma ki ta fasidu ku oferta di kumida.

Oferta pa kulpa

¹⁴ SIÑOR fala Moisés:

¹⁵ “Ora ku algin kebra lei, sin i ka sibi, i peka na kusas sagradu di SIÑOR, i na tisi pa SIÑOR suma oferta un karnel macu di koral, sin difeitu, ku tene si pres sertu na siklus di prata, konformi siklu ta pesadu na kau sagradu. Es i sedu oferta pa kulpa.

¹⁶ Asin i na paga kil ki ka pagaba pa si dever na kusas sagradu; inda i na buri mas kintu parti; i na dal pa saserdoti. Asin saserdoti na sakrifika ki karnel macu suma oferta pa kulpa; si dunu na purdadu si pekadu.

¹⁷ “Si algin peka, sin i ka sibi, i fasi un kusa ku mandamentus di SIÑOR fala pa ka fasi, i na kulpadu, i na leba si kulpa.

¹⁸ I ten ku leba pa saserdoti, suma oferta di kulpa, un karnel macu di koral, sin difeitu, konformi balur ku bu pui nel. Saserdoti na fasi sakrifisiu pa el, pa ki mal ki fasi sin i ka sibi; i na purdadu.

¹⁹ Es i oferta di kulpa, suma ki algin torna kulpadu dianti di SIÑOR.”