Sirmonias 4 - BIBLIA - traduson antigu in Krioulo

Sirmonia pa erus di saserdoti

¹ SIÑOR fala Moisés

² pa i konta fijus di Israel regras pa algin ku peka kontra kualker mandamentu di SIÑOR sin i ka spera, i fasi kusa ku mandamentu fala pa ka no fasi.

³ Si un saserdoti unjidu peka, i tisi kulpa riba di pobu, pa ki pekadu ki fasi i ten ku tisi pa SIÑOR un fiju di baka, macu, sin difeitu, suma oferta pa pekadu.

⁴ I na tisi ki turu pikininu na entrada di tenda di juntamentu dianti di SIÑOR. I na pui si mon riba di kabesa di ki turu, i na matal dianti di SIÑOR.

⁵ Dipus, ki saserdoti unjidu na toma un bokadu di ki sangi di turu, i lebal pa tenda di juntamentu.

⁶ I na moja si dedu na sangi, i na waga un parti del seti bias dianti di SIÑOR, dianti di kurtina di kau sagradu.

⁷ Saserdoti na pui un parti di sangi na pontas di altar di nsensu ku ta cera sabi, ku sta na tenda di juntamentu, dianti di SIÑOR. Ki restu di sangi, i na darmal na pe di altar di oferta kemadu ku sta na entrada di tenda di juntamentu.

⁸ I na tira tudu gurdura di turu di oferta pa pekadu, suma gurdura ku na kubri partis di dentru o ku sta ligadu ku elis,

⁹ tudu dus rin, ku gurdura ku sta nelis, pertu di lumbu, ku parti ku kubri figadu, ki na tira juntu ku rins.

¹⁰ I na tira gurdura suma ki ta fasi ku baka di sakrifisiu di pas. Dipus, saserdoti na kema ki partis riba di altar di oferta kemadu.

¹¹ Kuru di ki turu pikininu, ku tudu si karni, si kabesa ku si pernas, si partis di dentru ku tripa,

¹² tudu ki restu di turu, i na lebal fora di kampamentu pa un lugar limpu nunde ku sinsa ta botadu, i na kemal na fugu di leña riba di sinsa.

Sakrifisiu pa erus di pobu

¹³ Si tudu juntamentu di Israel yara, e fasi un kusa ku mandamentu di SIÑOR fala pa ka fasi, nin si e ka sibi kuma e na fasi mal, e sta kulpadu.

¹⁴ Ora ke bin rapara ki pekadu ke fasi, juntamentu di pobu na leba fiju di baka macu suma oferta pa pekadu; e na pursental dianti di tenda di juntamentu.

¹⁵ Garandis di juntamentu na pui se mon riba di kabesa di turu dianti di SIÑOR, e na matal na si pursensa.

¹⁶ Saserdoti unjidu na leba un bokadu di sangi di ki turu pa tenda di juntamentu.

¹⁷ I na moja si dedu na ki sangi, i wagal seti bias dianti di SIÑOR, dianti di kurtina.

¹⁸ I na pui utru parti di ki sangi na pontas di altar ku sta dianti di SIÑOR na tenda di juntamentu. Tudu restu di sangi, i na darmal na pe di altar di oferta kemadu ku sta na entrada di tenda di juntamentu.

¹⁹ I na tira tudu gurdura nel, i na kemal riba di altar.

²⁰ I na fasi ku ki turusiñu suma ki fasi ku turusiñu di oferta pa pekadu. Asin saserdoti na fasi sakrifisiu pa pekadu di pobu; e na purdadu.

²¹ Dipus i na leba turusiñu fora di kampamentu, i na kemal suma ki kema ki purmeru turusiñu. Es i oferta pa pekadu di juntamentu di pobu.

Sakrifisiu pa erus di un ŝef

²² Si un ŝef peka sin i ka spera, i fasi kusa ku mandamentus di SIÑOR si Deus fala pa ka fasi, i sta kulpadu.

²³ Ora ki mostradu ki pekadu ki fasi, i ten ku leba oferta di un kabra macu sin difeitu.

²⁴ I na pui si mon riba di kabesa di ki bodi, i na matal na kau ku limaria ta matadu pa oferta kemadu, dianti di SIÑOR. Es i oferta pa pekadu.

²⁵ Dipus saserdoti, ku si dedu, i na toma un bokadu di sangi di oferta pa pekadu, i na pul na pontas di altar di oferta kemadu. Ki restu di sangi, i na darmal na pe di altar.

²⁶ I na kema tudu gurdura na altar, suma ki kema gurdura di oferta di pas. Asin saserdoti na fasi sakrifisiu pa pekadu di ki omi; i na purdadu.

Sakrifisiu pa eru di kualker algin

²⁷ Si kualker algin di pobu peka, sin i ka spera, i fasi un kusa ku mandamentu di SIÑOR fala pa ka fasi, i sta kulpadu.

²⁸ Ora ki mostradu ki pekadu ki fasi, i ten ku tisi, suma oferta pa pekadu, un kabra femia sin difeitu.

²⁹ I na pui si mon riba di kabesa di oferta pa pekadu, i na matal na kau di oferta kemadu.

³⁰ Dipus saserdoti, ku si dedu, i na toma un bokadu di ki sangi, i na pul na pontas di altar di oferta kemadu; ki restu di sangi, i na darmal na pe di altar.

³¹ I na tira tudu gurdura, suma ku gurdura ta tiradu na oferta di pas. Saserdoti na kemal riba di altar, pa i pudi cera sabi pa SIÑOR. Asin saserdoti na fasi sakrifisiu pa pekadu di ki algin; i na purdadu.

³² Si i tisi fiju di karnel suma oferta pa si pekadu, i ten ku tisi femia sin difeitu.

³³ I na pui mon riba di si kabesa, i matal suma oferta pa pekadu, na kau nunde ku limaria ta matadu pa oferta kemadu.

³⁴ Dipus saserdoti, ku si dedu, i na toma un bokadu di sangi di ki oferta pa pekadu, i na pul na pontas di altar di oferta kemadu. Ki restu di sangi, i na darmal na pe di altar.

³⁵ I na tira tudu si gurdura, suma ku gurdura di fiju di karnel di oferta di pas ta tiradu. Saserdoti na kemal na altar riba di ofertas ku kemadu pa SIÑOR. Asin saserdoti na fasi sakrifisiu pa pekadu ku ki algin fasi; i na purdadu.