Sirmonias 3 - BIBLIA - traduson antigu in Krioulo

Oferta di pas o di gardisimentu

¹ “Si oferta di algin i sedu oferta di pas, di baka macu o femia, i na pursental sin difeitu dianti di SIÑOR.

² I na pui si mon riba di kabesa di si oferta, i na matal na entrada di tenda di juntamentu. Saserdotis, fijus di Aron, e na waga sangi na tudu ladu di altar na roda.

³ Di ki oferta di pas, i na tira oferta kemadu pa SIÑOR, ku sedu tudu gurdura ku kubri partis di dentru, o ku sta ligadu ku elis,

⁴ tudu dus rin, ku gurdura ku sta riba delis, pertu di lumbu, ku parti ku sta riba di figadu, ki na tira juntu ku rins.

⁵ Fijus di Aron na kema ki partis na altar, riba di oferta kemadu ku sta na fugu di leña, pa i sedu oferta pasadu na fugu, ku ta cera sabi pa SIÑOR.

⁶ “Si i na pursenta SIÑOR un limaria di koral suma oferta di pas, i ten ku tisi macu o femia sin difeitu.

⁷ Si i na pursenta fiju di karnel, i na pursental dianti di SIÑOR.

⁸ I na pui si mon riba di kabesa di si oferta; i na matal dianti di tenda di juntamentu. Fijus di Aron na waga si sangi na tudu ladu di altar na roda.

⁹ Di oferta di pas i na tira oferta kemadu pa SIÑOR, ku sedu si gurdura, tudu rabu kortadu na kuluna vertebral, tudu gurdura ku kubri partis di dentru o ku sta ligadu ku elis,

¹⁰ ku tudu dus rin, ku gurdura ku sta riba delis, pertu di lumbu, ku parti ku sta riba di figadu, ki na tira juntu ku rins.

¹¹ Saserdoti na kema ki partis riba di altar, suma oferta di kumida, kemadu pa SIÑOR.

¹² “Si i na pursenta un kabra, i na pursental dianti di SIÑOR.

¹³ I na pui mon riba di si kabesa, i na matal dianti di tenda di juntamentu. Fijus di Aron na waga si sangi na tudu ladu di altar na roda.

¹⁴ Di ki oferta ki da, i ten ku tira utru pa oferta kemadu pa SIÑOR, ku sedu: tudu gurdura ku kubri partis di dentru o ku sta ligadu ku elis,

¹⁵ suma tambi tudu dus rin, ku gurdura ku sta riba delis pertu di lumbu, ku parti ku sta riba di figadu, ki na tira juntu ku rins.

¹⁶ Saserdoti na kema ki partis na altar suma oferta di kumida, oferta kemadu ku ta cera sabi. Tudu gurdura i di SIÑOR.

¹⁷ “Es i un lei ku ka na muda, na tudu jorson dipus di bos, na kualker kau ku bo mora: Bo ka na kume nin gurdura nin sangi.”