Sirmonias 27 - BIBLIA - traduson antigu in Krioulo

Leis aserka di ofertas pa SIÑOR

¹ SIÑOR fala Moisés

² pa i papia ku fijus di Israel, i konta elis: “Si un omi fala kuma i na dedika un algin pa SIÑOR, i na da konformi balur ku bu na pui na ki algin.

³ Si i un macu di idadi di vinti te sesenta anu, bu na pui balur di sinkuenta mueda di prata konformi mueda di siklu di kau sagradu.

⁴ Si i femia, bu na pui si balur pa i sedu trinta mueda.

⁵ Si i sedu algin di sinku te vinti anu, bu balur di macu na sedu di vinti mueda; di femia na sedu di des mueda.

⁶ Si i sedu di un mis te sinku anu, bu balur di macu na sedu di sinku mueda di prata; pa femia i na sedu di tris mueda di prata.

⁷ Si ki algin tene sesenta anu pa riba, bu balur di macu na sedu di kinzi mueda; pa femia i na sedu di des mueda.

⁸ Si ki omi ku fasi purmesa i koitadi dimas pa paga ki diñeru, i na pursenta ki algin pa saserdoti. Saserdoti na pui balur nel konformi diñeru ku ki omi pudi paga.

⁹ “Si i sedu un limaria ku pudi pursentadu suma sakrifisiu pa SIÑOR, kada un ku pursentadu na sedu sagradu pa SIÑOR.

¹⁰ Si dunu ka pudi mudal, nin torkial mau pa bon, nin bon pa mau, ma si i bin torkial ku utru limaria, tudu dus na sedu sagradu.

¹¹ Si limaria sedu impuru, di kilis ku ka pudi pursentadu suma sakrifisiu pa SIÑOR, i na lebadu dianti di saserdoti,

¹² ku na pui pres konformi limaria sedu bon o mau. Ki pres ku saserdoti pui, asin ki na sedu.

¹³ Si si dunu misti torna kumpra ki limaria, i ten ku paga ki pres ku mas un kintu.

¹⁴ “Si un omi misti dedika si kasa pa i sedu sagradu pa SIÑOR, saserdoti na pui pres, konformi i jubi si i bon o mau. Pres ki pui, asin ki na sedu.

¹⁵ Si ki omi ku dedika kasa bin misti kumpral mas, i na buri un kintu riba di pres; kasa na torna sedu di sil.

¹⁶ “Si un omi dedika pa SIÑOR un parti di terenu di si familia, si balur na pudu konformi kuantia di simentera ku na pirsisadu: sinkuenta mueda di prata pa duzentus litru di simentera di sevada.

¹⁷ Si i dedika si terenu disna di anu di jubileu, i na fika konformi balur ki pudu,

¹⁸ ma si i dedika si terenu dipus di anu di jubileu, saserdoti na kalkula pres na diñeru konformi numeru di anus ku na falta te na anu di jubileu. Asin ki purmeru balur na riantadu.

¹⁹ Si kil ku dedika terenu bin misti torna kumpral, i na buri mas un kintu na balur ki pudu; terenu na sedu di sil.

²⁰ Si i ka torna kumpral, ma i bai bindil pa utru algin, nunka mas i ka na pudi kumpral.

²¹ Ora ku ki terenu fika libri na anu di jubileu, i na sedu sagradu suma un terenu separadu pa SIÑOR; i na pasa sedu di saserdoti pa sempri.

²² “Si un omi dedika pa SIÑOR terenu ki kumpra, ma i ka sedu gora terenu di si familia,

²³ saserdoti na pui balur konformi tempu ku falta te na anu di jubileu. Omi ten ku paga si pres na ki mesmu dia, suma un kusa sagradu pa SIÑOR.

²⁴ Na anu di jubileu, terenu na tornadu na mon di kil ku bindilba purmeru, ku sedu propi dunu di terenu.

²⁵ Kada pres ku bu na pui i na sedu konformi siklu di kau sagradu, ku sedu vinti jera.

²⁶ “Ningin ka pudi dedika purmeru fiju di un limaria, pabia purmeru fiju sedu ja di SIÑOR; nin ki sedu fiju di baka, o di karnel, i di SIÑOR.

²⁷ Si i sedu un limaria impuru, si dunu na torna kumpral, konformi pres ku bu pui, ma i na buri un kintu riba di si balur. Si i ka torna kumpral, limaria pudi bindidu konformi balur ku bu pui.

²⁸ “Ningin ka pudi bindi, nin torna kumpra, kil ki teneba, ma i dedikal pa SIÑOR, nin si i omi o limaria o terenu di si familia; tudu kil ki dedika de manera i sagradu dimas pa SIÑOR.

²⁹ Nin si i omi ku dedikadu de manera, ningin ka pudi torna kumpral; i ten ku matadu.

³⁰ “Un dizimu di tudu prudutu di con ku fruta di arvuris i di SIÑOR; i sagradu pa el.

³¹ Si un algin torna kumpra kualker parti di si dizimu, i ten ku buri un kintu parti riba di si balur.

³² Tudu dizimu di bakas ku karnelis, ku sedu kada desimu limaria ku pasa bas di vara di bakiadur, i na sedu sagradu pa SIÑOR.

³³ Si dunu ka na distingi bon nin mau na metadi di limarias, nin i ka na torkia un pa utru. Si i torkial, ki limarias tudu ku kil ki pui na si lugar e na sedu sagradu; i ka pudi torna kumpra elis.”

³⁴ Esis i mandamentus ku SIÑOR da Moisés na monti Sinai pa pobu di Israel.