Sirmonias 26 - BIBLIA - traduson antigu in Krioulo

Purmesas pa obdiensia

¹ “Ka bo kumpu idulus pa bos, nin ka bo lantanda statua, nin pedra sagradu; ka bo pui pedra labradu na bo tera pa bo mpina si dianti. Ami i SIÑOR bo Deus.

² “Bo na guarda ña dias di diskansu; bo na rispita ña kau sagradu. Ami i SIÑOR.

³ “Si bo yanda na ña regras, bo rispita ña mandamentus, bo obdisi elis,

⁴ N na manda bos cuba na si tempu; con na padi si prudutus; arvuris na da se fruta.

⁵ Bo na kontinua na masa arus te na tempu di kuji uvas; bo na kuji uvas te na tempu di sumia. Bo na kume tok bo farta; bo na mora suguru na bo tera.

⁶ “N na da pas na tera; bo na dita; ningin ka na pantanda bos. N na tira limarias brabu na tera; gera ka na pasa mas na bo con.

⁷ Bo na serka bo inimigus; e na kai mortu ku spada bo dianti.

⁸ Sinku di bos na serka sen; sen di bos na serka des mil; bo inimigus na kai bo dianti mortu ku spada.

⁹ “N na oja pa bos ku fabur, N na fasi pa bo padi, bo buri ciu; N na konfirma ña kontratu ku bos.

¹⁰ Bo na kume di kebur di anu ku pasa te na dia ku bo ten ku tiral fora pa da lugar pa kebur nobu.

¹¹ N na mora na ña tenda sagradu na bo metadi; N ka na nfastia bos.

¹² N na yanda na bo metadi, N na sedu bo Deus; bo na sedu ña pobu.

¹³ Ami i SIÑOR bo Deus ku tira bos na tera di Ejitu pa bo ka sedu mas katibu di ejipsius; N kebra bo korenti na metadi; N fasi bos yanda ku kabesa firmi.

Kastigu pa disobdiensia

¹⁴ “Si bo ka sukutan, bo ka obdisi tudu e mandamentus,

¹⁵ si bo nega ña regras, bo nfastia ña leis, bo ka kumpri ña mandamentus, tok bo pui ña kontratu fika sin balur,

¹⁶ nta ami tambi N na fasi bos e kusa. N na pui pa bo panta di repenti, pa bo tene tuberkulosi, ku febri altu ku na dana bo uju; i na tira bo vida puku puku. Bo na sumia amonton, pabia bo inimigus na kumel tudu.

¹⁷ N na pui ña rostu kontra bos pa bo inimigus ngaña bos; kilis ku odia bos e na manda riba di bos. Bo na kuri sin ningin serka bos.

¹⁸ “Si, dipus de kusas tudu, bo ka sukutan inda, N na kontinua kastiga bos seti bias mas pabia di bo pekadus.

¹⁹ N na kebra bo orgulyu ntemus, N na fasi pa seu riba di bos sedu suma feru, pa bo con sedu suma kobri.

²⁰ Bo forsa na gastadu amonton, pabia bo con ka na da si prudutus; arvuris ka na padi se fruta.

²¹ “Si bo kontinua yanda kontra mi, bo ka misti sukutan, N na manda bos kastigu seti bias mas, konformi bo pekadus.

²² N na manda limarias brabu na bo metadi, ku na kume bo fijus, e kaba ku bo limarias, pa e torna bos puku, tok jinti ka na ojadu na rua.

²³ “Si, inda ku tudu e kusas, bo ka seta pa N kuriẑi bos, ma bo kontinua yanda kontra mi,

²⁴ ami N na yanda tambi kontra bos. Ami propi N na kastiga bos seti bias mas pa bo pekadus.

²⁵ N na tisi spada riba di bos pa vinga manera ku bo kebra ña kontratu. Ora ku bo junta na bo prasas, N na manda na bo metadi duensa ku ta kamba, pa i mata bos. Bo na ntregadu na mon di inimigus.

²⁶ Ora ku N bin korta sustentu di kumida, des minjer na kusña bo pon na un furnu. E na pesa pon pa rapatil. Bo na kumel, ma bo ka na farta.

²⁷ “Si, inda ku tudu e kusas, bo ka sukutan, ma bo kontinua yanda kontra mi,

²⁸ tambi na ña raiba N na yanda kontra bos; N na kastiga bos seti bias mas pabia di bo pekadus.

²⁹ Bo na bin kume karni di bo fijus, macu ku femia.

³⁰ N na dana bo altaris na montis, N na kaba ku bo altaris di nsensu, N na bota bo difuntus riba di kurpus di bo idulus ku ka tene vida; N na nfastia bos.

³¹ N na pui bo prasas pa e dana, N na kaba ku bo lugaris sagradu; N ka na kontenti ku ceru sabi di bo ofertas.

³² N na dana tera, tok bo inimigus ku bin sinta la e na fika ku garandi spantu.

³³ N na pajiga bos na metadi di nasons, N na busi ña spada bo tras. Bo tera na fika bandonadu; bo prasas na danadu tudu.

³⁴ Asin tera na goza si anus di diskansu pa tudu ki tempu ki sta bandonadu, kontra bo sta na tera di bo inimigus. Na ki tempu tera na diskansa, i na goza si sabadus.

³⁵ Tudu tempu ku tera sta bandonadu, i na tene ki anus di diskansu ki ka teneba oca bo mora nel.

³⁶ “Kilis di bos ku fika ku vida, N na miti medu na se korson na tera di se inimigus, tok baruju di paja ku bentu na supra i na pui elis pa e kuri. E na kuri suma kin ku na kapli di spada, tok e kai, sin ningin ka serka elis.

³⁷ E na kai riba di ŋutru suma e na kuri pa kapli di spada, sin ningin ka serka elis. Bo ka na pudi para dianti di bo inimigus.

³⁸ Bo na muri na metadi di nasons; tera di bo inimigus na nguli bos.

³⁹ Kilis di bos ku sobra, se forsa na kaba puku puku, na tera di se inimigus, pabia di se pekadus. Tambi pabia di pekadus di se papes e na pirdi forsa.

⁴⁰ “Ma e na konfesa se pekadus ku pekadus di se papes, manera ke rebela, e yanda kontra mi,

⁴¹ ku pun tambi N yanda kontra elis, N leba elis pa tera di se inimigus. Si se korsons duru baŝa, e seta suma diritu ki kastigu di se pekadu,

⁴² N na lembra di ña kontratu ku Jakó, Isak ku Abraon. N na lembra tambi di tera.

⁴³ Tera na fika libri delis, i na goza si anus di diskansu nkuantu i bandonadu. E na paga kompletu kastigu di se pekadus pabia e nega ña leis, e njuti ña regras.

⁴⁴ Kontudu, ora ke sta na tera di se inimigus, N ka na nega elis, nin N ka na nfastia elis, pa kaba ku elis, pa kebra ña kontratu ku elis, pabia ami i SIÑOR se Deus.

⁴⁵ Pa amor delis N na lembra di ña kontratu ku se papes di antigu, kilis ku N tira na tera di Ejitu dianti di uju di nasons, pa N sedu se Deus. Ami i SIÑOR.”

⁴⁶ Esis i mandamentus, leis ku regras ku SIÑOR da na mon di Moisés pa fijus di Israel na monti Sinai.