Sirmonias 20 - BIBLIA - traduson antigu in Krioulo

Kastigu pa pekadu

¹ SIÑOR fala Moisés

² pa i fala fijus di Israel: “Kualker fiju di Israel, o stranjeru ku mora na metadi di Israel, ku sakrifika si fiju pa deus Molok, i ten ku muri. Juntamentu di pobu na dal ku pedras.

³ N na vira kontra ki omi, N na tiral na metadi di si pobu, pabia, manera ki da si fiju pa Molok, i kontamina ña kau sagradu, i dana ña santu nomi.

⁴ Si juntamentu di pobu fica se uju ora ku ki omi na da un di si fijus pa Molok, e ka matal,

⁵ ami N na vira kontra ki omi, ku si familia, ku tudu kilis ku na bai si tras, pa manera ke ka fiel pa mi, ma e bai tras di Molok; N na tira elis na metadi di se pobu.

⁶ “Algin ku sedu infiel pa mi, i bai pa jambakus o pa jinti ku ta konsulta mortus, i sigi elis, ami N na vira kontra ki algin, N na tiral na metadi di si pobu.

⁷ “Bo separa de kusas tudu, bo sedu puru, pabia ami i SIÑOR bo Deus.

⁸ Bo obdisi ña mandamentus, bo kumpri elis. Ami i SIÑOR ku ta santifika bos.

⁹ “Si un algin maldisua si pape o si mame, i ten ku matadu; suma ki fasi asin, si sangi na sta riba di si kabesa.

¹⁰ “Si un omi dita ku minjer di si kumpañer, elis tudu dus e na matadu, ku sedu omi ku minjer.

¹¹ Si un omi dita ku minjer di si pape, i tisi borgoña riba di si pape. Elis tudu dus e na matadu; se sangi na sta riba di se kabesa.

¹² Tambi si un omi dita ku minjer di si fiju, elis tudu dus e ten ku matadu. E fasi kunfuson; se sangi na sta riba di se kabesa.

¹³ Si un omi dita ku utru omi suma ku algin ta dita ku minjer, elis dus e fasi un kusa nujenti. E ten ku matadu; se sangi na sta riba di se kabesa.

¹⁴ Si un omi kasa un minjer juntu ku si mame, es i maldadi. Omi ku tudu dus minjer e na kemadu ku fugu, pa i ka ten maldadi na bo metadi.

¹⁵ Si un omi dita ku un limaria, i ten ku matadu. Bo na mata limaria tambi.

¹⁶ Minjer ku ciga pertu di un limaria pa ten relason seksual ku el, bu na matal, tudu ku ki limaria. E ten ku matadu; se sangi na sta riba di se kabesa.

¹⁷ “Si un omi toma si irma, fiju femia di si pape o si mame, e ten relason seksual, i sedu garandi borgoña. E na tiradu dianti di uju di tudu se pobu. Ki omi disonra si irma; el i ten ku sufri pa ki pekadu.

¹⁸ Si un omi dita ku minjer na si tempu di mis, i ten relason seksual ku el, i diskubri fonti di si sangi, elis dus e na tiradu na metadi di se pobu.

¹⁹ “Ka bu ten relason seksual ku irma di bu mame o di bu pape, pabia de manera algin ta disonra si parenti tokadu; tudu dus na sufri pa se pekadu.

²⁰ Si un omi dita ku si tia, i tisi borgoña pa si tiu. Elis e na sufri pa se pekadu; e na muri sin fiju.

²¹ Si un omi toma minjer di si ermon, es i un kusa impuru; i tisi borgoña riba di si ermon. E na fika sin fiju.

²² “Bo obdisi tudu ña regras ku leis, bo sigi elis, pa tera nunde ku N na leba bos pa bo mora ka bin ramasa bos.

²³ Ka bo yanda na kustumus di jintix ku N na serka bo dianti. Manera ke fasi e kusas tudu, N nuju elis.

²⁴ N fala bos kuma bo na tene se tera: ami N na da bos el suma yardansa, tera riku ku ta pruduzi ciu. Ami i SIÑOR bo Deus ku separa bos di utru nasons.

²⁵ “Bo na fasi diferensa di limarias puru ku impuru, kacus puru ku impuru. Ka bo kontamina bo kabesa pabia de limarias o kacus o kualker kusa ku ta rasta na con, kilis ku N pui di ladu suma impuru pa bos.

²⁶ Bo na sedu puru pa mi, pabia ami, SIÑOR, N sedu puru. N separa bos di utru nasons pa bo sedu di mi.

²⁷ “Si un omi o minjer tene spiritu di jambakus, o i sedu algin ku ta konsulta mortus, i ten ku muri. Bo na da elis ku pedras; se sangi na sta riba delis.”