Sirmonias 2 - BIBLIA - traduson antigu in Krioulo

Oferta di kumida

¹ “Ora ku algin tisi oferta di kumida pa SIÑOR, si oferta i na sedu foriña finu. I na darma azeiti riba del, i pui nsensu.

² I na lebal pa saserdotis, fijus di Aron. Un delis na toma un bokadu di foriña finu ku azeiti, ku tudu nsensu, i na kemal na altar suma lembransa, oferta pasadu na fugu ku ta cera sabi dianti di SIÑOR.

³ Kil ku sobra di oferta di kumida i na sedu di Aron ku si fijus. I un kusa sagradu dimas, tiradu na ofertas pasadu na fugu pa SIÑOR.

⁴ “Ora ku bu pursenta oferta di kumida kusñadu na furnu, i na sedu di foriña finu: bulus sin fermentu, masadu ku azeiti, ku bolaŝas finu sin fermentu ku untadu azeiti.

⁵ Si bu oferta di kumida kusñadu seku na kaleron, i na sedu di foriña finu sin fermentu, masadu ku azeiti.

⁶ Bu na kebral padas padas, bu na darma azeiti riba del. I na sedu oferta di kumida.

⁷ Si bu na pursenta oferta di kumida kusñadu na panela, i na fasidu di foriña finu ku azeiti.

⁸ Asin bu na tisi pa SIÑOR oferta di kumida kumpudu ku ki kusas; bu na pursental pa saserdoti, ku na lebal pa altar.

⁹ Saserdoti na toma parti di ki oferta di kumida, i na kemal riba di altar suma lembransa. I ta sedu oferta ku pasadu na fugu, ku ta cera sabi dianti di SIÑOR.

¹⁰ Kil ku sobra di oferta di kumida i na sedu di Aron ku si fijus. I un kusa sagradu dimas, tiradu na ofertas pasadu na fugu pa SIÑOR.

¹¹ “Tudu oferta di kumida ku bu tisi pa SIÑOR i ten ku kumpudu sin fermentu, pabia bu ka na kema nin un fermentu nin mel na oferta pasadu na fugu pa SIÑOR.

¹² Bu pudi tisi e kusas pa oferta di purmeru kusas di kebur, ma e ka na kemadu na altar pa da ceru sabi.

¹³ Tempra tudu oferta di kumida ku sal. Ka bu disa sal di kontratu di bu Deus falta na bu ofertas di kumida. Bu ta pui sal na tudu bu ofertas.

¹⁴ “Si bu pursenta pa SIÑOR oferta di kumida di purmeru kusas di kebur, bu ta tisi spigas nobu di miju maduru, masadu, yasadu na fugu.

¹⁵ Bu na darma azeiti riba del, bu na pui nsensu. Es i oferta di kumida.

¹⁶ Saserdoti na kema parti di lembransa di garan ku masadu, ku azeiti, ku tudu nsensu. Es i oferta kemadu pa SIÑOR.