Sirmonias 19 - BIBLIA - traduson antigu in Krioulo

Manga di lei ripitidu

¹ SIÑOR fala Moisés

² pa i papia ku tudu juntamentu di Israel, i fala elis: “Bo na sedu puru, pabia ami, SIÑOR bo Deus, N sedu puru.

³ “Kada un di bos ten ku rispita si mame ku si pape, i guarda ña dias di diskansu. Ami i SIÑOR bo Deus.

⁴ “Ka bo vira bo uju pa idulus, nin ka bo kumpu pa bos deusis di feru ribidu. Ami i SIÑOR bo Deus.

⁵ “Si bo na pursenta pa SIÑOR un sakrifisiu ku sedu oferta di pas, bo ten ku pursental na manera ku Deus na setal.

⁶ I na kumedu na mesmu dia ki pursentadu, tambi na sugundu dia. Si utru sobra te terseru dia, i na kemadu ku fugu.

⁷ Nin si un bokadu kumedu na terseru dia, i ta sedu kusa nujenti. Deus ka na seta ki oferta.

⁸ Tudu algin ku kumel, i na sedu kulpadu, pabia i lebsi kusa sagradu di SIÑOR. Ki algin na tiradu na metadi di si pobu.

⁹ “Na tempu di kebur na bo tera, bu ka na kebra na tudu kantu di bu lugar, nin bu ka na kuji ki restus di kebur ku kai na con.

¹⁰ Bu ka na rinka tudu kacus na bu orta di uva, nin bu ka na kuji uvas ku kai na con la; bu na disa elis pa koitadi ku stranjeru. Ami i SIÑOR bo Deus.

¹¹ “Ka bo furta, nin ka bo konta mintida, nin ngana ŋutru.

¹² Ka bo jurmenta kuma bo na fasi un kusa, kontra i ka sta na bo sintidu pa fasil. Si bo fasi asin, bo na lebsi nomi di bo Deus. Ami N sedu SIÑOR.

¹³ “Ka bu splora bu kumpañer nin ka bu furta ke ki di sil. Pagamentu di bu tarbajadur i ka na fika ku bo te parmaña.

¹⁴ “Ka bu maldisua surdu, nin ka bu pui un kusa dianti di segu pa i da tapada, ma bu na rispita bu Deus. Ami N sedu SIÑOR.

¹⁵ “Ka bu fasi justisa tortu na tribunal; ka bu mostra fabur pa koitadi, nin pa algin riku. Bu na julga bu kumpañer ku justisa.

¹⁶ “Ka bu pajiga palabra falsu na metadi di bu pobu kontra un algin. Ka bu pui vida di bu kumpañer na pirigu. Ami N sedu SIÑOR.

¹⁷ “Ka bu guarda rankor pa bu ermon na bu korson. Raprindi bu kumpañer klaru, pa bu ka ten parti na si pekadu.

¹⁸ “Ka bu vinga nin ka bu guarda rankor kontra bu parentis, ma bu na ama bu kumpañer suma bo propi. Ami i SIÑOR.

¹⁹ “Bo na sigi ña leis. Ka bu pui dus koldadi limaria pa e padi ku ŋutru. Ka bu sumia mesmu lugar ku dus koldadi simentera. Ka bu bisti ropa tisidu di dus koldadi liña.

²⁰ “Si un omi dita ku minjer ku sedu si katibu, ku sta pa kasa ku utru omi, ma kila ka paga inda kasamenti, nin ki minjer ka libertadu, ki omi ku si katibu na kastigadu, ma e ka na matadu, pabia minjer sedu inda katibu di ki omi.

²¹ Omi ten ku leba karnel macu pa SIÑOR na entrada di tenda di juntamentu, suma oferta pa kulpa.

²² Ku ki karnel di oferta pa kulpa, saserdoti na fasi sirmonia pa el dianti di SIÑOR pa ki pekadu ki fasi; ki pekadu na purdadu.

²³ “Ora ku bu yentra na tera, bu paranta kualker koldadi arvuri di fruta, bu na tene si fruta suma impuru pa tris anu. Bu ka na kume ki fruta.

²⁴ Na kuartu anu tudu si fruta na sedu sagradu, un oferta pa ngaba SIÑOR.

²⁵ Na kintu anu bu pudi kume si fruta. Asin, arvuri na padi mas ciu. Ami i SIÑOR bo Deus.

²⁶ “Ka bu kume kualker karni ku si sangi dentru del. Ka bu fasi jambakusndadi nin diviñason.

²⁷ “Ka bo rapa ladus di kabesa, bo disa kabelu rodondu na metadi, nin ka bo korta ladus di bo barba.

²⁸ Ka bo laña bo kurpu pabia di algin ku muri, nin ka bo fasi nin un marka na bo kurpu. Ami i SIÑOR.

²⁹ “Ka bu disgrasia bu fiju femia, bu pul pa i bindi si kurpu na mau vida, pa tera ka bai pa mau vida, nin pa i ka inci ku maldadi.

³⁰ “Bo guarda ña dias di diskansu; bo rispita ña kau sagradu. Ami i SIÑOR.

³¹ “Ka bo bai buska diviñaduris nin kilis ku ta konsulta spiritus di jinti ku muri. Si bo fasi asin, bo na kontamina ku elis. Ami i SIÑOR bo Deus.

³² “Lanta dianti di jinti di kabelu branku, bu rispita algin beju. Bu na ten rispitu pa bu Deus. Ami i SIÑOR.

³³ “Ora ku stranjeru bin mora na bo tera, ka bo maltratal.

³⁴ Stranjeru ku mora ku bos i ten ku tratadu suma fiju di tera. Bu na amal suma bu kabesa propi, pabia bo seduba stranjerus na tera di Ejitu. Ami i SIÑOR bo Deus.

³⁵ “Ka bo ngana jinti ku midida falsu di kumprimentu, pesu o volumi.

³⁶ Bo na usa balansu ku pesu justu, ku midida di litru tambi justu. Ami i SIÑOR bo Deus ku tira bos na tera di Ejitu.

³⁷ “Asin bo na obdisi tudu ña regras ku leis; bo na sigi elis. Ami i SIÑOR.”