Sirmonias 18 - BIBLIA - traduson antigu in Krioulo

Kasamentis ku ka sta konformi lei

¹ SIÑOR fala Moisés

² pa i papia ku fijus di Israel, i fala elis: “Ami N sedu SIÑOR bo Deus.

³ Bo ka na fasi suma ke ta fasi na tera di Ejitu, nunde ku bo moraba, nin bo ka na fasi suma ke ta fasi na tera di Kanaan nunde ku N na leba bos. Ka bo sigi se kustumus.

⁴ Bo na fasi konformi ña leis; bo na toma sintidu pa sigi ña ordis. Ami N sedu SIÑOR bo Deus.

⁵ Asin bo na sigi ña ordis ku leis, pabia si omi obdisi elis, i na yangasa vida. Ami N sedu SIÑOR.

⁶ “Nin un omi ka pudi bai pa si parenti tokadu pa ten relason seksual ku el. Ami N sedu SIÑOR.

⁷ “Ka bu ten relason seksual ku bu mame, pabia es i ta sedu borgoña pa bu pape. I bu mame; ka bu tisi borgoña riba del.

⁸ “Ka bu ten relason seksual ku minjer di bu pape, pabia es i ta tisi borgoña pa bu pape.

⁹ “Ka bu ten relason seksual ku bu irma, fiju femia di bu pape o di bu mame, ku padidu na kasa o fora di kasa.

¹⁰ “Ka bu ten relason seksual ku fiju femia di bu fiju macu o femia. Es i ta tisi borgoña riba di bo.

¹¹ “Ka bu ten relason seksual ku fiju femia di minjer di bu pape, ki padi ku bu pape: i bu irma.

¹² “Ka bu ten relason seksual ku irma di bu pape, pabia i sedu parenti tokadu di bu pape.

¹³ “Ka bu ten relason seksual ku irma di bu mame, pabia i sedu parenti tokadu di bu mame.

¹⁴ “Ka bu bai pa minjer di ermon di bu pape pa ten relason seksual ku el, pabia i bu tia.

¹⁵ “Ka bu ten relason seksual ku minjer di bu fiju, pa tisi borgoña pa el.

¹⁶ “Ka bu ten relason seksual ku minjer di bu ermon, pabia es i ta tisi borgoña pa bu ermon.

¹⁷ “Ka bu ten relason seksual ku un minjer tudu ku si fiju, nin ku fiju femia di si fiju macu o femia. Elis e sedu si parentis tokadu. Es i un garandi maldadi.

¹⁸ “Ka bu toma irma di bu minjer pa i sedu si kumbosa, nin ka bu ten relason seksual ku el nkuantu bu minjer sta di vida.

¹⁹ “Ka bu bai pa ten relason seksual ku un minjer na tempu di si impuresa di kada mis.

²⁰ “Ka bu ten relason seksual ku minjer di bu kumpañer, pa kontamina ku el.

²¹ “Ka bu da kualker di bu fijus pa i sakrifikadu pa deus Molok, pabia bu ka pudi dana nomi di bu Deus. Ami N sedu SIÑOR.

²² “Ka bu dita ku omi suma ku algin ta dita ku minjer. Es i kusa nujenti.

²³ “Ka bu ten relason seksual ku un limaria, pa bu kontamina ku el. Minjer ka dibi di bai pursenta dianti di un limaria pa ten relason seksual ku el, pabia es i kunfuson.

²⁴ “Ka bo kontamina ku nin un de kusas, pabia e jinti ku N na bin tira bo dianti e kontamina na tudu e kusas.

²⁵ Asin, tera propi i sta kontaminadu. N na kastigal pa si pekadu, tok tera ramasa jinti ku mora nel.

²⁶ Ma bo ten ku obdisi ña ordis ku ña leis. Ka bo fasi nin un de kusas nujenti, nin abos fijus di tera, nin stranjeru ku mora na bo metadi.

²⁷ Jinti ku moraba ne tera antis di bos e fasi tudu e kusas nujenti; asin tera bin sedu kontaminadu.

²⁸ Bo obdisi ña leis, pa bo ka kontamina tera, pa i ka ramasa bos suma ki ramasa jinti ku staba nel antis di bos.

²⁹ “Tudu algin ku fasi kualker de kusas nujenti, ki algin na tiradu na metadi di si pobu.

³⁰ Bo sigi ña mandamentus; ka bo fasi nin un di ki kustumus nujenti ke fasiba antis di bo bin; ka bo kontamina ku elis. Ami i SIÑOR bo Deus.”