Sirmonias 12 - BIBLIA - traduson antigu in Krioulo

Purifikason di minjer dipus di padi

¹ SIÑOR fala Moisés

² pa i papia ku fijus di Israel, i fala elis: “Si un minjer preña, i padi un fiju macu, i na fika impuru seti dia, suma ki ta sedu na si tempu kada mis.

³ Na oitavu dia, mininu ten ku sirkunsidadu.

⁴ Dipus minjer ten ku pera mas trinta i tris dia pa i purifikadu di si sangi. I ka pudi toka nin un kusa sagradu; i ka na bai pa kau sagradu te ora ki kompleta dias di si purifikason.

⁵ Si i padi femia, i na fika impuru dus semana suma na si tempu di kada mis. Dipus i na pera sesenta i seis dia pa i sedu purifikadu di si sangi.

⁶ “Ora ku dias di si purifikason pa fiju macu o femia kompleta, i na leba un fiju di karnel di un anu pa oferta kemadu, ku un pumba pikininu di kasa, o di matu, suma oferta pa pekadu. I na leba elis pa saserdoti, na entrada di tenda di juntamentu.

⁷ Saserdoti na pursenta elis dianti di SIÑOR, i na fasi sakrifisiu pa pekadu di minjer. Asin i na purifikadu di sangi ki pirdi. Es i lei pa kil ku padi fiju macu o femia.

⁸ “Si i ka ten manera di yangasa fiju di karnel, i na leba dus pumba di matu o dus pumba pikininu di kasa, un pa oferta kemadu, utru suma oferta pa pekadu. Asin saserdoti na fasi sakrifisiu pa si pekadu; i na fika puru.”