Sirmonias 11 - BIBLIA - traduson antigu in Krioulo

Limarias ku dibi di kumedu ku kilis ku ka dibi di kumedu

¹ SIÑOR fala Moisés ku Aron

² pa e papia ku fijus di Israel, e fala elis: “Di tudu limarias ku sta na tera, i esis ku bo na kume:

³ Bo pudi kume tudu limaria ku tene uña ku findi na metadi, tambi i ta rumina.

⁴ I ten utrus ku ta rumina son, o ku tene uña findidu son; bo ka na kume kilas. Kamelu ku ta rumina ma i ka tene uña findidu, es i ka na sedu puru pa bos.

⁵ Kueliu ta rumina ma i ka tene uña findidu; es i ka na sedu puru pa bos.

⁶ Lebri tambi ta rumina ma i ka tene uña findidu; i ka na sedu puru pa bos.

⁷ Purku tambi i ka na sedu puru pa bos, pabia i tene uña findidu tok i dividi na dus parti, ma i ka ta rumina.

⁸ Bo ka na kume se karni nin bo ka na toka na se kadaver; esis e ka na sedu puru pa bos.

⁹ “Tudu ku vivi na yagu di mar o di riu, ku tene barbatana ku skama, kila ku bo na kume,

¹⁰ ma kil ku ka tene barbatana nin skama na metadi di tudu kriatura ku ta vivi na mar ku riu, tudu ki konjuntu di manga di pis, i na sedu nujenti pa bos.

¹¹ Suma i sedu nujenti pa bos, bo ka na kume se karni, bo na nuju se kadaver.

¹² Tudu ku vivi na yagu ku ka tene barbatana nin skama i na sedu nujenti pa bos.

¹³ “Bo na nuju e kacus, bo ka na kume elis pabia e sedu nujenti: agia, kebrantós, mañoti,

¹⁴ falkon ku tudu koldadi jugude,

¹⁵ tudu koldadi korvu,

¹⁶ avestruz, moŝu, kuku, tudu koldadi gavion,

¹⁷ bufu, korvu di mar, kuruẑa,

¹⁸ gralia, sisni, pilikanu,

¹⁹ segoña, tudu koldadi garsa, popa ku mursegu.

²⁰ “Tudu insetu ku ta bua, ku ta yanda ku si pe, bo na tene elis suma kusa nujenti,

²¹ ma tudu insetu ku ta bua, ku ta yanda ku si pe, ku tene junta na si pe pa i pudi jukuta, bo na kume kila.

²² Bo pudi kume tudu koldadi gamfañoti, solyan, grilu ku agab,

²³ ma tudu utru insetu ku ta bua, ku ta yanda ku pe, i na sedu nujenti pa bos.

²⁴ E pudi pui pa bo sedu impuru. Kil ku toka na se kadaver, i na fika impuru te di tardi.

²⁵ Kil ku pega se kadaver i na laba si ropa, i na fika impuru te di tardi.

²⁶ “Tudu limarias ku tene uña findidu, ma i ka dividi na dus parti, ku tudu ku ka ta rumina, i ka na sedu puru pa bos. Algin ku toka nelis i na sedu impuru.

²⁷ Tudu limaria di kuatru pata ku si uña ka findi i ka na sedu puru pa bos; kil ku toka na se kadaver i na fika impuru te di tardi.

²⁸ Kil ku pega se kadaver i na laba si ropa, i na fika impuru te di tardi. Ki limarias ka na sedu puru pa bos.

²⁹ “Di tudu limarias ku ta rasta na con, esis e ka na sedu puru pa bos: doniña, ratu, tudu koldadi kagadu,

³⁰ orisu kaŝeru, linguana, lagartisa, lesma ku kamalion.

³¹ Esis na metadi di kilis ku ta rasta na con e ka na sedu puru pa bos. Kualker algin ku toka nelis dipus de muri i na fika impuru te di tardi.

³² Si un desis muri, i kai riba di kualker kusa, ki kusa na fika impuru, nin si ki kusa sedu di madera, fazenda, kuru o saku, o kualker feramentu ku ta fasidu tarbaju ku el; i na mitidu na yagu, i na fika impuru te di tardi; dipus i na sedu puru.

³³ Si un delis kai dentru di un puti di lama, tudu ke ku sta dentru del i na fika impuru; puti propi, bo na kebral.

³⁴ Kualker kumida ku yagu di ki puti darmadu riba del, i na fika impuru. Tudu bibida ku sta na ki puti na fika impuru.

³⁵ Kualker kusa ku se kurpu mortu kai riba del i na fika impuru. Furnu o kasarola di lama i na kebradu. I ka sta puru; asin bo na tratal suma kusa impuru.

³⁶ Uju di fonti o kau ku yagu ta guardadu nel i ta sedu puru, ma kil ku toka na un de kadaveris i na fika impuru.

³⁷ Si ki kadaver kai riba di simentera ku na sumiadu, ki simentera na sedu puru,

³⁸ ma si ki simentera pudu ja juntu ku yagu, si un kadaver kai riba del, logu bo na tenel suma impuru.

³⁹ “Si kualker limaria ku ta kumedu muri, kin ku toka na si kadaver i na fika impuru te di tardi.

⁴⁰ Algin ku kume ki kadaver i na laba si ropa, i na fika impuru te di tardi. Kil ku leba ki kurpu mortu tambi i na laba si ropa, i na fika impuru te di tardi.

⁴¹ “Tudu bicu ku ta rasta na con i nujenti; i ka na kumedu.

⁴² Kualker bicu ku ta yanda na con, nin si i ta rasta ku si bariga, o i ta yanda ku kuatru pe, o manga di pe, bo ka na kumel, pabia i nujenti.

⁴³ Ka bo bida impuru o nujenti pabia de bicus.

⁴⁴ Ami i SIÑOR bo Deus. Asin bo na ntrega bo kurpu pa i sedu sagradu, bo na kontinua sedu puru pabia ami i puru. Ka bo bida nujenti pabia di kualker bicu ku ta rasta na con.

⁴⁵ Ami N sedu SIÑOR ku tisi bos di Ejitu pa N sedu bo Deus. Asin, bo kontinua sedu puru pabia ami i puru.

⁴⁶ “Es i lei aserka di limarias, kacus, ku tudu kriaturas ku ta vivi e yanda bas di yagu, ku tudu bicu ku ta rasta na con.

⁴⁷ Bo ten ku fasi diferensa di puru ku impuru, di limarias ku pudi kumedu ku kilis ku ka pudi kumedu.”