Sirmonias 1 - BIBLIA - traduson antigu in Krioulo

Oferta kemadu

¹ SIÑOR coma Moisés, i papia ku el na tenda di nkontru, i falal

² pa i papia ku fijus di Israel, i fala elis: “Ora ku un son di bos tisi oferta pa SIÑOR, i na bin ku un di si bakas o un di si karnel.

³ Si i na pursenta un di si bakas suma oferta kemadu, i ten ku da un macu sin difeitu; i na pursental na entrada di tenda di juntamentu, pa SIÑOR pudi seta si dunu.

⁴ I na pui si mon riba di kabesa di ki limaria, pa i setadu pa el suma sakrifisiu pa purdon di si pekadu.

⁵ I na mata ki turu pikininu dianti di SIÑOR. Dipus, saserdotis, fijus di Aron, e na pursenta ki sangi, e na wagal na roda di altar ku sta na entrada di tenda di juntamentu.

⁶ I na fola ki limaria di oferta, i na kortal padas padas.

⁷ Saserdotis, fijus di Aron, e na pui fugu riba di altar, e buri leña na fugu.

⁸ Dipus e na ruma ki padas, tudu ku kabesa ku gurdura, riba di fugu di leña na altar.

⁹ Partis di dentru ku si pernas e na labadu ku yagu; saserdotis na kema tudu ki partis riba di altar; i na sedu oferta kemadu, pasadu na fugu, ku ta cera sabi dianti di SIÑOR.

¹⁰ “Si i misti pursenta karnel o kabra di si koral pa oferta kemadu, i ten ku pursenta macu sin difeitu.

¹¹ I na matal dianti di SIÑOR, na ladu di altar pa banda di norti. Saserdotis, fijus di Aron, e na waga si sangi na roda di altar.

¹² I na kortal padas padas; saserdoti na ruma ki padas, tudu ku kabesa ku gurdura, riba di ki fugu di leña ku sta na altar.

¹³ Partis di dentru ku pernas ten ku labadu ku yagu; saserdoti na pursental tudu, i na kemal riba di altar. I na sedu oferta kemadu, pasadu na fugu, ku ta cera sabi dianti di SIÑOR.

¹⁴ “Si i na pursenta SIÑOR kacus pa oferta kemadu, i na tisi un pumba di matu o un pumba di kasa.

¹⁵ Saserdoti na lebal pa altar, i na tursil garganti, i kemal na altar. Si sangi na pirmidu na paredi di altar.

¹⁶ I ten ku tira si papu ku si penas, i bota elis pa ladu di altar na banda di saida di sol, nunde ku sinsa sta.

¹⁷ I na pega na si asas, i findil, ma i ka na kaba kebral. Dipus saserdoti na kemal na fugu di leña ku sta na altar. I na sedu oferta kemadu, pasadu na fugu, ku ta cera sabi dianti di SIÑOR.