Ŝefis 8 - BIBLIA - traduson antigu in Krioulo

Zebá ku Zalmuna

¹ Omis di Efrain e punta Jidion: “Es i ke ku bu fasinu asin? Pabia di ke ku bu ka manda comanu oca ku bu na bai geria ku midianitas?” E jusia ku el ciu.

² I ruspundi elis: “Ke ku N fasi ku pudi komparadu ku kil ku bo fasi? Nta restu di arus di Efrain i ka mas minjor di ki tudu kebur di Abiezer?

³ Deus da ŝefis di midianitas na bo mon, ku sedu Oreb ku Zeeb. Ke ku N fasi ku pudi komparadu ku kil ku bo fasi?” Oca ki fala ki palabra, raiba ke tenba pa el i kaba.

⁴ Jidion ku si trizentus omi ciga na Jordon, e kamba. E kansaba ciu, ma e na serkaba elis inda.

⁵ I fala jinti di Sukot: “Bo ten pasensa, bo pati ña tropas un bokadu di kumida pabia e sta ja kansadu. N na serka Zebá ku Zalmuna, reis di midianitas.”

⁶ Ŝefis di Sukot puntal: “Nta bu tene ja Zebá ku Zalmuna na bu mon? Pa ke ku no na da kumida pa bu tropas?”

⁷ Jidion fala elis: “Ora ku SIÑOR ntrega Zebá ku Zalmuna na ña mon, N na distindi fididas di lala na con, N masa-masa bos riba del.”

⁸ Di la i bai pa Penuel, i fasi elis mesmu pididu. Omis di Penuel ruspundil suma ku jinti di Sukot ruspundilba.

⁹ Asin i fala omis di Penuel: “Ora ku N riba diritu, N na bati e bo tori.”

¹⁰ Zebá ku Zalmuna staba na Karkor, tudu ku se tropas, serka di kinzi mil omi. Esis i kilis ku sobra di tropas di jinti di saida di sol. Kilis ku muri seduba sentu i vinti mil omi ku ta geriaba ku spada.

¹¹ Jidion bai pa kamiñu di jinti ku ta moraba na tendas, na ladu di Nobá ku Jogbeá, pa saida di sol. I bai ataka ki tropas pabia e diskudaba.

¹² Ki reis di midianitas, Zebá ku Zalmuna, e kuri, ma Jidion serka elis tok i bai paña elis, i pajiga tropas tudu.

¹³ Jidion, fiju di Joás, i riba di gera na kamiñu di monti di Eres,

¹⁴ i prindi un rapas di Sukot, i punta-puntal. Ki rapas skirbi nomis di ki setenta i seti ŝef di Sukot, juntadu ku se garandis.

¹⁵ Jidion bin fala ki omis di Sukot: “Bo oja Zebá ku Zalmuna, ku bo na fasinba trosa aserka delis, bo puntan si elis e staba ja na ña mon, pa bo pudi da kumida pa ña omis ku staba ja kansadu.”

¹⁶ I toma ki garandis di prasa, i ranja spiñus ku fidida di lala, i kastiga ki omis di Sukot ku el.

¹⁷ I durba tambi tori di Penuel, i mata omis di ki prasa.

¹⁸ Dipus Jidion punta Zebá ku Zalmuna: “Ki omis ku bo mata na Tabor, kuma ke seduba?” E falal: “E parsiba ku bo; kada un seduba suma fiju di rei.”

¹⁹ Jidion fala elis: “I ña ermons, fijus di ña mame propi. N jurmenta pa SIÑOR, si bo ka mataba elis, ami tambi N ka na mata bos.”

²⁰ I rabida i fala Jeter, si fiju mas garandi: “Lanta, bu mata elis.” Rapas, manera ki seduba nobu inda, i sinti medu, i ka tira si spada.

²¹ Zebá ku Zalmuna fala Jidion: “Lanta, abo propi, bu matanu, pabia ‘suma ku omi sedu, asin ki si forsa.’ ” Jidion lanta, i mata Zebá ku Zalmuna, i toma fajamentu ku staba na garganti di se kamelus.

Efodi di Jidion

²² Israelitas fala Jidion: “Manera ku bu libranu na mon di midianitas, bu ta sedu no rei, abo tudu ku bu fiju ku bu netu tambi.”

²³ Jidion fala elis: “N ka na sedu bo rei, nin ña fiju; SIÑOR ku na rena riba di bos.”

²⁴ I fala elis mas: “N na pidi bos un kusa son, pa kada kin dan brinkus ki toma na gera.” (Inimigu teneba manga di brinkus di uru, pabia e sedu ismaelitas.)

²⁵ E falal: “No na dau elis di bon vontadi.” E distindi un panu na con; kada kin pui na ki panu un brinku ki toma na gera.

²⁶ Pesu di ki brinkus di uru ki pidi i sedu kuas vinti kilu, fora di fajamentus, ku fius, ku ropa kor di purpura ku reis di midianitas bistiba, ku kolaris ku ta staba na garganti di kamelus.

²⁷ Jidion toma ki fajamentus, i kumpu un efodi, i pul na si prasa ku sedu Ofra. Tudu jinti di Israel seduba infiel pa SIÑOR, e bai na adora ki efodi; kila seduba un armadilia pa Jidion ku si familia.

²⁸ Asin midianitas bin fika bas di fijus di Israel; nunka mas e ka lantanda se kabesa. Tera bin ten pas pa korenta anu nkuantu Jidion staba di vida.

Mortu di Jidion

²⁹ Jerubaal, fiju di Joás, riba pa si kasa.

³⁰ I padi setenta fiju, pabia i teneba manga di minjer.

³¹ I padi un fiju ku si kumadri ku staba na Siken, i pul nomi di Abimelek.

³² Jidion, fiju di Joás, muri oca ki staba ja beju dimas. E bai nteral na koba di si pape Joás, na Ofra di abiezritas.

³³ Oca ku Jidion muri, fijus di Israel torna sedu infiel pa SIÑOR, e bai tras di baalins, e pui Baal-Berit suma se deus.

³⁴ E ka lembra di SIÑOR se Deus ku libra elis na mon di tudu se inimigus ku staba na se roda,

³⁵ nin e ka mostra bondadi pa familia di Jerubaal, ku sedu Jidion, pabia di tudu kusas bon ki fasiba pa Israel.