Ŝefis 4 - BIBLIA - traduson antigu in Krioulo

Debora ku Barak

¹ Dipus di mortu di Eud, fijus di Israel torna fasi mal dianti di SIÑOR.

² SIÑOR bin ntrega elis na mon di Jabin, rei di Kanaan, ku na renaba na Azor. Kapiton di si tropas i Sísera, ku moraba na Aroset-di-Jintius.

³ Fijus di Israel yalsa fála e coma SIÑOR, pabia Jabin teneba novsentus karu di feru; tambi i dominaba ku forsa riba di fijus di Israel duranti vinti anu.

⁴ Debora, ku seduba anunsiadur di rekadu di Deus, minjer di Lapidot, i ta mandaba na Israel na ki tempu.

⁵ I kustuma ta sintaba bas di palmeras di Debora, na metadi di Ramá ku Betel, na montañas di Efrain. Fijus di Israel ta baiba pa fasi justisa na si mon.

⁶ I manda coma Barak, fiju di Abinoan, di Kedes di Naftali, i falal: “SIÑOR Deus di Israel i dau e ordi: ‘Bai toma des mil omi di jorsons di Naftali ku Zebulon, bu leba elis pa monti di Tabor.

⁷ N na tisiu Sísera, kapiton di tropas di Jabin, ku si karus ku tudu si multidon di tropas, pa riusiñu di Kison, N na ntregal na bu mon.’ ”

⁸ Barak falal: “Si bu na bai ku mi N na bai, ma si bu ka na bai, ami tambi N ka na bai.”

⁹ I falal: “I sta bon; N na bai ku bo. Ma ne kusa ku bu na bai fasi, i ka abo ku na ngabadu, pabia SIÑOR na ntrega Sísera na mon di un minjer.” Asin Debora lanta, i bai ku el pa Kedes.

¹⁰ Di la Barak coma jinti di Zebulon ku Naftali; des mil omi bai si tras. Debora tambi bai ku el.

¹¹ Eber, keneu, i disa utru keneus, ku sedu di jorson di Obab, kuñadu di Moisés, i bai yarma si tenda lungu di karvaju di Zaananin, ku sta pertu di Kedes.

¹² Oca ku Sísera kontadu kuma Barak, fiju di Abinoan, bai pa monti Tabor,

¹³ i bin junta si novsentus karu di feru, ku tudu tropas ku staba ku el, i leba elis di Aroset-di-Jintius te na riusiñu di Kison.

¹⁴ Debora fala Barak: “Lanta, bu bai, pabia aos i dia ku SIÑOR ntrega Sísera na bu mon. Nta SIÑOR ka bai ja bu dianti?” Asin Barak ria na monti Tabor ku des mil omi si tras.

¹⁵ Oca ku Barak na ataka, SIÑOR pui Sísera ku tudu si karus ku si tropas pa e ngañadu ku spada. Sísera ria na karu, i kuri.

¹⁶ Barak bai tras di karus ku tropas te na Aroset-di-Jintius. Tudu tropas di Sísera matadu ku spada; nin un son ka fika.

¹⁷ Ma Sísera kuri pa tenda di Jael, minjer di Eber, ki keneu, pabia i tenba pas na metadi di Jabin, rei di Azor, ku familia di Eber, keneu.

¹⁸ Jael sai i bai kontra ku Sísera, i falal: “Ñu pudi yentra. Yentra dentru; ka Ñu ten medu.” Sísera yentra na si tenda; Jael kubril ku panu.

¹⁹ Sísera falal: “Patin yagu pa N bibi; N tene sedi.” Minjer yabri un saku di kuru ku teneba liti, i dal i bibi; dipus i kubril mas.

²⁰ Sísera falal: “Firma na porta di tenda. Si algin bin punta si algin sta li, bu ta falal: ‘Nau.’ ”

²¹ Suma i staba kansadu, i bin pasa ku sonu. Jael, minjer di Eber, toma un pregu garandi ku tenda ta pregadu ku el; i toma tambi un martel, i bai pa el divagariñu, i pregal na si kabesa, i fural te na con. Asin i muri.

²² Oca ku Barak bin pa buska Sísera, Jael sai pa bai dal kontrada, i falal: “Bin, N na mostrau omi ku bu na buska.” I yentra ku el, i oja Sísera ditadu mortu, ku ki pregu na kabesa.

²³ Na ki dia Deus da fijus di Israel vitoria riba di Jabin, rei di Kanaan.

²⁴ Fijus di Israel kontinua luta ku forsa kontra Jabin, rei di Kanaan, tok e kaba ku el.