Ŝefis 3 - BIBLIA - traduson antigu in Krioulo

Rasas ku fika na Kanaan

¹ SIÑOR disa utru nasons na tera pa i pudi spurmenta ki israelitas ku ka pasaba na ki geras di Kanaan.

² I fasi es son pa pudi nsina gera pa ki fijus di israelitas ku nunka ka spurmentaba gera.

³ Ki nasons ku disadu na tera e sedu sinku ŝef di filisteus, tudu kananeus, sidonius, ku eveus ku moraba na montañas di Líbanu, desdi monti di Baal-Ermon te na entrada di Amat.

⁴ Deus fika esis pa i pudi spurmenta Israel, pa diskubri si e na obdisi mandamentus ku SIÑOR daba se papes di antigu na mon di Moisés.

⁵ Asin fijus di Israel fika e moraba na metadi di kananeus, eteus, amoreus, perizeus, eveus ku jebuseus.

⁶ E toma se fijus femia pa kasa; tambi e ta da se propi fijus femia pa fijus di ki jinti, e ta sirbiba se deusis.

Otniel

⁷ Fijus di Israel fika e na fasi kusas mau dianti di uju di SIÑOR, e diskisi di SIÑOR se Deus, e ta adoraba baalins ku Astarot.

⁸ Asin SIÑOR paña raiba delis, i ntrega elis na mon di Kusan-Risatain, rei di Mesopotamia. Fijus di Israel e bin sirbi ki rei duranti oitu anu.

⁹ Oca ke yalsa fála e coma SIÑOR, el i bin lantanda un libertadur pa fijus di Israel, ku libra elis, ku sedu Otniel, fiju di Kenaz, ermonsiñu di Kaleb.

¹⁰ Spiritu di SIÑOR bin riba del, i kumsa na manda na Israel. I sai pa gera; SIÑOR bin ntrega Kusan-Risatain, rei di Aran, na mon di Otniel, ku bin ngañal gera.

¹¹ Asin pas bin ten na tera duranti korenta anu, tok Otniel, fiju di Kenaz, bin muri.

Eud

¹² Fijus di Israel torna fasi mal dianti di uju di SIÑOR. Pabia de kusa, SIÑOR da Eglon, rei di moabitas, forsa kontra Israel.

¹³ Eglon bai junta ku fijus di Amon ku amalekitas, i bai i ngaña Israel; e toma prasa di palmeras, ku sedu Jerikó.

¹⁴ Fijus di Israel fika bas di Eglon, rei di moabitas, pa disoitu anu.

¹⁵ Fijus di Israel yalsa fála e coma SIÑOR; el i bin da elis un libertadur, un omi skerdus ku comadu Eud, fiju di Jera, benjamita. Fijus di Israel mandal pa i leba mpustu pa Eglon, rei di moabitas.

¹⁶ Eud kumpu un spada, moladu na tudu dus ladu, ku teneba serka di korenta i sinku sentimetru, i maral na si perna direita, bas di si ropa,

¹⁷ i leba ki mpustu pa Eglon, rei di moabitas, ku seduba un omi gurdu dimas.

¹⁸ Oca ki kaba ntrega ki mpustu, i dispidi jinti ku kargalba.

¹⁹ Ma el i ciga son na pedras labradu ku sta lungu di Jilgal; i riba i fala: “Ñu Rei, N tene un palabra di sigridu pa bo.” Rei fala pa jinti kala. Asin tudu jinti ku staba ku el e sai pa fora.

²⁰ Eud yentra nunde ku rei sinta na sobradi fresku, ki teneba son pa el, i falal: “N tene un palabra di Deus pa bo.” Rei lanta na si asentu.

²¹ Eud distindi si mon skerda, i toma spada ku staba na si ladu direita, i fidil na bariga di rei,

²² tok spada yentra tudu ku kau di pega. Gurdura fica riba di spada, ku pasa i sai pa tras, pabia Eud ka tiral.

²³ Eud sai pa sala, i fica porta di sobradi si tras, ku cabi.

²⁴ Oca ki bai, servus di rei bin, e oja portas di ki sobradi fica, e pensa kuma i na fasi nesesidadi la dentru di kuartu fresku.

²⁵ E pera tok e kansa, ma rei ka yabri portas di sobradi. Asin e toma cabi, e yabri kau; la e oja se mestre ditadu na con, mortu.

²⁶ Oca ke na pera, Eud kapli, i pasa ki pedras labradu, i bai pa Seirá.

²⁷ Oca ki ciga la, i toka korneta na montañas di Efrain. Fijus di Israel ria na montañas ku el. El i bai se dianti,

²⁸ i fala elis: “Bo bin ña tras, pabia SIÑOR ntrega bo inimigus moabitas na bo mon.” E ria ku el, e bai toma konta di kambansa di Jordon ku ta bai pa Moab; e ka disa ningin kamba.

²⁹ Na ki tempu e mata serka di des mil moabita, tudu elis omis forti di koraẑen na gera. Nin un son delis ka kapli.

³⁰ Na ki dia, moabitas bin fika bas di Israel. Tera bin ten pas duranti oitenta anu.

Sangar

³¹ Dipus di Eud, i bin lanta Sangar, fiju di Anat, ku mata seizentus filisteu ku un po di ponta gudu ku turu ta giadu ku el; el tambi i bin liberta Israel.