Ŝefis 21 - BIBLIA - traduson antigu in Krioulo

Minjeris pa jorson di Benjamin

¹ Omis di Israel jurmentaba na Mizpá kuma nin un delis ka na da si fiju femia pa i kasa ku omi di Benjamin.

² Jinti bai pa Betel, e bai fika la dianti di Deus te di tardi; e yalsa fála e cora ciu,

³ e fala: “O SIÑOR, Deus di Israel, pabia di ke ku e kusa kontisi na Israel, manera ki na falta aos un jorson na Israel?”

⁴ Parmaña di utru dia pobu lanta, e kumpu un altar, e sakrifika ofertas kemadu ku ofertas di pas.

⁵ Fijus di Israel punta ŋutru nos i ten algin na tudu jorson di Israel ku ka bin pa juntamentu di SIÑOR. Pabia e fasiba un garandi juramentu kuma, kilis ku ka binba dianti di SIÑOR na Mizpá e ten ku matadu.

⁶ Fijus di Israel sinti pena di se ermons di Benjamin, e fala: “Aos un jorson kortadu na Israel.

⁷ Ke ku no na fasi pa ranja minjeris pa kilis ku sobra? Pabia no jurmenta na nomi di SIÑOR kuma no ka na da nin un di no fiju femia pa i sedu se minjer.”

⁸ E punta: “I ten utru jinti di jorsons di Israel ku ka bin dianti di SIÑOR na Mizpá?” E bin oja kuma ningin di Jabes-Jilead ka binba pa junta na kampamentu,

⁹ pabia e fasi konta, e oja kuma nin un di moraduris di Jabes-Jilead ka staba la.

¹⁰ Asin jinti di juntamentu e manda la 12.000 omi di ki mas koraẑosu, e da elis ordi, e fala: “Bo toma spada, bo bai mata jinti di Jabes-Jilead, tudu ku minjeris ku mininus.

¹¹ Es ku bo ten ku fasi: Bo na mata tudu omi, ku tudu minjer ku ka sedu bajuda.”

¹² E bai oja na metadi di moraduris di Jabes-Jilead kuatrusentus bajuda ku ka kunsiba inda omi. E leba elis pa kampamentu na Siló, ku sta na tera di Kanaan.

¹³ Dipus, jinti di juntamentu manda fasi pas ku fijus di Benjamin ku staba na pedra garandi di Rimon.

¹⁴ Benjamitas riba, e dadu ki minjeris di Jabes-Jilead ku ka mataduba, ma minjeris ka ciga pa elis.

¹⁵ Jinti sinti pena pabia di Benjamin, manera ku SIÑOR fasi abertura na metadi di jorsons di Israel.

¹⁶ Garandis di juntamentu e punta: “Kuma ku no na fasi pa ranja minjeris pa kilis ku sobra, suma ku minjeris di Benjamin matadu?

¹⁷ Kilis ku sobra na Benjamin ten ku tene fijus ku na yarda elis, pa nin un jorson ka pirdi na Israel,

¹⁸ ma anos no ka pudi da elis no fijus femia pa e sedu se minjer, pabia fijus di Israel jurmenta e fala kuma kin ku da un benjamita minjer i na sedu maldisuadu.”

¹⁹ Dipus e fala: “Kada anu i ta ten festival di SIÑOR na Siló, na ladu di norti di Betel, na banda di lesti di strada ku bai di Betel pa Siken, pa sul di Lebona.”

²⁰ E manda fala fijus di Benjamin: “Bo bai sukundi na ortas di uva,

²¹ bo ba ta jubi. Ora ku bajudas di Siló sai pa baja na grupu, bo sai na ortas; kada kin ta rabata un bajuda di Siló; bo ta bai pa tera di Benjamin.

²² Ora ku se papes o se ermons bin keŝa na no mon, no ta fala elis: ‘Bo ten pasensa, bo ten dur delis. No ka oja minjeris pa kada un delis ne gera. Bo ka na ten kulpa, pabia i ka abos ku da bo fijus pa elis.’ ”

²³ Asin ku fijus di Benjamin fasi. Oca ku grupus di bajudas na baja, kada kin rabata un son, i lebal pa i bai sedu si minjer. E riba pa se propi tera, e torna kumpu prasas, e mora nelis.

²⁴ Fijus di Israel tambi e pajiga la, konformi se jorson ku se familia. Kada kin riba pa si propi tera.

²⁵ Na ki tempu i ka tenba rei na Israel; kada kin ta fasi kusa ki mistiba.