Ŝefis 19 - BIBLIA - traduson antigu in Krioulo

Un levita ku si kumadri

¹ Na ki tempu, oca ki ka tenba inda rei na Israel, i tenba un omi levita ku moraba na un kau na matu na montaña di Efrain. I ranja un kumadri na Belen di Judá,

² ma kila paña raiba del, i riba pa kau di si pape na Belen di Judá, i bai fika la kuatru mis.

³ Si omi leba un rapas ku dus buru, i bai tras di minjer pa bai ngodal pa i riba ku el. Minjer lebal pa kasa di si pape. Oca si pape ojal, i fika kontenti, i risibil diritu,

⁴ i nsisti pa i pudi fika la. I fika tris dia; e na kume, e bibi, e na durmiba la.

⁵ E lanta sedu na kuartu dia; levita purpara pa bai, ma pape di minjer falal: “Kume un bokadu di pon, pa bu pudi fika mas forti; dipus bo ta bai.”

⁶ Asin ki dus omi sinta e kume juntu, e bibi. Pape di minjer fala omi: “Ten pasensa, bu ta pasa mas e di noti li, bu divirti.”

⁷ Ma omi lanta pa bai; pape di si minjer ngodal pa i pasa noti la.

⁸ Na kintu dia i mandurga pa bai. Pape di minjer falal: “Ba ta kume un kusa, bu pera te di tardi.” Asin elis dus e torna kume juntu.

⁹ Dipus, omi lanta pa bai, ku si kumadri, ku si rapas. Si sogru, pape di minjer, falal: “Sol na kai ja; i tardi dimas. Ten pasensa, bu ta pasa noti li, bu divirti. Amaña bu ta mandurga, bu bai bu kamiñu pa bu kasa.”

¹⁰ Ma omi ka misti pasa noti la; i lanta, i bai ku si kumadri, ku si dus buru kargadu; e ciga lungu di Jebus, ku sedu Jerusalen.

¹¹ Oca ke na ciga la, sol na kaiba ja. Rapas fala si mestre: “Bin no panti ne prasa di jebuseus pa no pasa noti la.”

¹² Si mestre falal: “No ka na panti na un prasa di stranjerus ku ka sedu di fijus di Israel, ma no pasa pa dianti

¹³ tok no ciga na Jibeá o na Ramá; no ta pasa noti na un di ki lugaris.”

¹⁴ E pasa dianti, e na yanda pa bai. Sol kai oca ke pertu Jibeá, ku sedu un prasa di Benjamin.

¹⁵ E panti na Jibeá pa bai pasa noti la, e bai sinta na kau publiku na metadi di prasa, ma ningin ka rukuji elis na kasa pa pasa noti.

¹⁶ Jinti di ki prasa seduba di jorson di Benjamin. Ki di noti un omi beju, di montaña di Efrain, ku moraba na Jibeá, i na binba di si tarbaju na matu.

¹⁷ I oja ki ospri na kau publiku di prasa, i puntal: “Nunde ku bu na bai? Nunde ku bu sai?”

¹⁸ I ruspundil: “No sta na kamiñu di Belen di Judá pa un kau na matu na montaña di Efrain, di nunde ku N sedu, pabia N baiba Belen di Judá, ma gosi N na bai pa kasa. Ningin ka kumbidan pa si kasa.

¹⁹ No tene paja ku kumida pa no burus, ku pon ku biñu pa mi, pa es bu servu ña kumadri, tambi pa e rapas ku bin ku bu servus. Nada ka faltanu.”

²⁰ Omi beju falal: “Bu pudi bin pa ña kasa. N na dau tudu ku faltau, ma bu ka pudi pasa noti ne kau publiku.”

²¹ I lebal pa si kasa, i da kumida pa si burus. E laba pe, e kume, e bibi.

²² Oca ke na divirti, omis malvadu di ki prasa da volta di kasa, e na maja porta, e fala omi beju, dunu di kasa: “Tira pa fora ki omi ku yentra na bu kasa, pa no pudi dita ku el.”

²³ Dunu di kasa sai i fala elis: “Nau, ña ermons, ka bo fasi e kusa mau asin. Suma ku e omi sedu ña ospri, ka bo fasi e diskarna.

²⁴ Ali ña fiju femia ku sedu inda bajuda, ku kumadri de omi; N ta tira elis fora; bo ta toma elis, bo fasi ke ku bo misti ku elis, ma ka bo fasi diskarna pa e omi.”

²⁵ Ki omis ka seta obi. Ki levita toma si kumadri, i tiral pa fora. E dita ku el, e abusa nel te mandrugada.

²⁶ Oca sol na mansi, minjer bai i kai na porta di kasa di ki omi, nunde ku si omi staba; i fika la tok kau klaru.

²⁷ Si omi lanta parmaña, i yabri porta di kasa pa kontinua si kamiñu; i oja si kumadri ditadu na porta di kasa, ku si dus mon na entrada.

²⁸ I falal: “Lanta no bai.” Ma i ka ruspundi. I pul riba di buru, e bai pa si kasa.

²⁹ Oca ki ciga na si kasa, i toma faka, i pega si kumadri, i sapa-sapal na dozi padas; i manda elis pa tudu parti di Israel.

³⁰ Kada kin ku oja ki kusa i ta falaba: “Nunka kusa suma es ka fasidu, nin i ka ojadu, disna ku fijus di Israel sai di tera di Ejitu te aos. Bo pensa diritu ne kusa, bo konta ke ku no dibi di fasi.”