Ŝefis 18 - BIBLIA - traduson antigu in Krioulo

Mika ku jorson di Dan

¹ Na ki tempu, oca i ka tenba inda rei na Israel, jorson di Dan na buskaba tera ku na sedu se yardansa, pa e pudi mora la, pabia te na ki tempu e ka tomaba se yardansa ke daduba na metadi di jorsons di Israel.

² Asin fijus di Dan manda sinku omi di se jorson, koraẑosu na gera, di Zorá ku Estaol, pa e bai spia tera. E fala elis: “Bo bai jubi tera, kuma ki sedu.” E ciga na montaña di Efrain, e bai te na kasa di Mika, e pasa noti la.

³ Oca ke pertu kasa di Mika, e rapara fála di ki joven levita, e bai pa la, e bai puntal: “Kin ku tisiu li? Ke ku bu na fasi li? Ke ku manda bu sta li?”

⁴ I konta elis ke ku Mika fasi pa el, i fala: “I ta pagan; ami N ta sirbil suma saserdoti.”

⁵ E falal: “Ten pasensa, punta Deus pa no pudi sibi si no bias na bai diritu.”

⁶ Saserdoti fala elis: “Bo bai ku pas. Bo bias sta na mon di SIÑOR.”

⁷ Ki sinku omi bai tok e ciga na Laís; e oja kuma ki pobu ku mora la e staba suguru, suma jinti di Sidon, ketu, kunfiadu; nin e ka teneba un rei ku na mandaba nelis. E moraba tambi lunju di jinti di Sidon, e ka teneba nada ku ningin.

⁸ Oca ke riba pa Zorá ku Estaol, se ermons punta elis: “Kal ki noba ku bo tisinu?”

⁹ E fala elis: “Bo lanta, no bai pa elis, pabia no jubi ki tera, no oja kuma i bon dimas. Nta bo na fika sin fasi nada? Ka bo sedu prigisosu pa bai toma ki tera.

¹⁰ Si bo ciga la, bo na oja un pobu kunfiadu, ku tera largu ku ka ten falta di nada. Deus da bos el na bo mon.”

¹¹ Seizentus omi di jorson di Dan, yarmadu pa gera, e sai di Zorá ku Estaol,

¹² e bai e kampa na Kiriat-Jearin, na Judá. E ku manda ki kau ku sta tras di Kiriat-Jearin i comadu Kampamentu di Dan te aos.

¹³ Di la e pasa pa montaña di Efrain, e bai te na kasa di Mika.

¹⁴ Ki sinku omi ku baiba spia tera di Laís e fala se ermons: “Bo sibi kuma na un de kasas i ten efodi, ku idulus, ku un imaẑen labradu, ku utru di prata? Bo jubi manera ku bo pudi fasi.”

¹⁵ E bai pa la, e ciga na kau di ki joven levita na kasa di Mika; e falal manteña.

¹⁶ Ki seizentus omi di jorson di Dan, yarmadu pa gera, e fika na porton,

¹⁷ ma ki sinku omi ku bai spia tera e yentra na kasa, e toma ki imaẑen labradu, ku efodi, ku idulus, ku imaẑen di prata. Saserdoti firma na porton ku ki seizentus omi ku staba yarmadu pa gera.

¹⁸ Oca ke yentra na kasa di Mika, e toma imaẑen labradu, ku efodi, ku idulus, ku imaẑen di prata, saserdoti punta elis: “Nta ke ku bo na fasi?”

¹⁹ E falal: “Kala boka, ka bu fala nada. Bin ku nos, bu ta sedu pape ku saserdoti pa nos. Nta i ka minjor pa bu sedu saserdoti di un jorson di Israel te pa bu sedu saserdoti di kasa di un omi son?”

²⁰ Saserdoti fika kontenti. I toma efodi, ku idulus, ku imaẑen labradu, i bai juntu ku ki jinti.

²¹ Asin e rabida e bai; e pui se mininus, se limarias ku kargus pa e pasa dianti.

²² Oca ke sta ja lunju di kasa di Mika, jinti ku mora pertu di Mika e junta e pega tras di fijus di Dan, e bai paña elis,

²³ e na grita se tras. Danitas rabida e punta Mika: “Ke ku teneu ku manda bu junta e jinti tudu?”

²⁴ Mika ruspundi elis: “Bo toma ña deusis ku N kumpu, tudu ku ña saserdoti, bo bai ku elis. Ke bu bo fikan ku el gora? Kuma ku bo na puntan ke ku N tene?”

²⁵ Fijus di Dan falal: “Ka bu jusia ku nos, pa ka omis di sangi kinti bin lanta kontra bos, abo ku bu familia, pa bo pirdi vida.”

²⁶ Asin fijus di Dan bai se kamiñu. Mika oja kuma e mas el forti, i riba pa si kasa.

²⁷ Fijus di Dan leba kusas ku Mika fasiba, ku si saserdoti, e bai pa Laís, pa ki pobu ketu, kunfiadu. E mata elis ku spada, e kema se prasa ku fugu.

²⁸ I ka tenba ningin pa libra elis, pabia e moraba lunju di Sidon, e ka teneba ligason ku ningin. Se prasa staba na kobon di Bet-Reob. Fijus di Dan torna kumpu mas ki prasa, e mora nel,

²⁹ e coma si nomi Dan, konformi nomi di Dan se pape di antigu, fiju di Israel, ma nomi di ki prasa i seduba Laís.

³⁰ Fijus di Dan koloka ki imaẑen labradu pa e ba ta adoral. Jonatas, fiju di Jerson, fiju di Moisés, seduba saserdoti di jorson di Dan, tudu ku si fijus, te na tempu ku pobu lebadu katibu.

³¹ Asin ki imaẑen labradu ku Mika fasiba i fika pa elis tudu ki tempu ku kasa di Deus staba na Siló.